Ri Jeremiy 7 - Quiché Bible

Ri Jeremiy cätzijon chupam ri rachoch Dios

¹ Ri Ajawaxel xbe che u suq'uil ri Jeremiy, xubij c'u che:

² “Chaya' awib chuchi' ri oquibal chupam ri rachoch ri Ajawaxel chaya' c'u retamaxic we takquil ri' chila': Winak iwonojel ri quixel pa Juda, ri quixoc'ow chi' tak we oquibal ri' che u k'ijilaxic ri Ajawaxel, chitatabej we takquil ri'

³ rech ri Ajawaxel ri c'o ronojel u cuinem, ri u Dios ri Israel: ‘Chibana' utz che ri i c'aslemal xukuje' chque tak ri e i banoj, quinya' c'u na chiwe chiquitakej jekelem chupam we ulew ri'.

⁴ Mijiquiba' i c'u'x chquij tak ri quixsubuwic je caquibij wa': ¡Waral c'o wi ri rachoch ri Ajawaxel, waral c'o wi ri rachoch ri Ajawaxel!

⁵ We quiban utz che ri i c'aslemal xukuje' tak ri e i banoj quiban c'u ri suq'uilal ri jun ruc' ri jun chic;

⁶ we man quebit'orij ri man e i winakil taj, ri minorib xukuje' ri malca'nib, mawi quebicämisaj ri winak ri man c'o ta qui mac chupam we c'olbal ri', mawi quebik'ijilaj jule' diosib chic, ri rumal wa' kas ix quixbanow ri c'ax chiwe chbil iwib,

⁷ in quinya' na chiwe chi qui takej jekelem waral, chupam ri ulew ri kas xa' jumul xinya' chque ri e i mam.

⁸ Ix quijiquiba' i c'u'x chquij subunelalaj tak tzij ri man quepatanij ta chiwe.

⁹ Quixeläk'ic, quixcämisanic, quixkaj pa mac ruc' jun winak chic, xak lok' quiban ri chi'nic ri kas cäban na, quebichi'j c'oc' k'ol che ri Baal, quebiya' k'ijilanic chque tak diosib ri man c'o ta iwe ix chque,

¹⁰ chwi chi c'u wa' quixpe chupam we wachoch ri' ri tasom chwe, che u tac'abaxic iwib chnuwäch. Are c'u pa i c'u'x chi man c'o ta quic'ulmaj waral; are c'u pa i c'u'x chi quixcuinic quitakej qui banic ri jastak ri man quebencoch' taj.

¹¹ ¿La are c'u pa i c'u'x chi we wachoch ri' ri are nu c'olbal are jun qui pec eläk'omab? In wilom ronojel wa'. In, ri Ajawaxel, quinjiquiba' u bixic.

¹² Jix chupam ri nu k'ijilabal ri c'o pa Sil, ri nabe c'olbal ri xincha' che nu jekelibal, chiwila' c'ut ri xinban che rumal ri retzelal ri nu tinimit Israel.

¹³ Pune' c'u jumul xukuje' camul nu yo'm u bixic ri i c'aslemal chiwe, ri ix man i wajwam ta nu nimaxic, mawi c'u ne c'o jas i tzelem u bixic chwe. In, ri Ajawaxel, quinjiquiba' u bixic.

¹⁴ Rumal ri', junam jas ri xinban che ri k'ijilabal aj Sil, je quenbana' che we rachoch Dios ri' ri are nu c'olbal, ri xinjach pa i k'ab xukuje' pa qui k'ab ri e i mam ri i jiquiban wi i c'u'x.

¹⁵ Ix quixinrokij na bic chnuwäch jas ri xinban che qui rokixic bic ri e iwachalal, ri e rija'lil ri Eprain.’ ”

Ri man u jiquil taj ri Israel

¹⁶ “At, Jeremiy, maban ch'awem wuc' puwi' we tinimit ri', minatok'olej mawi mat tz'onon paquiwi'. Macoj a chuk'ab chwe, man c'u catintatabej taj.

¹⁷ ¿La ma ta cawil ri caquiban chquipam tak ri tinimit re Juda xukuje' xo'l tak ri ja pa Jerusalen?

¹⁸ Ri alabom caquimol ri si', ri tataxelab caquitzij ri k'ak', ri ixokib caquisuc'umaj ri k'or che qui banic tak ri lej ri caquichi'j c'u che ri ixok dios ri cäbinax ajawinel ixok re ri caj che cumal. Quinquic'axc'obisaj, quequichi'j c'u ne u wa'l uva chque tak diosib.

