Ri Jeremiy 36 - Quiché Bible

Ri Baruc cusiq'uij ri botobic wuj chupam ri rachoch Dios

¹ Pa ri ucaj junab ri rajawinic ri Joasim, u c'ojol ri Josiy ajawinel re Juda, ri Ajawaxel xutzijobej ri Jeremiy, xubij c'u che:

² “Chac'ama' jun botobic wuj tz'ibabal, chatz'ibaj c'u chuwäch, ronojel ri nu bim chawe che ri cuc'ulmaj na ri Israel, ri Juda xukuje' ri jule' nimak tak tinimit chic, kas aretak xinchaplej a tzijobexic pa tak ri u k'ijol ri Josiy c'ä camic.

³ Caraj ne coc pa qui jolom ri aj Juda conojel ri c'axc'ol ri quinchomaj u c'amic ulok paquiwi', caquiya' ta c'u canok ri itzel qui c'aslemal are c'u ri in quencuyu' ri quetzelal xukuje' tak ri e qui mac.”

⁴ Ri Jeremiy xusiq'uij ri Baruc, u c'ojol ri Neriy, xuya' c'u u bixic che ronojel ri u bim ri Ajawaxel che, xutz'ibaj c'ut ri Baruc pa jubotaj wuj.

⁵ Xebuya' c'ut ri Jeremiy we pixbenic ri' che ri Baruc: “Chawila' ri nu c'ulmam cuk'atij ri nu benam chupam ri rachoch ri Ajawaxel.

⁶ Rumal ri', jät at pa ri k'ij aretak man c'o ta cätijowic, chasiq'uij c'ut ri xatz'ibaj chupam ri botobic wuj ri xinbij chawe, rech ronojel ri tinimit xukuje' conojel ri winak ri e c'o chupam ri tinimit tak re Juda ri e petinak waral, quitatabej ri u bim ri Ajawaxel.

⁷ Caraj ne caquiban bochi'nic che ri Ajawaxel quequiya' ta c'u can conojel ri itzel tak qui nak'atisabal, rumal rech chi ri oyowal xukuje' ri c'axc'obic ri u bim ri Ajawaxel chi quepe puwi' we tinimit ri' sibalaj e xibibal.”

⁸ Ri Baruc xuban ronojel ri xtak che u banic rumal ri Jeremiy ri k'axal tzij: xbe pa ri rachoch Dios xusiq'uij c'ut ri botobic wuj ri c'o wi ri u bim ri Ajawaxel.

⁹ Pa ri ubelej ic' re ri uro' junab ri rajawinic ri Joasim, u c'ojol ri Josiy, ajawinel re Juda, xchomaxic chi, jacha' ri aj Jerusalen e jacha' xukuje' ri e petinak pa niq'uiaj tak tinimit chic re Juda, man cuya' taj quiban wa'im chuwäch ri Ajawaxel.

¹⁰ Ri Baruc xbe chuwäch ri nabe uwo ja rech ri rachoch ri Dios, chuchi' ri C'ac' Oquibal, kas chuchi' ri alaj rachoch ri Jemariy, u c'ojol ri Sapan ri tz'ibal tzijol, xusiq'uij chuwäch ronojel ri tinimit, ri botobic wuj ri e tz'ibatal wi tak ri e u tzij ri Jeremiy.

Ri Baruc cuya' u siq'uibal ri botobic wuj chquiwäch ri e c'o tak quekle'n

¹¹ Ri Micaiy, u c'ojol ri Jemariy ri' u mam ri Sopan, xuta' ronojel ri tzijol ri u yo'm ri Ajawaxel ri xuya' u siq'uibal ri Baruc ri tz'ibatal pa ri botobic wuj,

¹² xbe c'u pa ri rachoch ri ajawinel, chupam ri alaj rachoch ri tz'ibal tzijol, ri qui mulin wi quib conojel ri c'o nimak tak quekle'n: ri Elisam, ri tz'ibal tzijol; ri Delaiy, u c'ojol ri Semaiy; ri Elnatan, u c'ojol ri Acbor; ri Jemariy, u c'ojol ri Sopan; ri Sedequiy, u c'ojol ri Hananiy, xukuje' niq'uiaj chic ri e c'o nimak tak quekle'n.

¹³ Ri Micaiy xutzijoj ronojel ri xuto aretak ri Baruc xusiq'uij ri botobic wuj chuwäch ri tinimit.

¹⁴ Ri e c'o nimak tak quekle'n xquitak u bixic che ri Jehudi, u c'ojol c'ut ri Netaniy, ri' u mam ri Selemiy u xiquin c'u u mam ri Cusi, chi chubij che ri Baruc chi chuc'ama' ulok ri botobic wuj ri u siq'uim u wäch chuwäch ri tinimit. Ri Baruc xuc'am ri botobic wuj xopan c'u chquiwäch,

¹⁵ ri e are xquibij c'u che: “Chatt'uyulok chasiq'uij c'ut ri botobic wuj chkawäch.” Ri Baruc xusiq'uij chquiwäch,

¹⁶ xuwi c'u xtataj cumal, e nojinak che xe'n ib xquica'yela' quib xquibij c'ut: “Cakaya' na u bixic ronojel wa' che ri ajawinel.”

