Ri Jeremiy 51 - Quiché Bible

U sachisaxic u wäch ri Babilon

¹ Ri Ajawaxel je cubij wa': “Quintak na ulok jun quiakik' cämisanel che u banic c'ax che ri Babilon xukuje' chque ri aj caldeyib.

² Quinban na chi ri e qui c'ulel je chiquibana' che ri Babilon jacha' ri caban che trico ri cäq'uiak pa ri quiakik'; quinban c'u na chi man c'o ta qui winakil quecanaj ta can chupam ri culew. Aretak chopan ri k'ij re nimalaj c'axc'ol, pa ronojel c'olbal quebel wi na ulok winak chrij che u banic ch'o'j ruc'.

³ ¡Ri e ajq'uiakal tak ch'ab chequisuc'umala' ri qui q'uiakbal tak qui ch'ab! ¡Che be quicojo' ri to'bal tak uwo c'uxaj! ¡Mebitok'obisaj tak qui wäch ri c'ojolab aj Babilon; chebisachisaj qui wäch conojel tak ri e cajch'ojab!

⁴ Pa ronojel ri culew ri aj caldeyib ri winak queliq'ui' na can xo'l tak ri ja pa ri tinimit,

⁵ pune' ba' ri Israel xukuje' ri Juda e macuninak chnuwäch qui nojisam c'u ri culew che macaj, in, ri Ajawaxel, ri c'o ronojel u cuinem, ri Tastalicalaj u Dios ri Israel, c'ä maja' queben wonoba' ta canok.

⁶ ¡Chixanimajok chixel bic pa Babilon! ¡Cato'tajisaj rib jachin ri cäcuinic! ¡Mixcäm rumal ri u mac ri are'! Are k'ijol wa' rech ri nu yo'w q'uexelal, quintoj c'u na che jacha' ri takal che.

⁷ Ri Babilon are jun kumubal re k'an puak pa nu k'ab ri cuk'abarisaj ronojel ri uwächulew. Ri nimak tak tinimit cäcuq'uiaj quech we u wa'l uva ri' ri quesach c'u rumal.

⁸ Xak c'ätetal c'ut xtzak ri Babilon xuban c'u ch'akatak. ¡Chiwok'ej c'u u wäch! Chebic'ama' ulok tak cunabal chque tak ri e u socotajic, che rilic we cacunatajic.”

⁹ E kacojom chi tak cunabal che ri Babilon, man c'u xcunataj taj. ¡Chiya' canok! Chujel bic waral, chijujunal jix pa ri i tinimit, ri il c'ut ri u banom copan c'ä chicaj, cawalijic copan c'ä pa tak ri sutz'.

¹⁰ Ri Ajawaxel xuban suq'uilal pakawi'. Tisaj, jo' che u tzijoxic pa Sion ri u banom ri Ajawaxel ri ka Dios.

¹¹ Ri Ajawaxel are caraj cusachisaj u wäch ri Babilon, u c'asum c'u pa qui jolom tak ri ajawinelab re Med we junam chomanic ri'. Are c'u rajil c'axelal wa' cuya' ri Ajawaxel u mac rech ri xquiban che ri rachoch. ¡Chebisuc'umaj tak ri ch'ab! ¡Chebiwuc'aj tak ri i quetecak tak i ch'ich'!

¹² ¡Chiya' ri etal che qui t'akixic tak ri nimak tak u tapia ri Babilon! ¡Chebicojo' chi niq'uiaj to'l quech ri chajinelab! ¡Chebicojo' chi tak yuxlenelab! ¡Chebicojo' xukuje' ajch'ojab ri cäquic'u' quib! Rumal rech chi ri Ajawaxel xusuc'umaj xutz'akatisaj c'u qui banic tak ri chomanic ri u yo'm qui bixic che u banic c'ax chque ri aj Babilon.

¹³ At, Babilon, ri at c'o chquichi' nimak tak nima' e c'o c'u nimak tak a k'inomal, ¡opaninak ba' ri q'uisbal u wäch a k'ij, ri u q'uisbalil ri a c'aslemal!

¹⁴ Ri Ajawaxel ri c'o ronojel u cuinem cuban ri chi'nic ri kas cäban na rumal ri u c'aslemal: “¡Catinnojisaj chque tak a c'ulel, e jacha' ta ne sac', ri e are' caquibixoj na ch'äcanic pawi'!”

Bix che u ya'ic u k'ij ri Dios

¹⁵ Ri Ajawaxel ruc' ri u cuinem, xuban ri ulew; ruc' ri u no'j xutiq'uiba' ri uwächulew ruc' ri retamanic xulic' ri caj.