¹⁹ C'o c'u na ri c'axc'obisanic ri caquiban chquibil tak quib, chuwäch ri kas c'axc'obisanic ri caquiban chwe in, che ri kas qui q'uixbal. In, ri Ajawaxel, quinjiquiba' u bixic.

²⁰ Rumal ri' in, ri Ajawaxel, quinjiquiba' u bixic chiwe chi quinkasaj na ronojel ri woyowal puwi' we c'olbal ri' paquiwi' c'u ri winak, xukuje' paquiwi' ri awaj, ri juwi' tak che' ri e c'o pa tak ri juyub xukuje' chque tak ri e qui wächinic tak ri ulew. Cäjunamataj ruc' jun c'atic ri man cachup taj.”

²¹ Ri Ajawaxel ri c'o ronojel u cuinem, ri u Dios ri Israel, cubij che ri u tinimit: “Chebichi'j conojel ri tabal tok'ob ri cächajirisaxic xukuje' ri tabal tak tok'ob ri quiwaj, chitija' c'u iwech we ti'j ri'.

²² Aretak c'u xebenwesaj ulok ri e i mam pa Ejipt, man c'o ta jas xinbij chque mawi xinya' takanic chi quecoj tabal tok'ob ri quechajirisaxic mawi tabal tak tok'ob.

²³ Are c'u ri takanic ri xinya' chque are wa' chi che niman chwe; we c'u je cäquiban wa' quincanaj ri' che qui Dios are c'u ri e are' quecanaj ri' che nu tinimit. Xinbij c'u chque chi je chiquibana' jacha' ri takanic ri xinya' chque, rech utz caquitaklebej.

²⁴ Man c'u xeniman ta chwe mawi xquiya' ta qui xiquin chwe, xane' ruc' taquil xquiya' quib xec'am bic rumal ri itzel u chomanic ri canima'. Che u q'uexwäch ri xetzelej ta wuc', are xquiya' can ri quij chnuwäch.

²⁵ Kas aretak xebel ulok ri e i mam pa Ejipt c'ä camic, in e nu takom ulok chiwe, jun chrij jun chic, conojel ri e pataninelab tak wech ri e k'axal nu tzij.

²⁶ Are c'u ri ix man xixniman ta chwe mawi xiya' ta i xiquin chwe, xane' sibalaj xitacarisaj na iwib chquiwäch ri e i mam.

²⁷ At, Jeremiy, chebabij conojel we jastak ri' chque, pune' man cacaj catquitatabej; charaka' achi' chque, pune' man c'o ta jas caquitzelej u bixic chawe.

²⁸ Chabij chque: ‘Are nim tinimit wa ri man caniman ta che ri u Dios mawi c'u ne caraj chic cäpixbexic. Ri kastzij mawi jumul quel chi ulok pa u chi'.’ ”

Quik'ijilaxic diosib pa Jerusalen

²⁹ ¡Jerusalen, chakopij ri a wi' ri nimak chaq'uiaka' c'ut! ¡Chabixoj jun bisobalalaj bix paquiwi' ri buc'ubak chaki'j uwo sak! Oyowarinak c'ut ri Ajawaxel cuc' ri e a winak, e u wonobam canok xukuje' e u xutum.

³⁰ Ri Ajawaxel cujiquiba' u bixic: “Ri winak aj Juda c'o ri u banom ri yacowinak woyowal xebequiya' ri xawebalalaj tak e qui diosib chupam ri wachoch ri banom che nu c'olbal, xcawasij c'ut.

³¹ Chupam ri beya' re Ben-inom xquiwoc wi ri porobal aj Topet che qui poroxic tak ri e qui c'ojol ri e qui mia'l, man c'o ta c'u takanic xinya' ta chque chi je ta chiquibana' wa' ri mawi c'u ne jubik' xoc'ow chupam ri nu chomanic.

³² Rumal ri' in, ri Ajawaxel, quinjiquiba' u bixic chi cäpe na ri k'ij chi we c'olbal ri' man cäbix ta chi na Topet che mawi Beya' re Ben-inom, xane' Beya' re ri Cämisanic. Chila' c'ut pa Topet quemuk wi na ri cäminakib, man c'o ta chi c'u c'olbal,

³³ ri qui cuerp tak ri cäminakib quebajwataj na che qui wa ri c'uch xukuje' chque tak ri juyubal tak awaj, man c'o ta c'u jachin ta queyonic.

³⁴ Quebenwetzelaj na qui wäch tak ri bix re nimak'ij xukuje' re jajatem ri queban chquipam tak ri tinimit re Juda xukuje' xo'l tak ri ja pa Jerusalen, xukuje' tak ri bix quech c'ulanem; ronojel ri ulew cäq'uextaj na pa jun chaki'j uwo sak.”