Ri Jeremiy 46 - Quiché Bible

U ch'äctajic ri Ejipt pa Carquems

¹ Ri Ajawaxel xuya' u bixic che ri Jeremiy ri k'axal tzij ri caquic'ulmaj na ri nimak tak tinimit.

² Are tzijol wa' ri xuya', che ri cuc'ulmaj na ri Ejipt, are c'u kas are na che ri caquic'ulmaj na ri rajch'ojab ri paraon Necao, ajawinel re Ejipt, ri cariktaj pa Carquems, chuxcut ri nima' Euprats, ri xch'äc rumal ri Nabucodonosor ajawinel re Babilon chupam ri ucaj junab re ri rajawinic ri Joasim, u c'ojol ri Josiy, ajawinel re Juda:

³ “¡Chebiwuc'aj tak ri e i quetecak ch'ich'! ¡Chiya' che ri ch'o'j!

⁴ ¡Chebicojo' tak quiejebal chquij ri quiej! ¡Chequiejen tak ri ajquiejab! ¡Chebequicojo' ri to'bal tak qui jolom chequicholajij c'u tak quib! ¡Chequibana' tz'imaj che tak ri qui wi' ri tz'imaj ch'ich'! ¡Chebicojo' ri to'bal tak uwo c'u'x!

⁵ ¿Jas c'ut ri cätajin quinwilo? Quetzelej chquij e nojinak che xibriquil. Ri e rajch'ojab caquijabula' tak quib e ch'äcatajinak; quexiq'uinic quebanimajic, man queca'y ta can chquij. ¡C'o xibriquil pa conojel tak ri c'olbal! In, ri Ajawaxel, quinjiquiba' u bixic.

⁶ ¡Man quecuin taj quebanimaj ri sibalaj quebanic, mawi queto'taj ri sibalaj c'o qui chuk'ab! Pa ri iquiak'ab, chuxucut ri Euprats caquipuq'uila' tak quib quetzak c'ut.

⁷ ¿Jachin wa' ri caq'uiyic jacha' ri Nil, jacha' jun nima' ri sibalaj cäwolkotic?

⁸ Are' ri Ejipt ri caq'uiyic jacha' ri Nil, jacha' jun nima' ri sibalaj cäwolkotic. Ri Ejipt je cubij wa': ‘Quineq'uiyok quenchemowisaj ri ulew, quebensachisaj qui wäch tak ri tinimit xukuje' tak ri winak ri e c'o chquipam.’

⁹ ¡Chenabej tak ri ajquiejab! ¡Chetaken tak ri carwaj! ¡Chiquitakej qui be ri ajch'ojab: ri ajch'ojab aj Etiopiy xukuje' ri e rech Libiy checuc'aj tak ri qui quetecak ch'ich'; ri ajch'ojab re Lidiy, ri quena'w che u cojic ri q'uiakbal ch'ab!

¹⁰ Are wa' ri u k'ij ri Ajawaxel ri c'o ronojel u cuinem, ri k'ij ri cuya' rajil u q'uexelal chque ri e u c'ulel. Ri ch'ich' re ch'o'j casocon na c'ä cak'abar na rumal ri quic'. Are c'u ri Ajawaxel ri c'o ronojel u cuinem cuban na jun cämisanic pa ri ulew re ri iquiak'ab, chunakaj ri Euprats.

¹¹ ¡Tinimit re Ejipt, Jät pa Galaad che u tzucuxic cunabal! ¡Pune' c'u caq'uis awib che qui cojic tak cunabal, man c'o ta quequipatanij na chawe, man e c'o ta c'u cunabal chawe!

¹² Ri nimak tak tinimit queta'm chic chi at mach'irisam chic, pa ronojel c'ut ri uwächulew cätatajic chi carak a chi'; caquipuq'uila' tak quib ri ajch'ojab, junam c'ut queliq'ui' can cho tak ri ulew.”

Ri ch'o'j ri xuban ri Nabucodonosor ruc' ri Ejipt

¹³ Ri Ajawaxel xutzijobej ri Jeremiy, k'axal tzij, aretak ri Nabucodonosor, ajawinel re Babilon, chpe che u banic ch'o'j ruc' ri Ejipt:

¹⁴ “Chiya' u bixic pa Ejipt, pa Migdol, pa Memps xukuje' pa Tapnes: ‘¡Chbanwalijem, xak chixeyenok! ¡Ri ch'ich' re ch'o'j cätajin cäcämisan chinakaj!’

