Ri Jeremiy 50 - Quiché Bible

Ri u tzakic ri Babilon

¹ Cäya' u bixic ri cuc'ulmaj na ri Babilon, culew ri aj caldeyib, ri xuya' u bixic ri Ajawaxel rumal ri Jeremiy, ri k'axal tzij:

² “Chiya' retamaxic wa', chiya' retamaxic chquixo'l ri nimak tak tinimit. Chiwalijisaj ri etal re u ya'ic tzijol; c'o mic'u' canok. Chibij: ‘¡Ri Babilon xch'äcatajic! ¡Ri dios Bel xcanaj pa q'uixbal, ri dios Marduc xch'äcatajic! ¡Ri e u diosib ri xa' e subunelab tak diosib, xecanaj pa q'uixbal xech'äctajic!’

³ Rumal rech chi pa ri riquiak'ab elebal k'ij petinak jun nim tinimit chrij che u banic c'ax che ri cuq'uex na ri rulew pa jun chaki'j uwo sak. Man c'o ta jun, cajeki' ta chi na chila' mawi winak mawi awaj, conojel c'ut quebanimaj tak bic.”

Ri qui tzelejic tak ri aj israelib

⁴ Ri Ajawaxel je cubij wa': “Pa ri k'ijol ri', ri winak aj israelib xukuje' ri e aj Juda quebok'ic quepe na che nu tzucuxic in, ri Ajawaxel ri qui Dios.

⁵ Caquitatabela' na jachique ri be ri cäbe pa Sion, quebe c'u na che ri u suq'uil, je c'u cäquibij wa': ‘Jo' ba' ruc' ri Ajawaxel, ka junaj c'u kib ruc' pa jun junalic c'ulwächinic, ri mawi cäsach ta u tza'm.’

⁶ Ri nu tinimit e jacha' can tak ri chij ri e sachinak, ri jech'obisam ri qui be cumal tak ri e cajyuk'ab, ri xquiya' c'olbal chque xesach pa tak ri juyub. Quebel pa jun juyub quebe chi pa jun juyub, c'ä xsach na ri qui warabal pa qui jolom.

⁷ Aretak queriktaj cumal ri qui banom qui c'ulel chque caquibij c'ut: ‘Man ka mac taj, rumal rech chi ri e are' xemacun chuwäch ri Ajawaxel, ri jicalaj tzukul quech, ri queyebal c'u'x ri e qui mam.’

⁸ ¡Chixanimajok chiya' can ri Babilon ri culew ri aj caldeyib! ¡Chixux jacha' c'amal tak be chixnabej chuwäch ri jumulaj!

⁹ Quenbana' c'ut chi jumulaj tinimit ri sibalaj c'o qui chuk'ab aj riquiak'ab elebal k'ij junam queboc che u banic ch'o'j chrij ri Babilon. Caquicholajij quib caquich'äc c'u na. E banal tak ch'o'j ri sibalaj c'o qui nawinic, ri quequiq'uiakala' tak ri ch'ab quetaki c'u chque ri quequiq'uiak wi.

¹⁰ Quequitoloba' na canok ri aj caldeyib caquitakej qui tolobaxic c'ä quenoj na. In, ri Ajawaxel, quinjiquiba' u bixic.”

Ri u tzakic ri Babilon

¹¹ “Ix, aj caldeyib, ri xitoloba' ri nu tinimit, ¡chixjajatok xukuje' chi quicotisaj iwib! ¡Chixch'opinok jacha' jun alaj ati't wacax chupam ri k'ayes! ¡Chixjijetok jacha' ta ne ix quiej!

¹² Are c'u ri iwulew xukuje' ri kas i tinimit canoj na canok che q'uixbal. Are q'uisbal wa' chque ri nimak tak tinimit, cux jun chaki'j uwo sak ri tolonic.

¹³ Cäpe c'u na ri woyowal man c'o ta c'u winak quinya' ta can chupam, kas cux c'u na jun chaki'jalaj uwo sak. Ronojel ri coc'ow chila' cacanaj ruc' xibin ib aretak cäril ri c'äjisabal wächaj ri xkaj puwi'.

¹⁴ ¡Chixk'ax pa tak ri i c'olbal, ajq'uiakal tak ch'ab, chi sutij rij ri Babilon! ¡Chebiq'uiaka' conojel tak ri e i ch'ab puwi', rumal rech chi xmacun chnuwäch, chuwäch ri Ajawaxel!

¹⁵ ¡Chebiya' rakoj tak chi'aj re ch'o'j pa ronojel c'olbal! ¡Ri Babilon cujach rib! ¡Xetzak tak ri e u tac'atak tak ja, xewilij tak ri nimak tak tapia! ¡Are rajil c'axelal quinya'o: chiya' rajil c'axelal che! ¡Chibana' che junam jas ri xuban ri are'!

