Ri Jeremiy 5 - Quiché Bible

Ri u mac ri Jerusalen

¹ Ri Ajawaxel je cubij wa': “Chebibinibej ri e u xo'l tak ja re ri Jerusalen, kas chixcayilob, chixtzucun pa tak ri c'ayibal, che rilic we quiriko jachin jun ri cuchacuj ta ri suq'uilal, ri caraj cux aj kas jic ranima'. We quiriko quinsach na u mac ri Jerusalen.

² E c'o jachin tak quequiban ri chi'nic ri kas cäban na rumal ri u c'aslemal ri Ajawaxel, xak c'u lok' quequiban ri chi'nic ri kas cäban na.”

³ Ajawaxel, ri catzucuj la are ri winak ri jic ranima'. Xc'äjisaj la qui wäch man c'ax ta c'ut xquina'; xebeyojyobisaj la man xcaj ta c'ut xquesaj ta qui no'j. E täc, e co c'u na chuwäch ri abaj, man xcaj taj xetzelej chupam ri utzalaj be.

⁴ In xinchomaj: chi xuwi ri mebayib caquic'ut quib chi e con, man queta'm ta c'ut ri caraj ri Ajawaxel, ri cätakan wi ri qui Dios.

⁵ Xinbe cuc' ri winak ri nimak qui banic queben ch'abej c'u na. Ri e are', man c'o ta queblan c'uxaj, queta'm ri caraj ri Ajawaxel. Conojel c'ut quiwalijisam quib chrij ri Dios, qui k'ilom quib che u nimaxic.

⁶ Rumal c'u ri' quebel ulok coj pa ri c'ache'laj quecämisax c'u na cumal, ri utiw ri e c'o chupam ri chaki'j uwo sak quemuchuw na, ri balam quebequimajij na chquinakaj tak ri qui tinimit quech'akatix c'u na cumal aretak quebel ulok; rumal rech chi sibalaj e q'ui ri macaj ri e qui banom, xukuje' chi sibalaj man e nimanelab taj.

⁷ Ri Ajawaxel je cubij wa': “¿Jas ta che quensacha' a mac che ronojel wa'? Ri e awalc'ual in qui tzakom canok, cäquiban c'ut ri chi'nic ri kas cäban na pa qui bi' ri diosib ri man c'o ta qui cuinem. Xintz'ebej ri caquitijo man c'u jic taj xebin chnuwäch pa tak mulaj c'ut xquijach quib che u banic ri mac tak ri nim ch'utin.

⁸ E junam cuc' tak ri quiej ri quechokchotic, quewitz'itz' chquij ri quixokil ri cajil qui tz'akat.

⁹ ¿La ma ta c'u lo chinc'äjisaj qui wäch cumal tak we jastak ri'? ¿La ma ta quinya' na ri takal che ri tinimit ri je cuban wa'?

¹⁰ ¡Queboc c'u na ri e qui c'ulel quequisachisaj c'u qui wäch ri e ticbal tak uva, pune' c'u ronojel caquisachisaj u wäch! ¡Chequijak'ij tak ri qui k'ab man c'u ticbal ta chic nu uva!

¹¹ ¡Ri Israel xukuje' ri Juda man e jic ta chwij! In, ri Ajawaxel, quinjiquiba' u bixic.”

Cäya' u bixic ri c'äjisabal wächaj

¹² Ri Israel xukuje' ri Juda qui xutum ri Ajawaxel; quibim: “Man c'o ta cuban ri Dios. Man c'o ta lawaloyil quekataklebej, man cäpe ta ch'o'j pakawi' mawi wi'jal.”

^13-14 Ri e k'axal tzij xak e quiakik', are c'u ri u tzij ri Ajawaxel man c'o ta cuc'. Je ba' wa', are' wa' ri u bim ri Ajawaxel chwe, ri c'o ronojel u cuinem: “Rumal c'u rech chi e quibim tak we jastak ri', e are wa' ri quequic'ulmaj na: Quenbana' chi ri e nu tzij quebux jacha' ri k'ak' pa a chi', are c'u ri tinimit quebux jacha' ri si', are c'u we k'ak' ri' cabik'owic.”

¹⁵ Ri Ajawaxel cujiquiba' u bixic: “Israel, quinc'am na ulok jun tinimit chawij re naj ri cäpe wi, jun cowilaj tinimit ri sibalaj re ojer. Ri at man aweta'm taj ri u ch'abal mawi cach'ob ri caquibij.

