Ri Jeremiy 48 - Quiché Bible

Cäya' apan u bixic ri cuc'ulmaj na ri Moab

¹ Tzijol ri u yo'm ri Ajawaxel ri c'o ronojel u cuinem, ri u Dios ri Israel, che ri cuc'ulmaj na ri Moab: “¡Tok'ob a wäch tinimit Neb, yojyobinak chi c'ut! ¡Ri Quiriataim xmajixic xukuje' xmach'irisaxic! ¡Ri u chuk'ab xt'akix pa ulew!

² Xq'uis ri nimarisabal u k'ij ri Moab. Pa Esbon ri c'ulel cätajin quequiban chomanic rech casach u wäch ri Moab, jacha' nim tinimit. Xukuje' at Madmen, cachupisax na a wäch, are c'u ri ch'o'j man cutanaba' ta u cojic a xib.

³ Chupam ri Horonaim quebel ulok rakoj tak chi'aj: ‘¡Etzeletajic xukuje' nimalaj yojyobic!’

⁴ Ri Moab c'o pa etzeletajic; ri rakoj tak chi'aj re k'oxomal quebopan c'ä pa Zoar.

⁵ Cuc' u wa'l tak wächaj chi' tak bak'wäch, quepaki' puwi' ri juyub re Luhit; caquirak qui chi' rumal re k'oxomal chuwäch ri c'ulmatajic ri quekaj bic pa Horonaim.

⁶ ¡Chixanimajok! ¡Chuto'tajisaj rib ri cäcuinic! ¡Chebux jacha' ri quemom q'uix pa ri chaki'j uwo sak!

⁷ Moab, at a cuban a c'u'x chrij ri a chuk'ab xukuje' chquij tak ri e a k'inomal, xukuje' c'u ri at catmajix na. Ri a dios Quemos cac'am na bic pa jun ulew chic, e rachil tak ri e u cojol tak tabal u tok'ob xukuje' ri winak ri nimak qui k'ij.

⁸ Ri yojyobic copan na pa conojel ri tinimit tak, mawi ta c'u ne jun cato'taj ta canok; ri beya' xukuje' ri u wi juyub quecanaj pa etzeletajic. In, ri Ajawaxel, quinjiquiba' u bixic.

⁹ Chitz'ibaj ri u bi' ri Moab chi cäminak chic quesachisax c'u na u wäch; ri u tinimit tak quecanaj can pa etzeletajic man c'o ta c'u jun winak cacanaj ta chupam.”

¹⁰ (¡C'okom ri xak quieb ranima' cuban ri chac ri takom che u banic rumal ri Ajawaxel Dios! ¡C'okom ri man cuya' u tzij che u banic ri cämisanic!)

¹¹ Ri Moab amak'el c'olinak pa jamaril, mawi jumul c'amom bic pa jun ulew chic. Xak junam ruc' ri u wa'l uva ri cäya' c'olbal che cäkaj u xe', ri man cäjamix taj pa jun c'olbal chic, rumal ri' mawi jubik' cutzak ta ri u na'il mawi ri u c'oc'al.

¹² Are' c'u ri Ajawaxel cujiquiba' u bixic: “Copan na ri k'ij chi quebentak winak chi chquijamij ri u wa'l uva chquipam jule' tak c'olbal chic, e are tak c'ut ri c'olbal ri e jamajobinak canok chequimuchu'.

¹³ Are c'u ri Moab cuch'ob na rib chi xa xäsub rumal ri u dios Quemos, jacha' ri xuban ri Israel chi xa xäsub rumal ri Betel, ri u jiquiban u c'u'x chrij.

¹⁴ Mubij ri Moab: ‘sibalaj uj cowilaj tak winak, ajch'ojab ri sibalaj c'o qui chuk'ab.’

¹⁵ Opanem cuban ri yojil rech ri Moab xukuje' tak ri e u tinimit; ri e u c'ojolab ri kas e je'l na quec'am na. Cujiquiba' u bixic ri Ajawinel, ri are u bi', ri Ajawaxel ri c'o ronojel u cuinem.