¹⁶ Man c'o ta jun quiya' ta can pa Babilon ri caticonijic o cuyac ta u wäch ri cätiquic. Ri man e u winakil taj aretak caquil ri ch'o'j ri casachisan wächaj quetzelej tak na chupam ri qui tinimit, chquijujunal quebanimajic quebe pa ri culew.”

Ri u tzelejic ri Israel

¹⁷ “Ri Israel xak junam ruc' jun chij ri sachinak, ri okatatal cumal coj. Nabe xtijow rumal ri ajawinel re Asiriy; are' chiwi chi c'u wa' ri Nabucodonosor, ajawinel re Babilon, xebuwak' tak ri u bakil.

¹⁸ Rumal ri' in, ri Ajawaxel ri c'o ronojel u cuinem, ri u Dios ri Israel, quincha': Quinc'äjisaj na u wäch ri ajawinel re Babilon xukuje' ri rulew, jacha' ri xinban che ri ajawinel re Asiriy.

¹⁹ Quinban c'u na chi ri Israel cätzelej chupam ri rulew, jacha' c'ut jun chij quec'oji' na q'ui recha' pa ri Carmel, pa Basan, chupam ri c'achelajalaj rulew ri Eprain xukuje' pa Galaad.

²⁰ In, ri Ajawaxel, quinjiquiba' u bixic: Pa ri k'ijol ri', ri Israel xukuje' ri Juda man e c'o ta chic chak'maquil chquij, xukuje' macaj, rumal rech chi quinsach na qui mac ri quebenc'asba' canok.”

Ri u ch'äctajic ri Babilon

²¹ “¡Chixch'ojin ruc' ri rulew ri Merataim xukuje' ri e aj Pecod! ¡Chebiterenej, chebisachisaj qui wäch conojel! ¡Chebitz'akatisaj qui banic ri e nu takanic pa ronojel! In, ri Ajawaxel, quinya' takanic.”

²² Chupam ri ulew cätataj u tininem tijoj chuk'ab, re nimalaj yojinic.

²³ ¡Ri Babilon, ri bajibal che ronojel ri uwächulew, paxtajinak, u banom ch'akatak! ¡Nimalaj xibibal caquina' ri nimak tak tinimit aretak caquilo jas ri u c'ulmam ri Babilon!

²⁴ Ri at chabil awib, Babilon xalic' jun c'amibal chawäch, man c'u xanabej taj xatkaj chupam. Xatchaptajic xatkaj chupam, rumal rech chi xac'ulelaj ri Ajawaxel.

²⁵ Ri Ajawaxel xujak ri c'olbal ri e c'o wi tak ri e u ch'ojibal xeresaj c'u ulok tak ri e u ch'ojibal ri royowal, rumal rech chi ri Ajawaxel ri c'o ronojel u cuinem c'o jun chac chuwäch ri cuq'uis na u banic chupam ri nim tinimit ri aj caldeyib.

²⁶ ¡Chixch'ojin ruc' pa conojel c'olbal! ¡Chebijaka' tak ri e u c'uja! ¡Chibana jumulaj etzeletajic chque tak ri winak chisachisaj c'u qui wäch! ¡C'o c'u jun mäc'asi canok!

²⁷ ¡Chebicämisaj conojel tak ri e rajch'ojab, chixtakan che qui c'amic bic pa ri cämisabal! ¡Tok'ob qui wäch! ¡Xopan ba' ri qui k'ij, ri k'ijol re ri u c'äjisaxic qui wäch!

²⁸ (Winak ri xebanimaj ulok pa Babilon xebopan pa Sion caquitzijoj tak ri xuban ri Ajawaxel ri ka Dios chi u yo'm ri rajil u q'uexelal che ri Babilon rumal ri xuban are' che retzelaxic ri rachoch Dios.)

²⁹ “¡Chebisiq'uij tak conojel ri e ajq'uiakal tak ch'ab rech quech'ojin ruc' ri Babilon! ¡Chisutij rij ri tinimit rech man c'o ta jun canimajic! ¡Chiya' rajil u q'uexel che jacha' ri takal che! ¡Junam chi bana' che jacha' ri xuban ri are'! Amak'el c'ut u walijisam rib chwij, chrij ri Ajawaxel, ri Tastalicalaj u Dios ri Israel.

³⁰ Rumal rech wa' ri e qui c'ojolab quecäm na xo'l tak ri ja conojel c'ut ri cajch'ojab quecäm na pa tak ri k'ij ri'. In, ri Ajawaxel, quinjiquiba' u bixic.”

³¹ Ri Ajawaxel ri c'o ronojel u cuinem je cubij wa: “Nim tinimit walijisal rib, in in c'o che a c'ulelaxic; opaninak ba' ri a k'ij ri k'ijol che u c'äjisaxic ri a wäch.

