Ri Jeremiy 37 - Quiché Bible

Ri Sedequiy cätz'onon che ri Jeremiy

¹ Ri Nabucodonosor, ajawinel re Babilon, xucoj ri Sedequiy che ajawinel pa Juda, u c'ojol ri Josiy, che u q'uexwäch ri Jeconiy, u c'ojol ri Joasim.

² Mawi c'u ne ri Sedequiy mawi ri e rach k'atal tak tzij mawi ri tinimit xeniman ta che ri tzij ri u yo'm u bixic ri Ajawaxel chque rumal ri Jeremiy ri k'axal tzij.

³ Ri ajawinel Sedequiy xutak bic ri Jucal, u c'ojol ri Selemiy, xukuje' ri cojol tabal tok'ob Soponiy, u c'ojol ri Maasiy, che rilic Jeremiy, ri k'axal tzij, xequibij c'u che: “Chatch'aw pakawi' ruc' ri Ajawaxel ri ka Dios.”

⁴ C'ä majok c'u chcoj ri Jeremiy pa che', c'ä cäbinicat c'u chquixo'l tak ri winak.

⁵ E elinak chi c'u ulok ri rajch'ojab ri paraon, ri ajawinel pa Ejipt. Aretak xquetamaj ri aj caldeyib ri cätajin quech'ojin ruc' ri Jerusalen, xquik'il quib xetzelejic.

⁶ Ri Ajawaxel c'ut xutzijobej ri Jeremiy, ri k'axal tzij, xuya' c'u takanic che chi chubij chque ri tako'n chi are' cäbinic:

⁷ “Chibij che ri rajawinel ri Juda, ri ix u takom ulok che u tz'onoxic u no'j chwe, chi ri rajch'ojab ri paraon, ri e petinak chic pa ri be che i to'ic, e tzelejinak pa Ejipt.

⁸ Ri aj caldeyib quetzelej chi na ulok che u banic ch'o'j ruc' ri tinimit Jerusalen, caquimajij c'u na caquit'ik c'u na k'ak' che.

⁹ In, ri Ajawaxel, quinya' apan u bixic chiwe: Micu'ba' i c'u'x mawi mibij chi ri aj caldeyib quetzelej ta chquij, man je ta c'u wa'.

¹⁰ Pune' ta c'u ne ri ix quixcuin ta che qui ch'äquic conojel ri ajch'ojab aj caldeyib ri cätajin quech'ojin iwuc' man c'o ta chi c'u ri queto'taj ta chi can chque xane' jujun achijab ri e socotajinak ri e canajinak canok ri e c'o chupam ri kajebal, we achijab ri' quewalij na caquit'ik c'u na k'ak' che ri tinimit.”

Ri u cojic ri Jeremiy pa che'

¹¹ Aretak ri cajch'ojab ri aj caldeyib cätajin quetzelej chquij caquiya' c'u can ri Jerusalen, rumal rech chi xquetamaj chi e petinak ri rajch'ojab ri ajawinel, ri paraon,

¹² ri Jeremiy xel bic pa ri tinimit che u bic pa ri rulew ri Benjamin che u cojic c'u ri u k'ij che u jachic jun echbal chquixo'l ri e u winakil.

¹³ Aretak c'u xopan chuchi' ri Oquibal aj Benjamin, jun achi Iriy u bi', u c'ojol ri Selemiy ri' u mam c'ut ri Hananiy, ri are' qui nimal ri chajinelab, xuk'atij ri Jeremiy xubij c'u che: “¡At catk'ax cuc' ri aj caldeyib!”

¹⁴ Ri Jeremiy xutzelej u bixic: “¡Man kastzij taj, man quinek'ax ta cuc' ri aj caldeyib!” Man xta' ta c'u u tzij rumal ri Iriy, xane' xuchapo xuc'am bic chquiwäch ri k'atal tak tzij.

¹⁵ Wa' xquiban coyowal che ri Jeremiy, xetakanic chi ch'ayok chcoj c'u pa che' chorachoch ri Jonatan, ri tz'ibal tzijol, ri banom u pa che' che.

¹⁶ Ri Jeremiy xetac'al c'ä chupam ri c'axalaj u pa che' ri c'o chuxe' ri ja ri xbeytaj wi q'ui k'ijol.

¹⁷ Ri ajawinel Sedequiy xuya' takanic chi chc'am bic ri Jeremiy chupam ri rachoch ri ajawinel, aretak c'u opaninak chic ri Jeremiy chuwäch ri ajawinel, wa' xuc'ot u chi' chic'uyal: “¿La c'o jun tzijol u yo'm ri Ajawaxel?” Ri Jeremiy xutzelej u bixic: “Je', chi quekaj la pa u k'ab ri rajawinel ri Babilon.”

¹⁸ Ri Jeremiy xuc'ot c'u u chi' ri ajawinel Sedequiy: “¿Jas ri il ri nu banom che la, o chque ri ach tak k'atal tak tzij la, o che ri tinimit, chi in cojom pa che'?

¹⁹ ¿Jawije' e c'o wi ri' ri e k'axal tzij ri xquijiquiba' u bixic chi ri ajawinel re Babilon man cuban ta na c'ax che la, mawi che ri ulew?

²⁰ Tatabej ba la ri quinbij che la wajawinel, chya' ba la chwe ri quentz'onoj che la: Maya' ba la chi quinc'am chi bic jumul chupam ri rachoch ri Jonatan, ri tz'ibal tzijol, minecäm ne chla'.”

²¹ Are c'u ri ajawinel Sedequiy xuya' takanic chi chtz'apix ri Jeremiy cho ri ja ri e c'o wi ri chajinelab chi ronojel c'u k'ij chc'am ulok jun u caxlanwa re pa be ri caquiban ri banal tak wa je c'u xtakex u banic wa' c'ä xq'uis na ri caxlanwa ri c'o chupam ri tinimit. Je c'u wa' ri u canajic ri Jeremiy cho ri ja ri e c'o wi ri chajinelab.