Ri Jeremiy 41 - Quiché Bible

Cäcämisax ri Jedaliy

¹ Chupam ri uwuk ic', ri Ismael, u c'ojol ri Netaniy ri' u mam c'ut ri Elisam, rija'lil ajawinel xbe pa Mizpa che u ch'abexic ri Jedaliy. Achilatal cumal lajuj achijab. Chila' c'ut pa Mizpa, aretak cätajin quewa' junam,

² ri Ismael xukuje' ri lajuj achijab ri e achilaninak xewalijic ch'ich' re ch'o'j c'ut xquicämisabej re ri Jedaliy, ri cojom can che k'atal tzij puwi' ri Juda rumal ri ajawinel re Babilon.

³ Ri Ismael xebucämisaj xukuje' conojel ri aj judeyib xukuje' ri ajch'ojab aj caldeyib ri e c'o ruc' ri Jedaliy pa Mizpa.

⁴ Chucab k'ij re ri u cämisaxic ri Jedaliy, aretak c'ä majok c'o jachin etamaninak ri xc'ulmatajic,

⁵ xebopan ri e elinak ulok pa Siquem, pa Sil xukuje' Samar e jumuch' (80) achijab, ri qui josom ri quismachi', quijisom ri catz'iak ri qui cuerp e nojinak chque tak socotajic ri kas e are' e banowinak chquibil quib. E qui c'amom c'u ulok sipanic re c'äj xukuje' c'oc' k'ol che u chi'xic che ri Ajawaxel chupam ri rachoch Dios.

⁶ Xel c'u bic ri Ismael pa Mizpa che qui c'ulaxic, cätajin cok' pa ri be. Xuwi c'u xurika' rib cuc', xubij chque: “Chixpet che rilic ri Jedaliy u c'ojol ri Ahicam.”

⁷ Xak xuwi c'u xebopan pa u niq'uiajil ri tinimit, ri Ismael xukuje' tak ri rachijab ri e c'o ruc' xequicämisala' xequiq'uiak c'u chupam jun c'ua'.

⁸ Lajuj c'ut chque ri achijab ri e cachil wa' xquibij che ri Ismael: “Man cujacämisaj taj; uj c'o ka trico, ka sebad, kaseit xukuje' ka juyubal räx cab ka c'u'm pa ri juyub.” Man c'u xebucämisaj taj ri Ismael jacha' ri e niq'uiaj cächil.

⁹ Ri c'ua' ri xebuq'uiak wi bic conojel ri achijab ri e u cämisan are c'ua' wa' ri xutak u banic ri ajawinel As aretak cuto' rib chuwäch ri Baas ajawinel re Israel. Are c'u jun c'ua' ri sibalaj nim, xnoj c'u cumal ri qui cuerp ri winak ri xebucämisaj ri Ismael.

¹⁰ Ri Ismael xebuchap c'u ne ri e u mia'l ri ajawinel xukuje' ri winak ri xecanaj can pa Mizpa, ri e cojom can rumal ri Nabuzaradan ri takanel paquiwi' ri chajinelab, chuxe' ri u takanic ri Jedaliy. Ri Ismael xebuyutu, xutakej c'ut ri u be, ri u chomanic chi coc chupam ri rulew ri Amon.

¹¹ Aretak ri Joanan, u c'ojol ri Carey, xukuje' ri e c'amal qui be ri ajch'ojab ri e c'o ruc' xquetamaj ri il ri u banom ri Ismael,

¹² xequimulij conojel ri winak xebe c'u che u tijic qui chuk'ab ruc'. Xequirika' chuxcut ri nimalaj c'olbal ja' ri c'o pa Gabaon.

¹³ E are' c'u tak ri winak ri e u chapom bic ri Ismael xquil u wäch ri Joanan xukuje' conojel ri e c'amal qui be tak ri ajch'ojab ri e petinak ruc', sibalaj xequicotic,

¹⁴ xetzelej chquij che u junaxic quib ruc' ri Joanan.

¹⁵ Are c'u ri Ismael xukuje' wajxakib chque ri rachijab xecuinic xebanimaj chuwäch ri Joanan xeboc c'ut chupam ri rulew ri Amon.

¹⁶ Are c'u ri Joanan, xukuje' ri e qui nimakil tak ri ajch'ojab ri e achilaninak ri ajch'ojab, ri ixokib ri ac'alab xukuje' ri e c'o nimak tak quekle'n ri xebumulij ulok ri Ismael pa Mizpa ri xebuc'am bic aretak cämisatajinak chic ri Jedaliy rumal, ri xebutzelej ulok ri Joanan pa Gabaon.

¹⁷ Je qui banom wa' xquitakej qui be c'ä xebopan na pa Jerut-quimam, chunakaj ri Belen, c'ä chila' c'u xebetac'al wi. Ri qui chomanic chquetaken c'ä pa Ejipt

¹⁸ rech man querik ta cumal ri aj caldeyib, caquixe'j c'u quib chquiwäch rumal rech chi ri Ismael xucämisaj ri Jedaliy, ri cojom can che k'atal tzij puwi' ri ulew rumal ri ajawinel re Babilon.