Ri Jeremiy 6 - Quiché Bible

Ri c'ulel cusutij rij ri Jerusalen

¹ Winak ri ix aj rulew ri Benjamin, ¡chitzucuj c'ubal iwib, chixanimaj chiya' can ri Jerusalen! Chiwok'esaj ri trompet pa Teco, chiwalijisaj jun etal pa Bet-aquerem, rumal rech chi jun u q'ueyowal, jun nimalaj c'axc'obic, caxibin ulok kas pa ri riquiak'ab ri relebal k'ij.

² Ri Sion jacha' jun je'licalaj yuk'bal,

³ jawije' ri quebopan wi ri ajyuk'ab cuc' ri e jutak mulaj qui chij; quequiyac tak ri qui panibal chquij chquijujunal c'ut ri qui chij quebecha' pa tak ri qui yuk'bal.

⁴ Ri e qui c'ulel caquibij: “¡Chisuc'umaj iwib che u banic ch'o'j ruc'! ¡Tisaj, chujch'ojin ruc' pa tiq'uil k'ij! ¡Sibalaj c'u tok'ob ka wäch!, benak chic ri k'ij, ri nanoch' e yukyubinak.

⁵ ¡Chujch'ojin ba ruc' chak'ab chekayojij ri e qui tac'atak tak ja!”

⁶ Ri Ajawaxel ri c'o ronojel u cuinem yowinak we takanic ri': “¡Chebikasaj tak che' chi woco' jun pakalibal che u banic ch'o'j ruc' ri Jerusalen! Ri tinimit c'okotajinak che u c'äjisaxic u wäch, rumal rech chi nojinak che u banic c'ax.

⁷ Che ri Jerusalen caq'uiy wi ulok ri etzelal jacha' jun c'ua' ri caq'uiy wi ulok ri ja'. Man c'o ta ri cätataj chupam xak xuwi ri tokinic xukuje' qui banic tak c'ax; man c'o ta jas quinwil chupam xuwi ri socotajic xukuje' k'oxomal.

⁸ Chc'äj a wäch, Jerusalen, we c'u man cäc'äj a wäch, in oyowarinak quintas na wib chawij, quinban na chawe chi catux jun chaki'j uwo sak, man c'o ta a winakil quebenya' ta canok.”

Cäya' u bixic ri c'äjisabal wächaj

⁹ Ri Ajawaxel ri c'o ronojel u cuinem cubij: “Ri aj israelib ri quecanajic quetzucuxic xukuje' quetzuculax na, jacha' ri cäban che qui tzuculaxic tak ri uva chquixo'l tak ri e u k'ab c'ä man c'o ta jun uva cäcanajic.”

¹⁰ Ri in xintzelej u bixic: “¿Jachin ta ri quintatabenic, we queben tzijobej quinya' c'ut we tzijol ri chque? E tz'apital ri qui xiquin, Ajawaxel, man c'u quecuin taj quetatabenic; xa' caquitze'j u wäch ri tzij la, man cäkaj ta chquiwäch.

¹¹ In nojinak che ri oyowal la, Ajawaxel; man quincuin ta chi che u k'atixic.” Ri Ajawaxel xubij chwe: “Chajamij paquiwi' ri alabom pa ri be, paquiwi' tak ri jutak mutzaj c'ojolab. Queyut na bic ri achajilaxelab junam cuc' tak quixokil xukuje' ri nimak tak winak ri q'ui chic qui junab.

¹² Ri e cachoch, ri e culew xukuje' ri e quixokil quek'ax na pa qui k'ab jule' chic. Quenwalijisaj c'u na ri nu k'ab che u c'äjisaxic qui wäch ri e jekel chupam we ulew ri'. In, ri Ajawaxel, quinjiquiba' u bixic.

¹³ Conojel, chinimak chi ch'utik, xuwi caquichomaj ri ch'äcoj rumal subunic; e k'axal tzij xukuje' e cojol tabal tok'ob, conojel quequiban t'orinic.

¹⁴ Xak quequimalama' ri qui socotajic ri nu tinimit; “Jamaril, jamaril,” quecha'; ronojel c'ut c'ax u banom.

¹⁵ ¡Cheq'uix ta ba' che qui banic ri jastak ri man queben coch' taj! Man je ta c'u ri' man c'o ta jubik' qui q'uixbal, ¡mawi ne queta'm chic jas ri' ri q'uixbal ri quelic! Rumal ri' aretak chenc'äjisaj qui wäch, caquichak'ij na quib quetzak c'u na e jacha' ri e jule' chic. In, ri Ajawaxel, quinbij.”