¹⁶ Ruc' ch'abal re cakulja cubano chi cayojoj ri ja' pa ri caj, cubano chi cäpaki' ri sutz' kas chutza'm ri ulew, cubano chi querepelaj ri caypa' pa u niq'uiajil ri jäb curesaj c'u ulok ri quiakik' jawije' ri u c'u'm wi.

¹⁷ Man c'o ta u no'j xukuje' man c'o ta retamanic ronojel winak. Ri quebanow diosib quekaj na pa q'uixbal: e subunelab tak wächbalil ri man c'o ta qui c'aslemal;

¹⁸ e jastak ri man c'o ta jubik' qui patan, tze'bal qui wäch, chi ri Ajawaxel Dios, pa ri k'atan tzij cuchupisaj na qui wäch.

¹⁹ ¡Sibalaj ba' nim u jalbem rib ri u Dios ri Jacob, banal re ronojel ri c'olic! Ri are' xucha' ri Israel rech cacanaj pa u k'ab. Ri Ajawaxel ri c'o ronojel u cuinem: are u bi' wa'.

Ri Babilon, chaconisan re c'äjisabal wächaj pa u k'ab ri Ajawaxel

²⁰ “¡Babilon, at ri' ri nu wi't, ri catincoj che u banic ri ch'o'j! Catinwachilaj che qui c'äjixic ri nimak tak tinimit xukuje' che qui yojixic tak ajawibal.

²¹ Catinwachilaj che qui k'ajisaxic tak ri quiej xukuje' tak ri ajquiejab, carwaj xukuje' ri e u c'al tak quech.

²² Catinwachilaj che qui c'äjixic tak achijab xukuje' ixokib, nimak tak winak xukuje' niq'uiaj tak winak, alabom xukuje' alitomab.

²³ Catinwachilaj che qui c'äjixic tak ajyuk'ab xukuje' tak ri jumulaj, tajinelab xukuje' tak ri wacax ri quetajinic, takanelab xukuje' ri k'atal tak tzij.”

U c'äjisaxic u wäch ri Babilon

²⁴ “Chquiwäch c'ut ri kas e i bak'wäch ix, quinya' na ri rajil u q'uexelal che ri Babilon xukuje' chque conojel ri aj caldeyib jacha' ri takal chque, rumal ri c'ax ri xquiban che ri Sion. In, ri Ajawaxel quinjiquiba' u bixic.

²⁵ In in c'o che u banic c'ax chawe, c'ächelaj yojinel, ri cayojij ronojel ri uwächulew. In, ri Ajawaxel, quinjiquiba' u bixic. Quinwalijisaj na ri nu k'ab che u c'äjisaxic a wäch, catinwolkotij na bic chquixo'l tak ri juyub quinban c'u na chawe chi catux jun c'atinak juyub.

²⁶ Mawi jun chque ri abaj quech ri awetzeletajic quebajwataj ta na che qui yaquic tak ja. Catux na jun chaki'j uwo sak amak'el. In, ri Ajawaxel, quinjiquiba' u bixic.

²⁷ ¡Chyok pa ri ulew ri etal re ch'o'j! ¡Chiwok'esaj ri trompet chebisuc'umaj c'ut ri nimak tak tinimit che u banic ch'o'j ruc' ri Babilon! ¡Chebiwalijisaj chrij are' ri e Ajawibal re Ararat che u banic c'ax che, ri Min xukuje' ri Askenaz! ¡Chiya' rekle'n jun qui nimal ajch'ojab rech cuc'am u be ri ch'o'j! ¡Chebinabejisaj ri ajquiejab ri e jacha' sac' ri e c'anarinak!

²⁸ Chebisuc'umaj ri nimak tak tinimit che u banic ch'o'j ruc'; chebisuc'umaj tak ri ajawinelab re Med, xukuje' tak ri e u takanelab xukuje' ri k'atal tak tzij, xukuje' ronojel ri ulew ri quetakan wi.”

²⁹ Cäyicop ri ulew xukuje' cabirbibic, rumal rech chi ri Ajawaxel cätajin cutz'akatisaj ri u chomam u banic chi cujalwächij ri Babilon pa jun xibibalalaj chaki'j uwo sak.

³⁰ Ri ajch'ojab aj Babilon xek'itaj che u tijic qui chuk'ab, xecanaj chupam ri to'bal tak quib; xechukchub ri qui chuk'ab je ta chi c'u ne ri quepe ixokib. Ri qui tinimit tak xemajilaxic ri cachoch tak xeporoxic.

³¹ Quexiq'uinilob tak ri ya'l tak tzijol che u ya'ic u bixic che ri ajawinel re Babilon chi ri u tinimit tak ch'äcatajinak ronojel.

³² Ri c'ulel xebulatz'obej tak ri caban wi oc'owem pa tak ri nima', xebuporoj tak ri c'olbal re to'bal tak ib ri ajch'ojab xenoj che xibriquil.

