Ri Jeremiy 9 - Quiché Bible

¹ ¡C'o ta banom wi chi ri e nu bak'wäch e jacha' ta jun bulbux ja', jacha' ta jun nima' u wa'l wächaj, rech quinok' chi pa k'ij chi chak'ab paquiwi' ri e u cäminakib ri nu tinimit!

² ¡C'o ta banom wi c'o ta jun nu jekelibal chupam ri chaki'j uwo sak, rech quinbe naj che ri nu tinimit! Rumal rech chi conojel man queniman taj e jupuk jachanelab ri quieb qui wäch.

³ Amak'el xak e c'o che qui bixic banoj tak tzij e jacha' ta ne chi quequitzokopij tak ch'ab cumal q'uiakbal ch'ab. Chupam ri ulew are cätakan ri banoj tzij man are ta ri kastzij; xa' cätajin quenimatajic, cujiquiba' c'u u bixic ri Ajawaxel: “Man cacaj ta chi c'ut caquich'ob nu wäch.”

⁴ Man cuya' taj cäkacu'ba' ta ne ka c'u'x chrij ri utzalaj kachil, mawi ne chrij ri achalal cuya' cäcubax ta cuxaj, ri e achalal cäquisubula' tak quib chquixo'l, e are' tak c'ut ri cachalal quib quequimolola' tak tzij chquij,

⁵ chquijujunal cäquetz'bela' tak qui wäch, man c'o ta c'u jachin jun cubij ta ri kastzij. Quinak'atisam tak quib che u banic ri banoj tzij; e banal tak etzelal, man queticar ta

⁶ che u q'uexic quib. Ri Ajawaxel cujiquiba' u bixic: “¡T'orinic chrij t'orinic, subunic chrij subunic! Ri nu tinimit man caraj ta chic cuch'ob ta chi nu wäch.

⁷ Rumal ri', in, ri Ajawaxel ri c'o ronojel nu cuinem, quinbij: ¿Jas ta chic ri jun jasach ri quincuin ta chi che u banic che ri nu tinimit, we man are ri u cojic pa ri k'ak' che u ch'ajch'ojirisaxic?

⁸ Ri e cak' e ch'ab ri cäminsanelab; quequibila' tak subunic. Utz qui ya'ic rutzil tak qui wäch ri cachil caquibano, kas c'u ne tzij cätajin quequicoj c'amibal chque.

⁹ ¿La ma ta c'u chinc'äjisaj qui wäch cumal we jastak ri'? ¿La ma ta chinya' ri takalic che ri tinimit ri je cuban wa'? In, ri Ajawaxel, quinjiquiba' u bixic.

¹⁰ Chebok'ok xukuje' chech'ikowok pa tak ri c'ache'laj, quik'uyuyej jun juyuwem pa tak ri yuk'bal, rumal c'u rech chi e porotajinak chic man c'o ta chi c'u jun coc'ow ta chi chila'; man c'o ta chi qui wunem ri wacax quetatajic, xukuje' tak ri chicop ri querapinic xukuje' ri juyubal tak awaj xebanimaj tak bic.

¹¹ Quenbana' che ri Jerusalen chi cux jumulaj abaj, chi cux qui warabal xexalaj tak awaj; quinban na chi ri tinimit tak re Juda quebux na chaki'j uwo sak, man c'o ta chi c'u winak quecanaj ta chi can chupam.”

¹² ¿Jachin ta ri sibalaj c'o u no'j che u ch'obic wa'? ¿Jachin che xuya' wi ri Ajawaxel qui ch'obic we jastak ri', rech are' ta ri cäcuin che qui k'alajisaxic chque ri niq'uiaj chic? ¿Jasche etzeletajinak ri ulew, chaki'jarinak jacha' jun chaki'j uwo sak ri man coc'ow ta wi jun winak?

¹³ Ri Ajawaxel cutzelej u bixic: “Ronojel wa' xc'ulmatajic rumal rech chi ri aj israelib xequixutuj canok ri pixbenic ri xebenya' chque; man xeniman ta chwe mawi xequiban ri xinbij chque.