Ri Israel man caniman taj

¹⁶ Ri Ajawaxel cubij che ri u tinimit: “Chixtac'al pa tak ri be chixca'y c'ut, chich'obo' jachique tak ri ojer tak be, ri c'o wi ri utzalaj be; chitakej quirik c'u na ri uxlanem.” Caquibij c'ut ri e are': “Jayi', man cäkaj taj cäkatakej.”

¹⁷ Ri Ajawaxel xebucoj yuxlenelab, xubij c'u che ri tinimit: “Chixoc c'u il che u tatabexic ri cäbix chiwe.” Xubij c'u ri tinimit: “Man cujoc ta il che u tatabexic.”

¹⁸ Rumal ri' cubij ri Ajawaxel: “Chitatabej, nimak tak tinimit, chiwetamaj ri cuc'ulmaj na ri nu tinimit.

¹⁹ Chatatabej, ulew: Quinc'am ulok jun quiäkasakil puwi' ri nu tinimit are' c'u wa' ri xequic'am ulok ri e itzel tak qui banoj; rumal rech chi man xeboc ta il che qui tatabexic ri e nu tzij, xane' man nim ta xquil wi ri tijonic ri xinya' chque.

²⁰ ¿Jasche quebic'am ulok c'oc' k'ol re Saba chwe xukuje' c'oc'alaj tak k'ayes quepe pa naj tak ulew? Ri in man quekaj ta ri e i tabal tok'ob chnuwäch ri cächajirisaxic mawi ri niq'uiaj e i tabal tak tok'ob chic.”

²¹ Rumal ri', ri Ajawaxel cubij: “Quenbana' chi cuchak'ij rib we tinimit ri' cätzak c'ut. Tataxelab xukuje' c'ojolaxelab, c'ulja tak xukuje' ri e utz tak cuc', xukuje' ri e are' quecäm na'.”

Pa ri riquiak'ab ri elebal k'ij cäpe wi ri qui ch'äctajic

²² Ri Ajawaxel cubij: “Kas pa naj tak ulew re ri riquiak'ab ri elebal k'ij cusuc'umaj rib ri u petic jun nim tinimit ri c'o u cuinem.

²³ E cuc'am tak qui q'uiakbal ch'ab xukuje' tak qui tz'imaj ch'ich'; man quetok'obisan ta wächaj; ri qui rakoj tak chi'aj e junam ruc' ri u wululem ri plo, e quiejeninak c'u chquij quiej. E suc'umatal che u banic ch'o'j ruc' ri Sion.”

²⁴ Ri winak pa Jerusalen caquibij: “Ka tom ri tzijol, uj u tuktubisam c'ut ri xe'n ib; cakana' ri elemch'u'j xukuje' ri k'oxomal, jacha' jun ixok ri cac'oji' ral.

²⁵ ¡Mixbe pa ri juyub, mixbe pa tak ri be! ¡Ri c'ulel e ruc'am tak ri e u ch'ojibal; C'o nimalaj xibin ib pa conojel tak ri c'olbal!”

²⁶ ¡Nu tinimit, chebacojo' wakwoj tak atz'iak che u c'utic ri k'oxomal; chawolkotij awib pa chaj, chacojo' k'ek awatz'iak chatok'ok ruc' c'ayil, jacha' ri cabanic aretak cäcäm ri xa jun chi c'ojolaxel; rumal rech chi ri quelsachow ka wäch man cäbeytaj taj ri u petic che u banic c'ax chke!

²⁷ Ri Ajawaxel xubij chwe: “Chabana' tok'ob chac'ambejej ri nu tinimit. Chanic'oj, che rilic jas ri u c'aslemal ri ruc'am.”

²⁸ Conojel e are', Ajawaxel, sibalaj man ch'abexic ta cäcaj; e winak e tzelel tak tzij e jech'obinak; xa' e k'an ch'ich' xukuje' e räx ch'ich'.

²⁹ Aretak ri ch'ayal ch'ich' co cuxut'ij ri k'ak' cubano chi ri k'ak' cujarisaj ri räxmamaj ch'ich'. Man c'o ta cubij chi quecolomax taj ri e are', man casach ta c'u qui wäch ri e banal tak etzelal.

³⁰ “E retzelal sak puak” quebuchix c'u na, rumal rech chi ri lal, Ajawaxel, e xutum la.