Ri Jeremiy 34 - Quiché Bible

Tzijol che ri Ajawinel Sedequiy

¹ Aretak ri Nabucodonosor, rajawinel re Babilon, e rachil conojel ri rajch'ojab e re conojel qui wäch winak e re conojel ri nimak tak tinimit re ri ulew ri e c'o chuxe' ri u takanic, cätajin quech'ojin ruc' ri Jerusalen xukuje' cuc' conojel ri c'ulja nimak tak tinimit, ri Ajawaxel xutzijobej ri Jeremiy, xubij c'u che:

² “In, ri Ajawaxel, ri u Dios ri Israel, catintako chi catbe ruc' ri Sedequiy, ajawinel re Juda: ‘Je' wa' cubij ri Ajawaxel: Quenbana' chi we tinimit ri' cak'ax pa u k'ab ri ajawinel aj Babilon, cut'ik c'u na k'ak' che.

³ Ri at man catcuin taj cawesaj awib pa u k'ab; catchap na catjach c'u na pa u k'ab, aretak c'u at c'amom chi bic chuwäch, catc'am bic pa Babilon.

⁴ Pune' c'u jewa', chatatabej, Sedequiy, ajawinel re Juda, ri in, ri Ajawaxel Dios, ri quinbij na chawe: Man catcäm ta na rumal ch'ich' re ch'o'j.

⁵ Catcäm na pa jamaril, quebeporox na tak c'oc'al che ri a mukic, jas ri xeporox chque ri qui mukic tak ri e a mam ri xebajawin nabe chawäch, quecha' c'u na: ¡Ay, ajaw!, cok'ex c'u na la. In, ri Ajawaxel, quinjiquiba' u bixic quinya' c'u ri nu tzij.’ ”

⁶ Ri k'axal tzij ri Jeremiy xuya' u bixic ronojel wa' che ri ajawinel Sedequiy pa Jerusalen.

⁷ E are' c'ut ri e rajch'ojab ri ajawinel re Babilon cätajin cuch'äc ri Jerusalen, ri Lacs xukuje' ri Azec, xuwi c'u tinimit tak wa' re Juda ri c'ä e canajinak ri e c'o pa pimak tak tapia.

Xnak ri c'ulwächinic che qui tzokopixic ri aj hebreyib ri jacha' e lok'om tak pataninelab

⁸ Ri Ajawaxel xutzijobej ri Jeremiy, aretak ri ajawinel Sedequiy u banom chic jun c'ulwächinic cuc' ri winak ri e c'o pa Jerusalen rech quequitzokopila' ri e qui lok'om tak pataninelab.

⁹ Ri c'ulwächinic je cubij wa' chi ri e c'o lok'om tak qui pataninel achijab o ixokib chequitzokopila', rech ma ta c'o jun c'o ta che lok'om pataninel jun u winakil aj judey.

¹⁰ Conojel ri c'ämal tak be xukuje' ronojel ri tinimit xquic'amowaj ri cubij ri c'ulwächinic, xequitzokopila' c'ut ri e qui lok'om tak pataninelab man xquicoj ta chi chuk'ab chque chi chepatanix cumal.

¹¹ Chwi chi c'ut xquiq'uex ri qui chomanic chi xequitzokopij bic, xquicoj chi c'u chuk'ab chque chi chetzelej chi che qui patanixic jumul jacha' e lok'om tak pataninelab.

¹² Xtzijobex c'ut ri Jeremiy rumal ri Ajawaxel, xubij c'u che:

¹³ “In, ri Ajawaxel, ri u Dios ri Israel, xinban jun c'ulwächinic cuc' ri e i mam aretak xebenwesaj ulok pa Ejipt, ri xepatanij wi jacha' lok'om pataninelab. Xinya' takanic chque

¹⁴ chi chuwukutak junab chequitzokopij apachique aj hebrey ri u c'ayim rib cuc' ri e u patanim chic wakib junab. E are' tak c'ut ri e i mam man xquiya' ta qui xiquin chwe mawi xeniman ta chwe.

¹⁵ Are c'u ri ix xiq'uex ri i chomanic, i banom c'ut ri cäkaj chnuwäch, aretak xebitzokopila' tak ri e i winakil jacha' lok'om tak pataninelab. Xiya' c'u i tzij che u banic jun c'ulwächinic ri banom chnuwäch, chupam ri wachoch ri tasom chwe.

¹⁶ Xiq'uex chi c'ut ri i chomanic, man nim ta xiwil wi ri nu bi', xebicoj chi chuk'ab chque ri lok'om tak pataninelab ri' ri e i tzokopim canok rech quixpatanix chi jumul cumal jacha' lok'om tak pataninelab.

¹⁷ Je c'u ri', in, ri Ajawaxel, quinbij: Ix man xixniman ta chwe, man c'u xebitzokopila' taj ri e i winakil ri e i cojom che pataninelab; rumal ri', camic in quebentzokopij ri ch'o'j ri cämisanel yabil xukuje' ri wi'jal rech quequiban jun jasach chiwe ri cuya' xibin ib chque conojel ri ajawibal cho ri uwächulew. In, ri Ajawaxel, quinjiquiba' u bixic.

^18-19 Ri e c'amal tak be pa Juda xukuje' pa Jerusalen, e cachil ri pataninelab re ri rachoch ri ajawinel, ri e cojol tabal tok'ob xukuje' conojel ri e niq'uiaj tak qui winakil chic xquiban jun c'ulwächinic chnuwäch: xquiban quieb che jun alaj ama' wacax xeboc'ow c'u chquixo'l ri quieb ch'akatak. Man nim ta xquil wi ri c'ulwächinic man xquitz'akatisaj ta c'ut ri xquiya' qui tzij che u banic.

²⁰ Rumal c'u ri', quinban na chi quekaj pa qui k'ab ri quec'ulelanic ri e cämel, are c'ut ri cäminak tak qui cuerp quebajwataj che qui ti' tak ri c'uch xukuje' chque tak ri juyubal tak awaj.

²¹ Xukuje' quenbana' chi ri Sedequiy, ajawinel re Juda xukuje' tak ri e rach tak k'atal tzij chekaj pa qui k'ab ri quec'ulelanic ri e cämel, pa qui k'ab ri e rajch'ojab ri ajawinel re Babilon, ri qui tanabam u banic ch'o'j iwuc' camic.

²² Quebentakchi'j chi che tzelej ulok che u banic c'ax che we tinimit ri' chech'ojin c'u ruc', chumajij c'ut chut'ika c'u k'ak' che. Quenbana' c'ut chi ri niq'uiaj tak tinimit chic re Juda che tolobaxok man c'o ta jun winak chcanaj ta chquipam. In, ri Ajawaxel, quinjiquiba' u bixic.”