¹⁴ Xquitakej ri tacalaj u chomanic ri canima' xequiya' c'u k'ijilanic chque ri e subunelab, tak diosib, jacha' ri tijonic ri xequiya' ri qui tat chque.

¹⁵ Rumal ri' in, ri Ajawaxel ri c'o ronojel u cuinem, ri u Dios ri Israel, quinbij: Quenya' jun c'ayalaj qui wa, quenya' cuq'uia' ri c'o cämisabal ruc'.

¹⁶ Quebenjabuj chquixo'l ri nimak tak tinimit ri mawi ri e are' mawi ri e qui tat xquetamaj ta qui wäch; quinban na chi quebokatax ruc' ch'ich' re ch'o'j pa k'abaj, c'ä man c'o ta jun cacanaj ta canok.”

Juyuwem pa Jerusalen

¹⁷ Ri Ajawaxel ri c'o ronojel u cuinem cubij: “¡Chixtatabenok! Chebitaka' qui siq'uixic tak ri ixokib ri are qui chac ri banoj juyuwem.”

¹⁸ ¡Je', chepet aninak cok'ej c'ut; chenoj ri ka bak'wäch che u wa'l tak wächaj cheturuw c'u ulok ja' chquipam tak ri e rij tak ka bak'wäch!

¹⁹ Quetataj c'u rakoj tak chi'aj xukuje' tak juyuwem pa Sion: ¡Tok'ob ka wäch, che wa' we etzeletajic ri uj c'o wi! ¡Elinak nimalaj ka q'uixbal! Cäkatzak na canok ri kulew, ri e kachoch e etzeletajinak.

²⁰ Ixokib, chitatabej ri u tzij ri Ajawaxel, kas chitatabej ri cubij chiwe. Chebitijoj tak ri e iwal ixokib che u banic ok'ej xukuje' ri e canima' quib cuc' je juyuwem wa' chiquiba' na':

²¹ “Ri cämical xoc chupam tak ri kachoch, xopan chupam tak ri cachoch ri ajawinelab; quebucämisala' tak ri ac'alab xo'l tak ri ja ri e ka c'ojolab chquipam tak ri c'ayibal.

²² Ri cäminak tak achijab xeliq'ue' canok jacha' ri qui mes tak ri awaj pa tak ri juyub, jacha' ri u jolom trico ri cutzak can ri banal k'atoj ri man c'o ta c'u jun cäsic'owic.” Ri Ajawaxel cajiquiban u bixic.

²³ Ri Ajawaxel cubij: “Munimarisaj u k'ij ri ajno'j chi ajno'j, mawi ri ajcuinem chi ajcuinem, mawi ri k'inom che ri u k'inomal.

²⁴ We c'o jun caraj cunimarisaj u k'ij, chunimarisaj u k'ij che retamaxic nu wäch, che retamaxic chi in ri' ri Ajawaxel, ri quinpatanin cho ri uwächulew ruc' lok'ok'ebal c'uxaj suq'uilal xukuje' colomal, are c'u wa' ri cäkaj chnuwäch in. In, ri Ajawaxel, quinjiquiba' u bixic.”

²⁵ Ri Ajawaxel cujiquiba' u bixic: “Cäpe ri k'ij aretak quinc'äjisaj na qui wäch conojel ri tinimit ri cäquikopij ri u wi' ri qui tz'umal ri achijab wi che quetal:

²⁶ Ri Ejipt, Juda, Edom, Amon xukuje' ri Moab, xukuje' conojel ri e jekel chupam ri chaki'j uwo sak caquisocaj c'u ne tak ri qui wi' xe' tak qui xiquin. Conojel c'ut we tinimit ri', xukuje' c'u ne ronojel ri tinimit Israel man cojon ta quetal re kopinic pa ri canima', xane' kas e k'ijilal tak diosib ruc' ronojel canima'.”