Ri Jeremiy 40 - Quiché Bible

Ri Jeremiy cacanaj ruc' ri Jedaliy

¹ Ri Ajawaxel xutzijobej ri Jeremiy, aretak ri Nabuzaradan, takanel paquiwi' ri chajinelab, u tzokopim chic ri Jeremiy ri xurik pa Rama. Ri Nabuzaradan xurik ri Jeremiy yutum cojom pach'um ch'ich' che c'o chquixo'l ri aj Jerusalen xukuje' aj Juda ri cätajin cac'am bic pa Babilon.

² Ri takanel paquiwi' ri chajinelab xuc'am bic ri Jeremiy jela' pa u tuquiel wi, xubij c'u che: “Ri Ajawaxel ri a Dios xucoj xib chi cutak ulok we quiäkasakil ri' puwi' we ulew ri',

³ are c'u ri camic u tz'akatisam ri cojoj xi'b ri xubano. Ri ix je xic'ulmaj wa' rumal rech chi xixmacun chuwäch ri Ajawaxel man c'u xixniman ta che.

⁴ Ampe', kas camic quebenwesaj tak ri tikom ch'ich' ri e ximibem awech. We are cawaj chi catbe wuc' pa Babilon, jo'; in catinwilij na we c'u ne man cawaj catbe wuc', chatcanajok. C'o ronojel ri ulew pa a k'ab: cuya' catbec jawije' ri cawil wi chi utz na chawe.

⁵ We c'u cawaj cattzelejic, chattzelej ruc' ri Jedaliy, u c'ojol ri Ahicam ri' u mam c'ut ri Sapan, ri xcoj can che k'atal tzij paquiwi' tak ri tinimit ri e c'o pa Juda chatjekel c'u ruc' xukuje' ruc' ri a tinimit. Jät jawije' ri cawil wi chi utz na chawe.” Ri takanel c'äte c'u ri' xuya' can jun sipanic che ri Jeremiy xukuje' niq'uiaj jastak chic, chawila' ba' awib xcha' can che.

⁶ Ri Jeremiy xbe ruc' ri Jedaliy pa Mizpa, xjeki' c'u can ruc' xukuje' cuc' ri winak ri e canajinak can pa ri ulew.

Walijisam ib chrij ri Jedaliy

⁷ Conojel c'ut ri e qui nimakil ri ajch'ojab xukuje' ri ajch'ojab ri e c'o cuc' ri qui jabum tak quib pa tak ri juyub aretak xquetamaj chi ri ajawinel re Babilon are xucoj can ri Jedaliy ri u c'ojol ri Ahicam che k'atal tzij puwi' ri ulew, xucoj c'u can paquiwi' ri achijab, ri ixokib xukuje' ri calc'ual ri winak ri sibalaj e mebayib ri e c'o pa ri ulew, ri man xec'am ta bic pa Babilon,

⁸ xebe pa Mizpa xequic'am bic ri winak ri e c'o cuc', che rilic ri Jedaliy. C'o c'ut chquixo'l: ri Ismael, u c'ojol ri Netaniy; ri Joanan xukuje' ri Jonatan, e u c'ojol ri Carey; ri Seariy, u c'ojol ri Tanumet; ri e u c'ojol ri Epay aj Netop; ri Jezaniy, u c'ojol jun achi aj Maacat, xukuje' tak ri rachijab.

⁹ Ri Jedaliy xujiquiba' u bixic chque ri chi'nic ri kas cäban na chque: “Mixe'j iwib che u cojic iwib chuxe' ri qui takanic ri aj caldeyib. Chixcanaj c'u can che jekelem chupam ri ulew, chi cojo iwib chuxe' ri u takanic ri ajawinel re Babilon, utz c'u quixel na.

¹⁰ In quincanaj canok pa Mizpa, che u cojic wib piwi' chquiwäch ri aj caldeyib aretak chepe waral. Ri ix chebic'olo' u wa'l uva, xukuje' ri qui wächinic tak ri ulew xukuje' aseit, je c'u ri' cuya' quixcanaj can chquipam tak ri tinimit ri e i majim.”

¹¹ Xukuje' ri aj judeyib ri e c'o pa Moab, Amon, Edom xukuje' pa jule' tak ulew chic xquetamaj chi ri ajawinel re Babilon u yo'm c'olbal chi xecanaj can jujun aj judeyib pa ri ulew, chi u cojom c'ut ri Jedaliy che k'atal tzij paquiwi'.

¹² Conojel c'ut ri aj judeyib ri qui jabum tak quib pa jalan tak c'olbal xetzelej pa Juda xebe qui tac'aba' tak quib chuwäch ri Jedaliy pa Mizpa. Xukuje' ri e are' xequic'olo' u wa'l uva xukuje' ri qui wächinic tak ri ulew pa nimak tak mulaj.

Cuwalijisaj rib ri Ismael chrij ri Jedaliy

¹³ Ri Joanan, u c'ojol ri Carey, xukuje' conojel ri niq'uiaj takanelab chic paquiwi' ri ajch'ojab ri e canajinak can pa tak ri juyub, xebe pa Mizpa, che rilic ri Jedaliy,

¹⁴ xquibij c'u che: “¿La ma ta aweta'm chi ri ajawinel Baalis aj Amon u takom ulok ri Ismael, u c'ojol ri Netaniy, che a cämisaxic?” Are c'u ri Jedaliy man xucoj taj ri xquibij che.

¹⁵ Xubij c'ut ri Joanan che ri Jedaliy chic'uyal: “Chaya' chwe chi quinbe che u cämisaxic ri Ismael. Ri man c'o ta jun chetamanok jachin xbanowic. ¿Jas ta c'u che cakaya' che chi catucämisaj? Wa' cuc'am ulok ri u tuquixic quib ri aj judeyib ri qui mulin quib awuc', jun yojyobic c'u wa' chque ri aj Juda ri e to'tajinak canok.”

¹⁶ Xutzelej c'ut u bixic ri Jedaliy che: “¡Mabano! Ri cak'abaj chrij ri Ismael man kas ta tzij.”