Ri Jeremiy 8 - Quiché Bible

Ri u c'äjisaxic u wäch ri Israel

¹ Ri Ajawaxel cujiquiba' u bixic: “Pa ri k'ijol ri' quec'otix na chquipam tak ri qui mukubal ri qui bakil tak ri ajawinelab xukuje' ri quech ri c'amal tak be re Juda, ri quech ri e cojol tabal tok'ob, ri quech ri e k'axal tzij xukuje' ri quech ri xejeki' pa Jerusalen,

² xequiliq'uiba' c'u na can chuwäch ri k'ij, chuwäch ri ic' xukuje' chquiwäch conojel ri ch'imil ri xequilok'ok'ej can nabe, xequipatanij, xeteri chquij, xech'obon chque xukuje' xek'ijilan chque. Man c'o ta jun quemolow na che qui mukic. Quecanaj c'u can cho ri ulew e jacha' mes.

³ Ri quec'asi' can chque we itzel tak winak ri', pa apachique ta c'u ne c'olbal ri querik taj wi aretak e nu jabum chic, are caquirayij na quecämic chuwäch chi quec'asi'c. In, ri Ajawaxel Dios ri c'o ronojel nu cuinem, quinjiquiba' u bixic.”

Man kas jicom taj xukuje' u c'äjisaxic u wäch ri Israel

⁴ “At, Jeremiy, chaya' u bixic we tzijol ri' che ri tinimit chi in quinbinic: ‘Aretak jun cätzakic, cawalijic; aretak cusach ri be, cätzelej chi jumul chupam.

⁵ Israel, ¿jas c'u che man kas ta at jic chwij? ¿Jas c'u che, Jerusalen kas xa' jumul xinaxutuj? ¿Jas c'u che xacoj a chuk'ab che nu c'ulelaxic a ma ta c'u cawaj cattzelejic?

⁶ In oquinak il che a tatabexic, man nu tom ta c'u jachin jun ri cuq'uex ta u c'u'x cutanaba' ta u banic ri etzelal cuchajij ta c'u anima' cubij ta c'ut: ¿Jas ri nu banom? Conojel qui takem ri qui be ruc' aninakil e jacha' ri quiej ri caquiq'uiak quib ruc' ronojel qui chuk'ab pa ri ch'o'j.

⁷ Ri siguenya ri cabin cho ri caj reta'm c'u ne jampa' rajawaxic catzelejic. Ri palomax ri xipicar xukuje' ri chiochi queta'm jampa' rajawaxic quebe pa jun c'olbal chic. Are c'u ri at, nu tinimit, man e a weta'm taj ri e nu pixab.

⁸ ¿Jas ta ri quixcuin wi ix che u bixic chi ix ajno'jab chi c'o c'ut ri u pixab ri Ajawaxel iwuc'? ¡We ri e yaltzijol, cuc' ri qui tz'ibabal ri e banal tak tzij, qui q'uexom pa banal tzij!

⁹ E are' tak c'ut we ajno'jab ri' quemach'irisataj canok, e barabatajinak, e jacha' ri awaj ri e kajinak chupam ri c'amibal. ¿Jawije' c'o wi ri qui no'j, we e qui xutum tak ri e nu tzij?

¹⁰ Rumal ri', quebenjacha' ri quixokil chque jujun achijab chic, ri culew pa qui k'ab jule' tak ajchak'e chic. Conojel c'ut chi nimak chi ch'utik. Xuwi caquichomaj u rikic ri ch'äcoj ri xa quet'orixic; k'axal tzij xukuje' e cojol tabal tok'ob, conojel quequiban t'orinic.

¹¹ Xak quequimalama' ri e qui socotajic tak ri nu tinimit; “Jamaril, jamaril,” quecha', ronojel c'ut c'ax u banom.

¹² ¡Cheq'uix ta ba' che qui banic ri jastak ri man quebencoch' taj! Man c'u je taj, man c'o ta jubik' qui q'uixbal, ¡mawi ne queta'm chic jas ri' ri q'uixbal ri quelic! Rumal ri' aretak chenc'äjisaj qui wäch, cäquichak'ij na quib quekaj c'u na jacha' ri jule' chic. In ri Ajawaxel, quinjiquiba' u bixic.’ ”

¹³ Ri Ajawaxel cujiquiba' u bixic: “Quenk'ata' ri nu tinimit jacha' ta ne trico. Mawi jun uva cäcanaj ta can puwi' ri u che'al, mawi jun higo cäcanaj ta can puwi' ri u che'al higo. Xuwi quecanaj can chaki'j tak u xak.”

¹⁴ Cubij c'u na ri tinimit: “¿Jas u patan cujcanaj can waral? ¡Jo' konojel pa tak ri tinimit ri e c'o nimak tak tapia chquij, xa' c'u jumul chujcämisaxok! Ri Ajawaxel, ri ka Dios, cubana' chke chi cuje' cämok; cuya' na cämisanel ja' chke u mac rech chi uj macuninak chuwäch.

¹⁵ Keyebem utzil, man c'o ta c'u utzil ulinak. Keyebem rutzil ka wäch, xuwi c'u c'o xibin ib.

¹⁶ ¡Petem cuban ri c'ulel! ¡Catataj chic ri ruxlabic u pa qui tza'm ri quiej kas pa Dan! Aretak quewojonic cäyicop ronojel ri ulew. Quepe che u sachisaxic u wäch ri ulew xukuje' ronojel ri e u k'inomal, ri tinimit tak xukuje' ri e jekel chquipam.”

¹⁷ Ri Ajawaxel cujiquiba' u bixic: “Quebentak cämisanel tak cumätz chiwij ri quecämisanic ri quixcatzowic; chque ri e are' man c'o ta ch'obonelab ri nim ta chquiwäch.”

Ri Jeremiy cuna' k'oxomal u mac rech ri u tinimit

¹⁸ Ri nu k'oxomal man c'o ta cunabal che, ri wanima' cächukchubic.

¹⁹ Ri qui rakoj tak chi'aj ri nu tinimit cätataj pa ronojel ri ulew: “¿La man c'o ta chic ri Ajawaxel pa Sion? ¿La man c'o ta chic ri rajawinel chi'?” Ri Ajawaxel cutzelej u bixic: “¿Jasche xiban c'ax chwe xebik'ijilaj tak diosib, diosib ri man c'o ta qui patan xukuje' man etamatal ta qui wäch?”

²⁰ Xoc'ow ri k'alaj, xq'uis qui yaquic tak ri e qui wächinic tak ri ulew man c'o ta c'u to'tajem chke.

²¹ Quinrik c'ax ruc' ri u rikoj c'ax ri nu tinimit; ri bis xukuje' ri xibin ib in ch'äcatajinak cumal.

²² ¿La ma ta lo c'o jun cunabal pa Galaad? ¿La ma ta lo c'o jachin jun chi' cacunanic? ¿Jasche man cacunataj taj ri nu tinimit?