Ri Jeremiy 49 - Quiché Bible

Cäya' apan u bixic ri caquic'ulmaj na ri aj amonib

¹ Tzijol ri cuya' ri Ajawaxel che ri cuc'ulmaj na ri Amon: “¿Jawije' tak e c'o wi ri e ralc'ual ri Israel? ¿Jawije' tak e c'o wi ri e rechbenelab? ¿Jasche ri dios Milcom are' ajchak'e ri Gad camic? ¿Jasche e are' ri aj amonib e jekel chquipam ri qui tinimit tak?

² Je ba' ri', in, ri Ajawaxel, quinjiquiba' u bixic: Chi copan na ri k'ij chi quinban na chi ri tinimit Amon aj Raba cutatabej na rakoj chi'aj re ch'o'j; cux c'u na pa jun jumulaj yojyobic, e are tak c'ut ri e u tinimit quenicowisax na rumal k'ak'. Chi' c'ut ri Israel quebutokij chi na ri u tinimit tak. In, ri Ajawaxel, quinjiquiba' u bixic.

³ ¡Chatch'ikowok, Hesbon, are c'u ri Hai sachinak chic u wäch! ¡Chibana' juyuwem, ixokib tak re Raba! ¡Chebicojo' tak iwatz'iak re bisobal, chit'oco' ri uwo i c'u'x! ¡Chixxiq'uinok je ta ne ix ch'ujab, chisoco' ri i cuerp! Rumal rech chi ri dios Milcom cac'am bic queyok pa jun ulew chic, querachilaj ri e u cojol tabal tok'ob xukuje' winak ri nimak qui banic.

⁴ ¿Jasche caban nimal chi c'o a chuk'ab? Ri a chuk'ab queq'uisok, tinimit culelanel, a cuban a c'u'x chquij tak ri k'inomal ri a mulin cabij c'ut: ‘¿Jachin ta lo ri cäch'ojin wuc'?’

⁵ Chaweyej na, pa ronojel c'olbal quintak ulok xibriquil pawi'. In, ri Ajawaxel, ri Ajawaxel ri c'o ronojel u cuinem quinjiquiba' u bixic chi chijujunal ix quixanimaj na pa apachique c'olbal ri qui riko, man c'o ta c'u jachin jun ri quixmulin ta chic.

⁶ Quinq'uex c'u na ri quequitaklebej ri aj amonib. In, ri Ajawaxel, quinjiquiba' u bixic.”

Cäya' apan u bixic ri cuc'ulmaj na ri Edom

⁷ Tzijol ri cuya' ri Ajawaxel ri c'o ronojel u cuinem che ri cuc'ulmaj na ri Edom: “¿La man c'o ta chi no'j pa Teman? ¿La man queta'm ta chic jas caquiban ri c'o quetamanic? ¿La xetzeletaj ri qui no'j?

⁸ ¡Aj Dedan, quixxiq'uinic chixel bic, je i c'u tak iwib! Rumal rech chi quinsachisaj u wäch ri u tinimit ri Esau; opaninak ri k'ij che u c'äjisaxic u wäch.

⁹ Aretak quemac tak ri uva, queya' can jutak tzayaj; aretak quepe ri eläk'omab chak'ab xuwi caquic'am bic ri cajwataj chque.

¹⁰ Are c'u ri in nu tolobam can ri u tinimit ri Esau, ri caquic'u' wi quib e nu yo'm chisak man quecuin ta chi c'ut caquic'u' ta chi quib. Ri e calc'ual, ri e cachalaxic xukuje' tak ri e qui c'ultakja, conojel xsachisax qui wäch; man c'o ta jachin jun xcanajic ri cubij taj:

¹¹ ‘Chebaya' can ri e a minorib chwe rech quebenchajij. Qui cuba' qui c'u'x ri e a malca'nib chwij.’ ”

¹² Je c'u wa cubij ri Ajawaxel: “We ri winak ri man takal ta u c'äjisaxic qui wäch, cäcuq'uiaj c'u na ri c'äjisabal qui wäch, man cuya' ta c'ut chi catcanaj ta at chi ma ta chc'äjisax a wäch, xane' cawuq'uiaj na awech.