¹⁶ Ri c'ulmatajic che ri Moab canakajinic, ri quiäkasakil xa' jubik' man cäkaj puwi'.

¹⁷ C'ulja tak re Moab, xukuje' conojel ri queta'm chi elinak u tzijol, chcok'ej u wäch quibij c'ut: ‘¡Chiwila' chi xyojyob ri u cuinem ri sibalaj co ri sibalaj yo'm u k'ij!’

¹⁸ Chatkaj ulok, chaya' can ri a t'uyulibal ri nim u k'ij tinimit re Dibon, chatt'uyul chupam ri chaki'j ulew, rumal rech chi ri yojil rech ri Moab canakajin chawe, e u yojim c'ut ri to'bal tak awib.

¹⁹ Tinimit re Aroer, chattac'al pa u xcut ri be chatca'y c'ut; chac'oto' qui chi' ri xec'asi' canok jas ri xc'ulmatajic.

²⁰ Mach'irisatajinak ri Moab, nojinak che xibriquil. ¡Chiwok'ej u wäch rumal ri k'oxomal! ¡Chiwesaj u tzijol pa ri nima' Arnon sachisam u wäch ri Moab!”

²¹ Xopan ri c'äjisabal wächaj ri yo'm u bixic chi caquic'ulmaj na ri tinimit tak ri e c'o paquiwi' tak ri juyub: ri Holon, ri Jahaz, ri Mepaat,

²² ri Dibon, ri Neb, ri Bet-diblataim,

²³ ri Quiriataim, ri Bet-gamul, ri Bet-meon,

²⁴ ri Queriot, ri Bosra xukuje' conojel ri tinimit tak re Moab, ri e c'o nakaj xukuje' ri e c'o naj.

²⁵ Ri Ajawaxel cujiquiba' u bixic: “Ri u chuk'ab ri Moab paxtajinak, xukuje' ri u cuinem sachisam u wäch.”

²⁶ Chi k'abarisaj ri Moab, rumal rech chi xuwalijisaj rib chrij ri Ajawaxel. Cuwolkotila' c'u na rib ri Moab chupam ri u xo'j xa' c'u cätzex chi u wäch cumal conojel.

²⁷ Moab, ¿La ma ta pu xatze'j u wäch ri Israel catyok'on c'u che ruc' etzelam wächaj, jacha' ta ne are' ta jun eläk'om?

²⁸ Chebitzaka' can tak ri aj Moab ri ix jekel chquipam; Chixejekel paquiwi' tak ri abaj pa tak ri juyub ix jacha' ta ne palomax ri quequiban qui soc tza'm tak ri siwan.

²⁹ Keta'm ri nimalaj nimal ri cac'amow ri Moab: chi man c'o ta jun jacha' ri are man cakaj ta jubik.

³⁰ Xukuje' ri Ajawaxel reta'm ri yacoj oyowal ri cubano, ri u rok'ok'em xukuje' tak ri e u c'anal.

³¹ Rumal ri' quinok' na xukuje' quinjuyuw na rumal ronojel ri tinimit Moab xukuje' cumal ri achijab re Kir-hars.

³² Quinwok'ej na a wäch, ticbal uva re Sibma, c'o na chuwäch ri rok'exic ri Jazer ri xbanic. Ri e ak'ab tak quebe oc'ow c'ä jela' che ri plo quebopan c'u c'ä pa Jazer. Are c'u ri camic ri e a uva ri c'amaja' cayac qui wäch e etzeletajinak chic.

³³ Man quetataj ta chic ri rakoj tak chi'aj re jajatem chquipam tak ri ticbal cotz'i'j re Moab. Ri u wa'l uva q'uisnak pa tak ri c'olbal. Man c'o ta chi jachin quepitz'len tak ri uva, man e c'o ta chic bix re quicotemal.