³³ Rumal rech chi ri Ajawaxel ri c'o ronojel u cuinem, ri u Dios ri Israel, je cubij wa': “¡Ri Babilon jacha' jun yak'abal ri xak'alem pa ri k'ijol re ri yak'oj, sibalaj c'u chanim copan na ri k'ijol che, che u yaquic ri u wäch ri xutico!”

^34-35 Jewa' cubij ri Jerusalen, ri tinimit re Sion: “Ri Nabucodonosor, ri ajawinel re Babilon, xuban xerexak chwe xinubik' c'ut; xinuya' canok jacha' jun lak ri tolonic. Jacha' jun jilijic awaj aj plo xinubik'o; xunojisaj rib ruc' ri sibalaj xkaj na chuwäch ri c'o wuc', are c'u ri xto'tajic xuq'uiak canok. ¡Chutojo' ri Babilon ri tokinic ri xuban chwe! ¡Chequitojo' ri aj caldeyib ri e nu winak ri xebucämisaj!”

Chi'nic che ri Israel

³⁶ Ri Ajawaxel je cubij wa': “In quenbana' ri suq'uilal chawe, quenya' rajil u q'uexelal chque ri e a c'ulel. Kas quebentzajirisaj tak na ri nima' xukuje' ri e qui q'uiyibal tak ja' ri e c'o pa Babilon,

³⁷ cäjalwächitaj c'u na pa jumulaj etzeletajic, pa qui jekelibal ch'ich'alaj tak chicop, pa jun c'olbal ri man cuya' ta chic c'o ta jachin cajeki' chupam cuya' c'u na xe'n ib chque conojel xukuje' xibibal ib.

³⁸ Conojel e are' quewun na e jacha' ri coj quequijisila' c'u na tak quib e jacha' alaj tak coj.

³⁹ Aretak quek'ak'ar rumal ri k'ak', in quinya' na cuq'uia' uq'uia' tak ri quebuk'abarisaj cuban c'u chque chi quesach rumal. Are c'u qui kajic wa' che jun junalic waram ri man quec'astaj ta chi na rumal. In, ri Ajawaxel, quinjiquiba' u bixic.

⁴⁰ Quebenc'am na bic pa ri pilibal, jacha' ri cäban chque ri alaj tak ama'ib tak chij, ama'ib tak q'uisic', xukuje' ama'ib tak chij.”

Ri u tzakic ri Babilon

⁴¹ ¡Ri Babilon, ri tinimit ri nim na u k'ij pa ronojel ri uwächulew, tzakinak ch'äcatajinak! ¡Nimalaj c'u caquixibij quib ri nimak tak tinimit aretak cäquil u wäch!

⁴² Ri plo xubik' ri Babilon, xuch'uk cuc' ri nimak tak u rekbala'.

⁴³ Ri u tinimit tak quejalwächitaj na pa xibibalalaj tak chaki'j uwo sak pa chaki'j ulew ri tolobam, ri man c'o ta jachin jun cajeki' ta chi chila', ri man c'o ta jachin jun coc'ow ta chi chila'.

⁴⁴ “Quinc'äjisaj na u wäch ri dios Bel pa Babilon, quinban che chi cuxawaj ri u bik'om, man catzucux ta chi c'u na cumal ri nimak tak tinimit. ¡Xetzak tak ri e u nimak tak u tapia ri Babilon!

⁴⁵ ¡Nu tinimit chixel ulok chila', chijujunal c'ut chito'tajisaj ri i c'aslemal rech man cäkaj ta ri woyowal piwi!

⁴⁶ Mi xibij iwib, mixe'j iwib cumal ri tzijol ri caxiq'uin pa ri ulew. Chujunab quexiq'uin jalan tak tzijol, tzijol tak re tokinic pa ri ulew xukuje' re tijoj tak chuk'ab chquixo'l tak ri takanelab.

⁴⁷ Je c'u ri', cäpe na ri k'ij aretak chinc'äjisaj qui wäch tak ri diosib ri e c'o pa Babilon. Ronojel ri ulew cämach'irisax canok queliq'ue can conojel tak ri cäminakib.

⁴⁸ Ri caj ri ulew xukuje' ronojel ri c'olic quejajat na aretak cätzak ri Babilon, aretak chepe pa ri riquiak'ab ri elebal k'ij ri e sachal tak u wäch. In, ri Ajawaxel, quinjiquiba' u bixic.

⁴⁹ Je, ri Babilon kas catzak wi na rumal rech ri cämisanic ri xuban che ri Israel xukuje' cumal quech ri cämisanic ri xeban pa ronojel ri uwächulew.”