³² Nim tinimit walijisal rib, capak'ij c'u na awib cattzak c'u na, man c'o ta chi c'u jachin ta ri catwalijisanic. Quebent'ika' k'ak' chque conojel tak ri a tinimit, are c'u we k'ak' ri' cusachisaj na qui wäch conojel ri e c'o chanakaj.”

³³ Ri Ajawaxel ri c'o ronojel u cuinem je cubij wa: “Ri tinimit Israel xukuje' ri tinimit Juda cätajin caquicoch' ri c'axc'olil. E cojom pa che' cumal tak ri qui c'ulel man cacaj ta c'ut quequitzokopij.

³⁴ Are c'ut ri torol quech c'o u chuk'ab ri u bi' are' ri Ajawaxel ri c'o ronojel u cuinem. Are' cabanow na ri suq'uilal piwi'; cuc'am na ulok ri jamaril che ri ulew xibriquil c'ut chque ri winak ri e c'o pa Babilon.”

³⁵ Ri Ajawaxel je cubij wa': “¡Ch'o'j che ri Babilon xukuje' chque ri e u winak! ¡Chque ri c'amal tak qui be xukuje' chque ri cajno'jab!

³⁶ ¡Ch'o'j chque ri cajch'obonelab: chi chebux ch'ujab!

³⁷ ¡Ch'o'j chque tak ri cajch'ojab; ri quebirbit che xe'n ib! ¡Ch'o'j chque tak ri e qui quiej xukuje' chque tak ri e qui carwaj! ¡Ch'o'j chque tak ri e cajch'ojab ri xa' e qui mocom: chebux e jacha' ta ne xa' e ixokib! ¡Ch'o'j chque tak ri e qui k'inomal: chi chebeläk'axok!

³⁸ ¡Ch'o'j chque tak ri e qui nima': chi chetz'ajok! U mac rech chi ri Babilon are jun ulew ri e c'o wi xibal tak diosib, rumal c'u quech wa' xeconiric.

³⁹ Rumal ri' pa Babilon cäcan wi na qui soc ri juyubal tak me's xukuje' tak ri e utiw, chila' quejeki' wi na tak ri tucur. Mawi jumul pa tak ri k'ij junab ri quepe ta chi na winak quejeki' ta chi na chupam.

⁴⁰ Je cäcanajic jacha' ri Sodom xukuje' ri Gomor xukuje' ri e c'ulja tak tinimit, aretak xsachisax qui wäch. Man c'o ta chi jachin jun cajeki' ta chi na chila', mawi xa' ta ne re quieb oxib k'ij. In, ri Ajawaxel, quinjiquiba' u bixic.

⁴¹ Kas pa najatak ulew pa ri riquiak'ab relebal k'ij, jun nim tinimit ri sibalaj c'o u chuk'ab xukuje' tinimit ajawinelab caquisuc'umaj quib che qui petic.

⁴² E cuc'am tak qui q'uiakbal ch'ab xukuje' tak qui tz'imaj tak ch'ich'; man c'o ta tok'obisam wächaj cuc' mawi elebal c'uxaj, ri qui rakoj tak chi'aj e jacha' ri u wululem ri plo, e quiejeninak chquij tak quiej. Xäk e c'o che u banic ri ch'o'j ruc' ri Babilon.

⁴³ Ri ajawinel re Babilon, aretak xretamaj we tzijol ri', xetuktub ri rakan u k'ab rumal xe'n ib, cuna' c'u c'axc'obic xukuje' k'oxomal jacha' ri yawab ixok.

⁴⁴ Xak c'ätetal quinpetic jacha' jun coj ri quel ulok chquipam tak ri patzapak tak k'ayes ri c'o chuchi' ri Jordan cuq'uiak c'u rib chquipam tak ri c'olbal ri e c'o wi echa' ri amak'el quetojtatic, quinban c'u na chi quebanimaj bic ri aj Babilon chi' quinban c'u na chi cajawin ri winak ri quincha'. ¿Jachin ta lo ri cacuinic cujunamaj ta rib wuc'? ¿Jachin ta ri yuk'unel ri cäcuin ta che u k'atixic nu wäch?

⁴⁵ Chitatabej ri nu chomanic ri in, ri Ajawaxel, ri nu suc'umam ri cuc'ulmaj na ri Babilon; ri quintakej na u banic, che u banic c'ax che ri culew ri aj caldeyib: Xukuje' ne ri alaj tak ama'ib chij ri c'ä e ch'utik na quequic'am na bic, kas e are tak c'ut ri yuk'bal queban can c'ax chque.

⁴⁶ Ri u tzakic ri Babilon sibalaj c'o na ri rok'ibal ri cubano, chi cäslab na ri ulew cumal, ri e u rakoj tak chi'aj quetataj na pa ri jule' nimak tak tinimit chic.”