Ri Jeremiy 35 - Quiché Bible

Ri Jeremiy xukuje' ri aj recabitab

¹ Pa ri k'ijol aretak ri Joasim, u c'ojol ri Josiy, ajawinel re Juda, ri Ajawaxel Dios xinutzijobej, xubij c'u chwe:

² “Jät chi' cachoch ri aj recabitab chattzijon c'u cuc'. Chebac'ama' c'u bic chebacojo' chupam jun chque ri alaj tak ja ri e c'o chupam ri rachoch Dios, chachi'j c'ut u wa'l uva chque.”

³ In, Jeremiy xinbe che u tzucuxic ri Jaazaniy (u c'ojol chic jun Jeremiy, ri' u mam c'ut ri Habasiniy), xukuje' tak ri e rachalal xukuje' tak ri e qui c'ojol, xukuje' conojel ri aj recabitab,

⁴ xebenc'am c'u bic chupam ri rachoch Dios, xebencoj chupam ri alaj ja ri caquicoj ri e u c'ojol ri Hanan, u c'ojol ri Igdaliy, ri are' jun achi pataninel rech ri Dios. We alaj ja ri' c'o chuxcut ri quech ri c'amal tak be rech ri rachoch Dios puwi' c'ut ri alaj rachoch ri Maasiy, u c'ojol ri Salum, ri cachajin ri oquibal chupam ri rachoch Dios.

⁵ Xebencoj c'u chquiwäch ri aj recabitab xaru' xukuje' tak pajbal e nojinak che u wa'l uva, xinbij c'u chque: “Chiwuq'uiaj jutak bik' iwe ri u wa'l uva.”

⁶ Ri e are' xquitzelej u bixic: “Ri uj man cäkuq'uiaj ta u wa'l uva, rumal rech chi ri Jonadab, u c'ojol ri Recab, ri e ka mam, xuya' takanic chke chi mawi ri uj mawi ri e kija'lil makuq'uiaj u wa'l uva chbe k'ij sak.

⁷ Xukuje' xuya' takanic chke chi mekaban kachoch, mujticonijic xukuje' mekatico o mec'oji' ticbal tak uva kuc'. Xujutako chi amak'el chujjekel pa tak lic'om ja, rech naj cujc'asi' pa we ulew ri' ri xak cujwacatilob wi jacha' ta ne ri ma ta uj aj waral.

⁸ Uj e ka nimam conojel tak ri takanic ri e qui yo'm ri e ka mam chke ri Jonadab, mawi c'u jumul cakuq'uiaj u wa'l uva, mawi tak ri uj mawi tak ri kixokil mawi tak ri e ka c'ojol.

⁹ Mawi quekayac tak kachoch jawije' ri cujjeki' ta wi, mawi e c'o ta ka tico'n e quech tak uva mawi e c'o ta kulew ri quekatic ta qui wäch.

¹⁰ Cujjeki' pa tak lic'om ja cäkatz'akatisaj c'u ronojel ri xujutak wi ri Jonadab ri e ka mam che u banic.

¹¹ Aretak c'u ri Nabucodonosor, ajawinel re Babilon, xoc che u ch'äquic we ulew ri', xkachomaj ka petic pa Jerusalen che kanimajic chquiwäch ri ajch'ojab ri aj caldeyib xukuje' ri aj siriyab; rumal ri' uj jekel camic pa Jerusalen.”

¹² Are c'u ri Ajawaxel xutzijobej ri Jeremiy, xubij c'u che:

¹³ “In, ri Ajawaxel ri c'o ronojel u cuinem xukuje' u Dios ri Israel, catintako chi catbec jabij c'u chque ri winak ri e c'o pa Juda xukuje' ri e c'o pa Jerusalen: ‘Chiwesaj i no'j chebinimaj c'ut ri e nu takanic. In, ri Ajawaxel Dios, quinbij.

¹⁴ Ri e rija'lil ri Jonadab, u c'ojol ri Recab, qui tz'akatisam u banic ri takanic ri xuya' chque chi macuq'uiaj u wa'l uva, xukuje' c'u c'ä pa ri k'ij camic man cäcuq'uiaj taj rumal rech chi qui nimam ri u takanic ri e qui mam. In xukuje' e nu yo'm tak takanic chiwe ri man e ajilatal taj, man c'u in i nimam taj.

¹⁵ E nu takalam conojel tak ri e k'axal tak nu tzij chiwe, che u bixic chiwe: Chi chebiya' can ri itzel i c'aslemal xukuje' ri e itzel tak i banoj. Mixbe che qui terenexic jule' tak diosib chic mawi mebik'ijilaj, we je quiban wa' quixcuin ri' quitakej jekelem chupam ri ulew ri nu yo'm chiwe xukuje' chque ri e i mam. Are' c'u ri ix man xiwaj taj xitatabej taj ri xinbij chiwe mawi ix nimaninak ta chwe.

¹⁶ Ri e rija'lil ri Jonadab, u c'ojol ri Recab, quitz'akatisam ri takanic ri u yo'm ri e qui mam chque; man je ta c'u u banom, ri tinimit man nimaninak ta chwe.

¹⁷ Rumal ri' in, ri Ajawaxel ri c'o ronojel u cuinem xukuje' u Dios ri Israel, quinbij: Quenbana' chi quekaj puwi' ri Juda xukuje' paquiwi' ri winak ri e c'o pa Jerusalen conojel ri c'axc'ol ri nu yo'm u bixic chi cäpe paquiwi'. Ix nu tzijobem c'ut, are c'u ri ix man xiwaj taj xitatabej taj ri xinbij chiwe; ix nu siq'uim, are c'u ri ix man c'o ta jas i tzelem ta u bixic chwe.’ ”

¹⁸ Xubij chi c'ut, ri Jeremiy chque ri aj recabitab: “Ri Ajawaxel ri c'o ronojel u cuinem xukuje' u Dios ri Israel cacha': ‘Rumal c'u rech chi ri ix e i nimam tak ri e u takanic ri e i mam Jonadab, ix oquinak c'u il chque tak ri e u pixab xukuje' i tz'akatisam ronojel ri xixutak wi,

¹⁹ in, ri Ajawaxel ri c'o ronojel u cuinem xukuje' u Dios, ri Israel, quinjiquiba' u bixic chiwe chi mawi jumul ma ta c'o jun rija'lil ri Jonadab ri ma ta chijeki' amak'el chupam ri nu patanijic.’ ”