¹³ In, ri Ajawaxel, quinban na ri chi'nic ri kas cäban na, quincha' pa nu bil wib: Ri tinimit re Bosra cux na canok jun chaki'j uwo sak, pa etzeletajic, jun c'utbal re mach'irisanic xukuje' c'okotajic, are c'u ri niq'uiaj tak tinimit chic quecanaj pa etzeletajic chbe k'ij sak.”

¹⁴ Opaninak jun tzijol wuc' rumal ri Ajawaxel; jun ya'l tzijol cätajin cuya' u bixic chque ri nimak tak tinimit: “¡Chimulij iwib jixech'ojin ruc' ri Edom! ¡Chisuc'umaj iwib che u banic ri ch'o'j!

¹⁵ In quinban na chawe chi catux na sibalaj ch'utin chquixo'l tak ri tinimit, ri sibalaj etzelam u wäch chquixo'l tak ri winak.

¹⁶ Xaya' awib pa subic rumal ri nimal ri catc'amowic, rumal rech chi caya' xibriquil. At jekel chquixo'l ri paxinak tak abaj, a chapom awib che tak ri qui wi' tak ri juyub. Pune' c'u sibalaj chicaj caya' wi ri a soc jacha' ri cot, chila' catinkasaj wi ulok. In, ri Ajawaxel, quinjiquiba' u bixic.

¹⁷ Ri u sachisaxic u wäch ri Edom sibalaj nim na chi cuya' na xe'n ib. Ronojel ri coc'ow chila' cuxibij na rib aretak cäril ri c'äjisabal wächaj,

¹⁸ je c'u cäcanajic jacha' ri Sodom xukuje' ri Gomor xukuje' ri e c'ulja tak tinimit, aretak xsachisax qui wäch. Man c'o ta chi jun cätzelej ta chi che jekelem chila', mawi ta ne xa' ta che quieb oxib k'ij. In, ri Ajawaxel, quinyo'w u bixic.

¹⁹ Xäk c'ätetal quinpe na, jacha' jun coj ri quel ulok chquipam tak ri patzapak tak k'ayes ri e c'o chuchi' ri Jordan cuq'uiak c'u rib pa tak ri c'olbal ri e c'o wi echa' ri amak'el quetojtatic, quinban c'u na chi quebanimaj ri aj Edom ri e c'o chi', quinban c'u na chi are cajawin na ri winak ri quincha' na. ¿Jachin ta c'ut ri cäcuinic ri cujunamaj ta rib wuc'? ¿Jachin ta ri cäcuinic quinuc'ulelaj taj? ¿Jachin ta ri yuk'unel ri cäcuin ta che u k'atixic nu wäch?

²⁰ Chitatabej ri chomanic ri in, ri Ajawaxel, ri nu suc'umam ri cuc'ulmaj na ri Edom, ri quintakej na u banic chque ri e c'o pa Teman: xukuje' ne ri alaj tak ama'ib chij ri sibalaj c'ä e ch'utik na quequic'am na bic, kas e are tak c'ut ri yuk'bal queban can c'ax chque.

²¹ Ri u tzakic ri Edom sibalaj co na ri ok'ibal ri cubano, chi caslab na ri ulew rumal; curak na u chi' cutz'onoj to'banic, ri e u rakoj tak chi'aj quetataj na c'ä pa ri Quiäk Plo.

²² Ri c'ulel cuq'uiak na rib chrij ri Bosra jacha' jun cot ri e u liq'uiq'uem ri u xic', chupam c'ut ri k'ij ri' ri e banal tak u ch'o'j aj Edom quebirbit na jacha' jun yawab ixok.”

Cäya' apan u bixic ri cuc'ulmaj na ri Damasc

²³ Tzijol che ri cuc'ulmaj na ri Damasc: “Ri tinimit tak re Hamat xukuje' re Arpad elinak qui q'uixbal, rumal rech chi opaninak c'ut itzel tak tzijol cuc'. Quenoj che xibriquil, man quecuin taj quec'oji' pa utzil.

²⁴ Ri Damasc, man c'o ta chic u chuk'ab, cuchomaj animajic. Cäch'ac rumal ri xibin ib ri elemch'u'j xukuje' ri k'oxomal, jacha' jun yawab ixok.

²⁵ Ri tinimit ri nim u k'ij, ri tinimit ri utz u banom, xwonobax canok.

