Ri Jeremiy 43 - Quiché Bible

Cac'am bic ri Jeremiy pa Ejipt

¹ Aretak ri Jeremiy xuq'uis u ya'ic u bixic che ri tinimit ronojel ri xubij ri Ajawaxel ri qui Dios che chi chuya' u bixic chque,

² ri Azariy, u c'ojol ri Osaiy, ri Joanan, u c'ojol ri Carey, xukuje' niq'uiaj achijab chic ri e banal tak nimal xquibij che ri Jeremiy: “¡Ri cabij xa' banoj tzij! Ri Ajawaxel ri ka Dios man u bim ta chawe chi mujejekel ta pa Ejipt.

³ Are' ri Baruc, u c'ojol ri Neriy, xsachow ri a no'j chakij, rech cubano chi cujkaj pa qui k'ab ri aj caldeyib chujquicämisaj c'ut, o chujquic'ama' bic pa Babilon.”

⁴ Je c'u ri', mawi ri Johanan mawi ri e c'amal tak qui be ri ajch'ojab mawi ri winak xecanaj ta can chupam ri ulew Juda, man xquinimaj ta c'ut ri takanic ri xuya' ri Ajawaxel chque.

⁵ Kas are' c'u ne, ri Johanan xukuje' ri e c'amal qui be ri ajch'ojab xebequimulij ri quieb oxib winak ri e c'o pa Juda ri xeto'taj canok, aretak qui jabum chi quib pa jalan tak ulew; e tzelejinak chi ulok pa Juda rech quejeki' chila':

⁶ achijab, ixokib, ac'alab, ri e u mia'l ri ajawinel xukuje' conojel ri winak ri xebuya' can ri Nabuzaradan ri takanel paquiwi' ri chajinelab ri xebuya' can pa u k'ab ri Jedaliy rech querilij, are' c'u jun ri Jeremiy xukuje' ri Baruc.

⁷ Man xquinimaj taj ri u takanic ri Ajawaxel, conojel xebe pa Ejipt xebopan c'u c'a chupam ri tinimit re Tapnes.

⁸ Pa Tapnes, ri Ajawaxel xutzijobej ri Jeremiy xubij c'u che:

⁹ “Chebac'ama' jujun tak abaj nimak, chquiwäch c'u conojel ri winak re Juda, chebamuku' pa ri lilic ulew re t'ac, chuwäch ri oquibal chupam ri rachoch ri ajawinel ri c'o pa ri tinimit.

¹⁰ Chabij c'u chque: ‘Ri Ajawaxel ri c'o ronojel u cuinem, u Dios ri Israel, je cubij wa': Quenbana' chi cäpe ri pataninel wech ri Nabucodonosor, ajawinel re Babilon, quentiq'uiba' c'ut ri u tem re ajawibal xukuje' ri u lic'om rachoch ri ajawinel paquiwi' tak we abaj ri' ri e nu mukum waral.

¹¹ Ri are' cäpe na cusachisaj c'u na u wäch ri ulew re Ejipt. Ri q'uiakom paquiwi' chi quecämic, quecäm na; ri q'uiakom paquiwi' chi quec'am na bic pa jun ulew chic quec'am na bic pa jun ulew chic; ri q'uiakom paquiwi' chi quecäm na pa ri ch'o'j, quecäm na pa ri ch'o'j.

¹² Cut'ik na k'ak' chque tak ri cachoch ri diosib re Ejipt, xukuje' cut'ik na k'ak' chque tak ri qui diosib o quec'am na bic je ta ne cäban winak chque ri quech'äctaj chupam ri ch'o'j. Cujosk'ij na ri ulew re Ejipt jacha' jun ajyuk' ri cujosk'ij ri ratz'iak ri e c'o sakuc' che, cabe c'ut man c'o ta c'u jachin jun cäk'atinic.

¹³ Chila' pa ri rachoch ri k'ij ri c'o pa Ejipt ri are' quebukasaj na ri e qui rakan tak ja ri xequik'ijilaj, cut'ik c'u na k'ak' chque tak ri cachoch ri e qui diosib ri aj ejiptib.’ ”