¹⁶ Conojel e are' e cowilaj tak ajch'ojab, ri e qui ch'ojibal e banal tak camic.

¹⁷ Quequitij na ri e u wäch tak ri e awulew, xukuje' ri a wa, quebequitij c'u ne na ri e a c'ojol xukuje' tak ri e a mia'l. Quebequitij tak na ri e a chij, ri e a wacax, ri e a uva xukuje' tak ri e a higo. Cuc' tak ri e qui ch'ojibal quequisachisaj na qui wäch ri tinimit tak ri e c'o nimak tak tapia chquij ri a cuban wi a c'u'x.”

¹⁸ Ri Ajawaxel cujiquiba' u bixic: “Pa we k'ijol ri', man c'u quinsachisaj ta qui wäch chinimalaj conojel.

¹⁹ Aretak chi qui c'ot achi': ‘¿Jasche ri Ajawaxel ri ka Dios xuban ronojel wa' chke?’, chatzelej u bixic chque: ‘Je' jacha' ri xibano xitzak can ri Ajawaxel xixoc c'u che qui patanixic qui diosib winak re jun ulew chic chupam ri kas rulew, jeri' xukuje' quequipatanij na winak chupam jun ulew ri man quech taj.’ ”

Cäya' u bixic che ri Israel ri cuc'ulmaj na

²⁰ “Chiya' u bixic che ri rajawibal ri Israel, xukuje' chibij che ri Juda:

²¹ ‘Chatatabej wa', conalaj tinimit xukuje' täc, ri e c'o u bak'wäch man cäca'y ta c'ut, ri e c'o u xiquin man cätan ta c'ut.

²² In, ri Ajawaxel quinbij: ¿La xa' man quina' ta iwib chnuwäch? ¿La xa' man quixbirbob ta chnuwäch in? In xincoj ri sanyeb che u c'ulbatil ri plo, jun c'ulbat ri man cäcuin ta ri plo coc'ow ta puwi'. Ri e u rekbala' xak lok' caquicoj qui chuk'ab quebel c'u ch'u'j, man c'u quecuin ta che u xalk'atixic.

²³ Ri ix c'o jun iwanima' täc xukuje' man nimanel taj; xinitzak canok xixbe c'ut.

²⁴ Man xechoman taj mawi xquibij taj: Nim kila' wi ri Ajawaxel ri ka Dios, ri cuya' ri ka jäb pa ri u k'ijol ri cäkaj atam xukuje' ri cäkaj matam, chupam c'ut ri nabe tak ic' re ri junab cuya' chke ri u yaquic ri qui wächinic tak ri kulew.

²⁵ Are c'ut ri i mac ix e qui q'uexom ri jastak, man quixcuin ta c'ut quebiwechbej tak we tewichibal ri'.

²⁶ E c'o c'u itzel tak winak chupam ri nu tinimit ri queyuxlenic jacha' ri caquiban ri chapal tak chicop ri c'o qui xic', ri quequicoj c'amibal che qui chapic ri niq'uiaj chic.

²⁷ Quequinojisaj ri cachoch chque jastak ri xa' e eläk'am, jacha' ri cäban che qui nojisaxic tak ri co'c cuc' tak chicop ri c'o qui xic'. Je xquiban wa' rech xc'oji' qui cuinem xek'inomar c'ut,

²⁸ e k'obinak c'ut xukuje' utz qui tzuktzubexic banom. Ri quetzelal man c'o ta u c'ulbatil: man caquiban ta ri suq'uilal che ri minorib mawi caquiya' u k'ij ri takal u banic chque ri mebayib.

²⁹ ¿La ma ta c'u chinc'äjisaj qui wäch cumal we jastak ri'? ¿La ma ta chinya' ri takalic che ri winak ri je cuban wa'? In ri Ajawaxel, quinjiquiba' u bixic.

³⁰ Jun jasach xibibal ri caxibinic cätajin cäc'ulmataj chupam we ulew ri'.

³¹ Ri caquiya' u bixic ri e k'axal tzij xa' banoj tzij; ri e cojol tabal tok'ob caquiban ri k'atoj tak tzij jas ri kas cäcaj, ¡are c'u wa' ri cäkaj chuwäch ri nu tinimit! ¿Jas c'u lo ri quiban na ix aretak copan ri q'uisbalil?’ ”