Tzijol chque ri aj judeyib ri e c'o pa Babilon

⁵⁰ Ix, ri xixto'tajic ri man xixcämisax taj, chixanimajok man quixtaq'ui' taj, pune' c'u ne naj ri ix c'o wi' mäsach ri Ajawaxel pa i jolom chnataj c'u ri Jerusalen chiwe.

⁵¹ Ri ix quixcha': “Cakana' q'uixbal aretak cäkata' ri cäban che ka yok'ic. Ri ka q'uixbal ri elinak cuch'uk ri ka palaj, rumal rech chi winak ri naj quepe wi e oquinak chquipam tak ri c'olbal ri sibalaj e tastalic ri c'o chupam ri rachoch Dios.”

⁵² Are c'u ri Ajawaxel cujiquiba' u bixic: “Cäpe na ri k'ij aretak chinc'äjisaj qui wäch tak ri diosib ri e c'o pa Babilon, pa ronojel c'ut ri rulewal quech'ikow na ri e socotajinak.

⁵³ Ri Babilon pune' cäpaki' c'ä cho ri caj che u cojic ri to'bal rib sibalaj chicaj xukuje' chila' quebentak wi bic tak ri c'ulel che u sachisaxic u wäch. In, ri Ajawaxel, quinjiquiba' u bixic.”

U sachisaxic u wäch ri Babilon

⁵⁴ Kas pa Babilon quel wi ulok rakoj tak chi'aj re k'oxomal, kas pa ri culew ri aj caldeyib quebel wi ulok jun nimalaj tininem.

⁵⁵ Are' ri Ajawaxel, ri cusach u wäch ri Babilon cuq'uis c'u u tza'm ri yojcorem ri cubano. Ri e c'ulel tak, e jacha' rekbala' ri quewolkotic, quekaj na puwi' ruc' nimalaj pujujem.

⁵⁶ Xepe che u sachisaxic u wäch ri Babilon; xekaj tak ri cajch'ojab pa qui k'ab xequiban c'u ch'akatak chque tak ri e qui q'uiakbal tak qui ch'ab. Rumal rech chi ri Ajawaxel are' jun Dios ri cuya' chque chquijujunal ri takal chque.

⁵⁷ Ri Ajawinel, ri Ajawaxel ri c'o ronojel u cuinem cujiquiba' u bixic: “Quebenk'abarisaj na ri e c'amal tak u be ri Babilon, xukuje' ri e rajno'jab tak, ri e u takanelab, ri e u k'atal tak tzij, xukuje' tak ri rajch'ojab, quekaj na pa jun waram junalic ri man quec'astaj ta chi wi na.

⁵⁸ In, ri Ajawaxel ri c'o ronojel nu cuinem, quincha': Ri e nimak tak u tapia ri Babilon ri nimak qui wäch quet'akix na c'ä chuxe', xukuje' ri e nimak tak uchi'ja queporox na. Xaklok' e chacuninak ri nimak tak tinimit, are c'ut ri e qui tijoj tak chuk'ab ri e qui banom cäsach na qui wäch chupam ri k'ak'.”

Cäc'am bic pa Babilon ri tzijol ri cuya' ri Jeremiy

⁵⁹ Chupam ri ucaj junab ri rajawinic ri Sedequiy, ajawinel re Juda, ri Jeremiy ri k'axal tzij xuya' jun takquil che ri Seraiy, u c'ojol ri Neriy ri' u mam c'ut ri Maasiy. Ri Seraiy terenel rech ri ajawinel Sedequiy pa ri u bic pa Babilon, are c'u cäsuc'uman ri carokxanij wi rib ri ajawinel.

⁶⁰ Ri Jeremiy u tz'ibam pa jun wuj ronojel ri etzelal ri cäpe na puwi' ri Babilon ri u bixic, ronojel ri tz'ibatalic che ri cuc'ulmaj na,

⁶¹ xubij c'u che ri Seraiy: “Aretak chatopan pa Babilon, chatoc il che u ya'ic u siq'uibal ronojel we tzijol ri'.

⁶² Cabij c'ut: ‘Ajawaxel, lal yo'm la u bixic chi casachisaj na la u wäch we c'olbal ri', jeri' chi man c'o ta chi jun cajeki' ta chi na waral, mawi achijab mawi awaj, caq'uexwächitaj c'ut pa jun chaki'jalaj uwo sak amakel.’

⁶³ Aretak casiq'uitaj u wäch we wuj ri' awumal, chaxima' jun abaj che chaq'uiaka' c'u chupam ri nima' Euprats,

⁶⁴ chabij c'ut: ‘Je' wa' ri u bik'tajic ri Babilon, man cawalij ta chi c'u chupam ri etzelal ri cutak na ulok ri Ajawaxel puwi'.’ ” Waral queq'uiswi tak ri e u tzij ri Jeremiy.