¹⁷ C'äte c'u ri' xquibij che ri Baruc: “Chabij chke jas xaban che u tz'ibaxic ronojel wa'.”

¹⁸ Ri Baruc xutzelej u bixic: “Ri Jeremiy kas are' xbin chwe ronojel, xintz'ibaj c'ut in ruc' tinta chupam ri botobic wuj.”

¹⁹ Xquibij c'u che ri Baruc: “¡Are c'u ri at xukuje' ri Jeremiy jix jic'u' iwib, ma ta c'u c'o jun chetamanic jawije' ri quixc'oji' wi!”

Ri ajawinel Joasim cuporoj ri botobic wuj

²⁰ Ri nimak tak quekle'n xquiya' can ri botobic wuj chupam ri alaj rachoch ri Elisam, ri tz'ibal tzijol xebe c'u pa ri rachoch ri ajawinel xequiya' c'u u bixic ronojel che ri ajawinel.

²¹ Ri ajawinel xutak ri Jehudi che u c'amic ulok ri botobic wuj pa ri alaj rachoch ri Elisam ri tz'ibal tzijol, aretak c'u xc'am taj ulok rumal ri Jehudi, xusiq'uij chuwäch ri ajawinel xukuje' chquiwäch conojel ri e rach k'atal tak tzij ri nimak qui k'ij ri e c'o pa tak u xc'ut.

²² Rumal c'u rech chi are ri ubelej ic', ri ajawinel c'o chupam ri alaj rachoch re sak'ij, chuwäch ri porobal ak'a'l ri nicowisam.

²³ Xuwi c'u quesiq'uitaj oxib o quiejeb ch'akatak rumal ri Jehudi ri ajawinel quebuk'at ruc' jun cuchilo quebuq'uiak pa ri u k'ak'al ri rachak k'ak'. Je xutakej u banic c'ä xuporoj na ronojel ri botobic wuj.

²⁴ Mawi ri ajawinel mawi ri e rach k'atal tak tzij ri nimak qui k'ij ri xquitatabej ronojel ri xya' u siq'uixic, xquixe'j ta quib mawi xquic'utula' chi c'ax ta xbe chque.

²⁵ Ri Elnatan, ri Delaiy xukuje' ri Jemariy xquibochi'j ri ajawinel chi man cuporoj taj ri botobic wuj, are c'u ri are' man xunimaj taj ri quibij che.

²⁶ Xane' xutak ri Jerameel, rija'l ri ajawinel, ri Seraiy, u c'ojol ri Azriel xukuje' ri Selemiy, u c'ojol ri Abdeel, chi chquicojo' ri Jeremiy, ri k'axal tzij, pa che' xukuje' ri Baruc ri rajtz'ib. Xecuy c'ut rumal ri Ajawaxel.

Ri Jeremiy xtakan chi che u tz'ibaxic jun botobic wuj

²⁷ Aretak ri ajawinel u porom chic ri botobic wuj ri e c'o wi ri e u tzij ri Jeremiy ri xubij che ri Baruc chi chebutz'ibaj, ri Ajawaxel xutzijobej ri Jeremiy xubij c'u che:

²⁸ “Chac'ama' chi jun botobic wuj chatz'ibaj chi chupam ronojel ri xtz'ibax chupam ri nabe, ri xuporoj ri Joasim, ajawinel re Juda.

²⁹ Chabij c'u wa' che: ‘Je' wa' cubij ri Ajawaxel a Dios: At xaporoj ri botobic wuj xukuje' xayaj ri Jeremiy rumal rech chi xutz'ibaj chupam chi man c'o ta queblan c'uxaj cäpe na ri ajawinel re Babilon che u sachisaxic u wäch ri ulew chi man e c'o ta winak quebuya' ta can chupam mawi ta ne awaj.

³⁰ Rumal c'u ri', in, ri Ajawaxel, quinbij chawe, Joasim, ajawinel re Juda, chi ri at man c'o ta awija'lil cäcanaj pa ri u tem re ajawibal ri David. At aretak catcämic man catmuk taj catcanaj chuwäch ri u k'ak'al ri k'ij xukuje' chuwäch ri u tewal ri chak'ab,

³¹ are c'u ri at xukuje' ri e awija'lil junam xukuje' ri e a wäch k'atal tak tzij, quinc'äjisaj na i wäch qui mac quech tak ri e i mac. Quinban na chi quebekaj na piwi' ix xukuje' paquiwi' ri aj Jerusalen xukuje' Juda conojel ri nimak tak c'axc'ol ri e nu yo'm quibixic chiwe, ri man xixoc ta wi il chque.’ ”

³² Ri Jeremiy xuc'am chi c'ut jun botobic wuj ri xuya' che ri Baruc, ri rajtz'ib, ri xutz'ibaj ronojel ri xuya' u bixic ri Jeremiy che ri u bixic wa', ronojel ri c'o chupam ri botobic wuj ri u porom ri ajawinel Joasim. Ri Jeremiy xebutik chi na niq'uiaj jastak chic ri quejunamatajic.