¹⁵ ¿Jasche xanimaj ri Apis, ri ama' a wacax ri tastalic? ¿Jasche man xcuintaj co ta xtaq'ui'c? In c'ut, ri Ajawaxel, in xinch'iquimin bic.

¹⁶ Ri e awajch'ojab cäquipuq'uila' tak quib, quetzak c'ut, caquibila' c'u chquibil tak quib: ‘¡Chujel bic waral, chujtzelej pa ri ka tinimit, chupam ri ulew ri xujalax wi! ¡Chujanimaj chuwäch ri cämisanelalaj ch'o'j!’

¹⁷ Chicojo' we yok'obal ri' chrij ri paraon, ri ajawinel re Ejipt: ‘Sibalaj cawojojic, xak xuya' c'u c'olbal xopan ri k'ijol.’

¹⁸ In, chi in ri ajawinel, Ajawaxel c'ut ri nu bi' ri c'o ronojel u cuinem, quinban ri chi'nic ri kas cäban na rumal ri nu c'aslemal: Jacha' ri Tabor ri walijinak chquixo'l tak ri juyub, xukuje' jacha' ri Carmel, walijinak puwi' ri plo, je u banic wa' ri c'ulel ri cäpe na.

¹⁹ Chisuc'umaj iwib che ri i wesaxic bic pa ri iwulew, aj ejiptib, are c'u ri Memps caq'uextaj na cux na chaki'j uwo sak, pa etzeletajic ri mawi jun cajeki' ta na chupam.

²⁰ Ri Ejipt ri je ta ne jun je'licalaj ati't wacax, queletzop c'u rumal jun alaj amalo aj ri riquiak'ab ri relebal k'ij che u tzopic.

²¹ Ri e rajch'ojab ri xa' e u mocom e jacha' alaj tak ama'ib wacax ri quek'onk'otic, xukuje' c'u ne ri e are' quebanimajic man quecuin ta c'ut co ta caquitac'aba' quib, opaninak c'ut ri k'ij re ri u sachisaxic qui wäch, ri k'ijol re ri u c'äjisaxic qui wäch.

²² Ri Ejipt caxulk'ubic canimajic jacha' jun cumätz aretak chenakajin ri e banal tak ch'o'j, icäj c'ut quequicämisabej quech ri je ta ne quet'oy juwi tak che'.

²³ ¡Quequikasaj na ri k'ekumalaj tak qui c'ache'laj! In, ri Ajawaxel, quinjiquiba' u bixic. C'o na ri cajilabal chquiwäch tak ri sac', man c'o ta jun cäcuin ta che cajilaxic.

²⁴ Ri Ejipt cämach'irisax na, cäkaj c'u na pa u k'ab ri tinimit re ri riquiak'ab elebal k'ij.”

²⁵ Ri Ajawaxel ri c'o ronojel u cuinem, ri u Dios ri Israel, je cubij wa: “Quenc'äjisaj u wäch ri Amon, ri u dios ri Tebs, ri Ejipt e rachil tak ri e u diosib xukuje' tak ri e rajawinelab, xukuje' ri paraon xukuje' ri caquicu'ba' qui c'u'x chrij.

²⁶ Quinban na chi quekaj na pa qui k'ab ri e cämel tak qui c'ulel, pa u k'ab ri Nabucodonosor, ajawinel re Babilon, xukuje' pa qui k'ab ri e u winak. Coc'ow c'u na jun k'ijol, ri Ejipt canoj chi na cumal winak jacha' ri nabe canok. In, ri Ajawaxel quinjiquiba' u bixic.”

Ri Ajawaxel cuto'tajisaj na ri u tinimit

²⁷ “Maxe'j awib u tinimit ri Jacob, pataninel wech; man caxe'j ta awib, Israel. Ri at xukuje' ri e awalc'ual quixinto'tajisaj na quixinwesaj na pa u k'ab we najalaj ulew ri' ri ix yo'm chupam. Catjeki' chi na pa jamaril, man c'o ta c'u jachin catslabenic, man c'o ta c'u jachin catxibinic.

²⁸ In, ri Ajawaxel quinjiquiba' u bixic: Maxe'j awib u tinimit ri Jacob, pataninel wech, rumal rech chi ri in in c'o awuc'. Quinsachisaj na qui wäch conojel ri nimak tak tinimit ri xatinjabuj chquixo'l. Are c'u ri at man quinsachisaj ta a wäch; xuwi catinjic' na jas ri rajawaxic chawe; man catinya' ta c'u can xak chi jeri' we ta mat quinc'äjisaj na a wäch.”