²⁶ Pa ri k'ij ri' queliq'ui' can tak ri e u c'ojolab xo'l tak ri ja conojel c'ut ri e banal tak u ch'o'j quecäm na. In, ri Ajawaxel ri c'o ronojel u cuinem, quinjiquiba' u bixic.

²⁷ Quent'ika' k'ak' chque tak ri u tapia ri Damasc, are c'ut we k'ak' ri' cusachisaj na qui wäch ri e rachoch ri ajawinel Ben-adad.”

Cäya' apan u bixic ri cuc'ulmaj na ri Sedar xukuje' ri Azor

²⁸ Tzijol ri cuya' ri Ajawaxel che ri cuc'ulmaj na ri amak' re Sedar xukuje' ri e c'ämal tak u be ri Azor, ri xech'äc rumal ri Nabucodonosor, ajawinel re Babilon: “¡Chixwalijok, chixch'ojin ruc' ri Sedar! ¡Chisachisaj u wäch we amak' ri' ri aj elebal k'ij!

²⁹ Chibana' iwech chque tak ri qui lic'om ja xukuje' tak ri e qui tzobaj, ri e u tz'akatil tak ri qui lic'om ja xukuje' conojel tak ri qui chaconisan. Chebitokij tak ri camey chibij c'u chque ruc' rakoj chi'aj: ‘¡C'o xibriquil pa conojel c'olbal!’

³⁰ ¡Quixxiq'uinic chixel bic aj Azor! ¡Jix che u c'u'ic iwib! In, ri Ajawaxel, quinya' u bixic. Are' c'u ri Nabucodonosor, ri ajawinel re Babilon, u chomam chic ri cubana' chiwe.

³¹ In, ri Ajawaxel quinya' takanic chque: ¡Chixwalijok, aj caldeyib chixch'ojin ruc' we tinimit ri' ri jekel pa utzil ri man c'o ta jas coc ta wi il, ri man e c'o ta tz'apibal u chi' mawi e u c'opibal xak c'u u tuquelam rib!

³² ¡Chebiweläk'aj tak ri e qui camey xukuje' conojel tak ri cawaj! Quebenjabuj na pa conojel tak c'olbal ri quequitolarisaj ri u pa qui ja'j; pa conojel c'olbal quebenc'am wi na ulok tak ri etzelal paquiwi'. In, ri Ajawaxel, quinjiquiba' u bixic.

³³ Ri Azor cäcanaj can amak'el jun chaki'j uwo sak qui jekelibal xexalaj tak awaj. Man c'o ta chi jachin jun cajeki' ta chi na chila' mawi ta ne xa' ta re quieb oxib k'ij.”

Cäya' u bixic che ri Elam ri cuc'ulmaj na

³⁴ Aretak ri Sedequiy xuchaplej ajawinic pa Juda, ri Ajawaxel xuya' u bixic we tzijol ri' che ri Jeremiy che ri cuc'ulmaj na ri Elam:

³⁵ “In, ri Ajawaxel ri c'o ronojel u cuinem, quinjiquiba' u bixic: Quebenk'ajisaj tak ri q'uiakbal qui ch'ab aj Elam, e are tak qui ch'ojibal wa' ri nimak qui k'ij.

³⁶ Quinc'am na ulok tak quiakik' puwi' we tinimit ri' kas pa ri quiejeb xcutaj, rech quebuc'am bic pa conojel tak c'olbal, c'ä man c'o ta na ulew cäcanajic ri quebopan ta wi ri aj Elam ri quequito' ta wi quib.

³⁷ Quenbana' chi cäyicop na ri Elam chquiwäch ri e u c'ulel ri e cämel, quebentak na ulok nimalaj c'axc'ol puwi', quinquir na ri woyowal rech cäkaj puwi' quintak na ri ch'o'j puwi' c'ä quinsachisaj na u wäch ronojel. In, ri Ajawaxel, quinjiquiba' u bixic.

³⁸ Quincoj na ri nu tem re ajawibal pa Elam, quinban na chi quecäm tak ri e rajawinelab xukuje' ri e c'ämal tak u be. In, ri Ajawaxel quinjiquiba' u bixic.

³⁹ Pa tak ri k'ij ri cäpe na quinq'uex na ri cutaklebej ri Elam. In, ri Ajawaxel quinjiquiba' u bixic.”