Ri Jeremiy 42 - Quiché Bible

Ri tinimit cutz'onoj che ri Jeremiy chi ch'aw ruc' Dios paquiwi'

¹ Conojel ri e qui nimakil ri ajch'ojab, are' c'u jun ri Joanan, u c'ojol ri Carey, xukuje' ri Azariy, u c'ojol ri Osaiy, xukuje' conojel ri winak, chi ch'utik chi nimak,

² xenakajin ruc' ri Jeremiy, k'axal tzij, xquibij c'u che: “Quekatz'onoj jun jasach chawe; mak'il c'u awib che u banic: Chabochi'j ri Ajawaxel ri a Dios pakawi', ri quieb oxib ri uj canajinak canok. Nabe sibalaj uj q'ui ulok, are c'u ri camic xa' uj quieb oxib uj canajinak canok, jacha' ri cawilo.

³ Chabochi'j ri Ajawaxel ri a Dios chi chuc'utu' ri be chkawäch ri rajawaxic u takexic kumal xukuje' ri rajawaxic u banic kumal.”

⁴ Ri Jeremiy xutzelej u bixic chque: “Utz ri'. Quinbochi'j ri Ajawaxel ri i Dios piwi', jacha' ri i tz'onon chwe, quinya' c'u na retamaxic chiwe, man c'o ta jas ri quinc'u' ta can chiwäch.”

⁵ Xquibij c'u che ri Jeremiy: “Are' ba' ri Ajawaxel ri a Dios are' chux kas jicalaj k'alajisanel chkij, we man cäkabano ri cubij chawe chi cabij chke.

⁶ We cäkaj chkawäch o man cäkaj taj ri cutzelej u bixic, cäkanimaj na ri Ajawaxel ri ka Dios, ri ka tz'onon chawe chi chatch'aw pakawi' ruc', rech utz cujelok.”

Ri tzelebal u wäch ri u bochi'nic ri Jeremiy rumal ri Ajawaxel

⁷ Oc'owinak chi lajuj k'ij, ri Ajawaxel xtzijon ruc' ri Jeremiy,

⁸ wa' xusiq'uij c'ut ri Joanan, u c'ojol ri Carey, xukuje' ri e qui nimal tak ri ajch'ojab ri e achilaninak, xukuje' conojel ri winak, kas ruc' ri sibalaj ch'utin c'ä ruc' ri sibalaj nim,

⁹ xubij c'u chque: “Ri Ajawaxel ri u Dios ri Israel, ri xinitak wi chi chebenya' ri i tz'ononic chuwäch, je cubij wa':

¹⁰ ‘We i yo'm i tzij chi quixcanaj can chupam we ulew ri', in quixinpok'colij na; man quinsachisaj ta na i wäch, xane' quixintiquiba' na man c'u quixinbok ta na, quinbison c'ut chi xintak we nimalaj c'axc'ol ri' piwi'.

¹¹ Mixe'j ba' iwib chuwäch ri ajawinel re Babilon, ri sibalaj quixe'j iwib chuwäch. Mixe'j iwib chuwäch, rumal rech chi in c'o iwuc' che i to'tajisaxic xukuje' che iwesaxic chuxe' ri u cuinem. In, ri Ajawaxel, quinjiquiba' u bixic.

¹² Quebel na nu c'u'x chiwe, quinban c'u na xukuje' chi ri are' quel na u c'u'x cuya' c'u chiwe chi quixtzelej chupam ri iwulew.’

¹³ We c'u ri ix man quiwaj taj quixcanaj can chupam we ulew ri', man c'u ne quixniman ta che ri Ajawaxel ri i Dios

¹⁴ je c'u quibij wa': ‘are utz na chke chi cujejekel pa Ejipt, ri man quekil ta wi ch'o'j, mawi cakata' rok'ebal su', mawi cujecäm ta che wi'jal’,

¹⁵ chitatabej ba' ix, ri ix aj Juda ri ix canajinak, ri cubij ri Ajawaxel ri c'o ronojel u cuinem, ri u Dios ri Israel: ‘We ri ix are quiwaj quixejekel pa Ejipt,

¹⁶ ri ch'o'j xukuje' ri wi'jal ri sibalaj quixe'j wi iwib copan c'u na iwuc' kas chila', chila' c'u quixecäm wi na.

¹⁷ Conojel c'ut ri benak qui c'u'x chi quebejekel pa Ejipt, quecäm na chila' rumal ri ch'o'j, ri wi'jal, o ri cämisanel yabilal. Man c'o ta jun cac'asi' ta na canok; man c'o ta jun ri ma ta cutaklebej ri nimalaj c'axc'ol ri quintak na piwi'.’

¹⁸ Ri Ajawaxel ri c'o ronojel u cuinem, ri u Dios ri Israel, je cubij wa': ‘Je' jacha' ri woyowal xukuje' ri nu c'anal ri xenicow paquiwi' ri aj Jerusalen, jeri' xukuje' quebenicow na piwi' ix xukuje', we quixbe pa Ejipt. Quixux na jun c'utbal re c'okobal, pa jun jasach ri cäxibinic, man quiwil ta chi c'u na u wäch we c'olbal ri'.’

¹⁹ Chiwe ix ri c'ä ix canajinak pa Juda, cuya' takanic ri Ajawaxel chiwe chi man quixbe ta pa Ejipt. Kas ba' chiwetamaj, in quinya' apan u bixic chiwe camic:

²⁰ Ix quiban jun c'axalaj sachinakil, kas c'u ix xitz'onoj tok'ob chwe chi quinoc chuwäch ri Ajawaxel i Dios, xibij c'u chwe: ‘Chabochi'j ri Ajawaxel ri ka Dios pakawi', chaya' ba' retamaxic chke ronojel ri takanic ri cuyao, rech cäkabano.’

²¹ In nu yo'm retamaxic chiwe camic ri xubij ri Ajawaxel ri i Dios chwe chi quinbij chiwe, are c'u ri ix man quiwaj taj quixnimanic.

²² Rumal c'u ri', kas ba' utz retamaxic chi bana' chi rumal rech ri ch'o'j, ri wi'jal xukuje' ri cämisanel yabilal, ri ix quixecäma na pa ri ulew jawije' ri qui waj quixejekela wi na.”