³⁴ Ri winak re Esbon caquirak qui chi' rumal ri k'oxomal, ri qui rakoj tak chi'aj quebopan c'ä pa Eleal xukuje' pa Jahaz, kas c'u pa Zoar c'ä pa Horonaim xukuje' c'ä pa Eglat-selisiy, e tzajtzobinak c'u ne tak ri e u q'uiyibal tak ja' ri e c'o pa Nimrim.

³⁵ Ri Ajawaxel cujiquiba' u bixic: “In quinsachisaj na qui wäch ri winak ri e c'o pa Moab ri quepaki' paquiwi' tak ri juyub, che qui k'ijilaxic diosib, che qui chi'xic tabal tak tok'ob xukuje' c'oc' k'ol chque tak ri e qui diosib.”

³⁶ Rumal ri' cajuyuw ri wanima' che ri Moab xukuje' chque ri winak aj Kir-hars jacha' u juyuwem u k'ojom cäminak, ri k'inomal tak ri e u mulin sachinak qui wäch.

³⁷ Ronojel jolomaj banom tol che xukuje' ronojel ismachi'aj kopim; conojel e qui banom tak socotajic chque tak ri qui k'ab e quicojom c'u wakwoj tak atz'iak chquij.

³⁸ “Paquiwi' conojel tak ri ja re Moab xukuje' pa conojel ri e u xo'l tak ri ja xak xuwi juyuwem quetatajic, rumal rech chi xinmuch ri Moab jacha' jun lak ri man c'o ta cajwataj wi. In, ri Ajawaxel quinjiquiba' u bixic.”

³⁹ ¡Chi juyuwej ri Moab! ¡Chi nojinak che xibriquil! ¡Are xuya' can ri rij xuresaj u q'uixbal! Xux jun xibibalalaj jasach ri quetzelex u wäch cumal conojel ri c'ulja.

⁴⁰ Ri Ajawaxel je cubij wa': “Ri u c'ulel ri Moab cuq'uiak rib chrij jacha' jun cot ri e u liq'uiq'uem ri e u xic'.

⁴¹ Tinimit tak xukuje' to'bal tak ib quekaj na pa u k'ab ri c'ulel. Chupam ri k'ij ri' ri e banal tak u ch'o'j ri Moab quebirbit na jacha' jun yawab ixok.

⁴² Ri Moab man cux ta chic nim tinimit, rumal rech chi xuwalijisaj rib chwij, chrij ri Ajawaxel.

⁴³ Rumal ri' in, ri Ajawaxel, quinjiquiba' u bixic: Ri e aj Moab quebux na e jacha' awaj ri quetzucux cumal ri tzucul tak quech o xak quieb cubij paquiwi' quebetzak chupam jun jul o quebekaj chupam jun c'amibal.

⁴⁴ Ri man cäkaj ta pa qui k'ab ri tzucunelab cätzak na chupam jun jul, are c'ut ri quel ulok chupam ri jul quekaj na chupam ri c'amibal, rumal rech chi ri in quinc'am na ulok puwi' ri Moab ri k'ijol re ri c'äjisabal u wäch. In, ri Ajawaxel, quinjiquiba' u bixic.

⁴⁵ E c'o jujun quebanimajic rumal chi man c'o ta chi qui chuk'ab, quequitzucuj u to'ic quib pa ri u mujal ri Esbon; are c'u ri Esbon, ri u tinimit ri ajawinel Sehon, canicow pa k'ak' culic' c'u rib ri k'ak' quebukawisaj c'u tak ri e u juyub ri Moab, we tinimit ri' ri yojinel.

⁴⁶ ¡Tok'ob a wäch Moab! ¡U tinimit ri Quemos, a c'ulmam ri tzakmajic! ¡Ri e a c'ojol xukuje' ri e a mia'l quec'am na bic pa jun ulew chic!

⁴⁷ Chuq'uisbalil c'ut quinq'uex na ri cutaklebej ri Moab; in, ri Ajawaxel quinjiquiba' u bixic.” Are c'äjisabal wächaj wa' ri cuc'am ulok ri Ajawaxel puwi' ri Moab.