Ri Jeremiy 33 - Quiché Bible

Cäya' u bixic ri eyebal c'ux

¹ C'ä tz'apil c'u ne na ri Jeremiy cho ri uwo ja ri e c'o wi ri chajinelab, ri Ajawaxel xutzijobej chi jumul ri Jeremiy, xubij c'u che:

² “In, ri Ajawaxel, ri xinban ri ulew, ri xinya' u ca'yebal co c'ut xintiq'uiba' pa ri u c'olbal, quinbij chawe:

³ Chinasiq'uij quintzelej c'u na u wäch ri a tzij, quinya' c'u na qui bixic nimak tak jastak chawe ri e awatalic ri man e aweta'm taj.

^4-5 In, ri Ajawaxel, ri u Dios ri Israel, c'o jun tzijol wuc' chque ri caquic'ulmaj na ri ja ri e c'o pa Jerusalen xukuje' chque tak ri cachoch tak ri ajawinelab re Juda ri quebewilixok. Ri elem bic che u banic ch'o'j che qui cojic tak ch'ich' re ch'o'j chque ri aj caldeyib ri quequiyac tak ak'anibal che u banic c'ax che ri tinimit, xuwi cajwataj che qui nojisaxic chque cäminakib. In, pa ri xibibalalaj woyowal, quinban na chque chi quecämic, man quebenca'yej ta chi c'u we tinimit ri' qui mac quech ri jumulaj etzelal ri e qui banom.

⁶ Quebencunaj c'u na, quinya' na ri rutzil qui wäch quinban c'u na chi ruc' nim ilic quec'oji' na pa jamaril xukuje' ruc' jiquiban c'uxaj.

⁷ Quinq'uex na ri cutaklebej na ri Juda xukuje' ri rech ri Israel, quinban chi c'u na qui banic rech je quebuxic jacha' ri pa ri chaplebal.

⁸ Quebench'ajch'ojirisaj na chque conojel tak ri qui mac ri xequiban che nu c'ulelaxic; quebencuy na conojel tak ri etzelal ri xequibano ri xequiwalijisabej wi quib chwij.

⁹ Ri Jerusalen cux na chwe che jun yabal quicotemal, nimarisabal k'ij, xukuje' juluwem chquiwäch conojel ri nimak tak tinimit ri e c'o cho ri uwächulew. Aretak ri e are' chequita' qui tzijoxic conojel tak ri utzalaj tak jastak ri quinc'am na ulok paquiwi' ri winak ri e c'o pa Jerusalen, xukuje' ronojel ri telechinic ri quenya' na che, quebirbob na rumal xe'n ib.”

¹⁰ Cächa ri Ajawaxel: “Quixcha' ix chi tolon we c'olbal jamalic chi man e c'o ta winak chupam mawi awaj; chi ri u xo'l tak ja re ri Jerusalen xukuje' ri quech tak ri tinimit tak e aj Juda e tolonic; chi man c'o ta jachin jun, mawi winak mawi awaj, e jekel ta chila'. Pune' c'u je cabij wa',

¹¹ waral quetataj chi na ri e tak bix quech tak nimak'ij xukuje' quicotemal, xukuje' ri qui bix tak ri caquibochi'j tak quib, cätataj c'u na u bixic: ‘Chiya' maltioxinic che ri Ajawaxel Dios ri c'o ronojel u cuinem, rumal rech chi utz ri Ajawaxel, junalic c'ut ri u lok'ok'ebal c'uxaj.’ Quequic'am c'u na ulok tak sipanic re maltioxinic chupam ri wachoch. Je quinq'uex na ri cutaklebej we ulew ri', rech je cux chi na jacha' pa ri chaplebal. In, ri Ajawaxel quinjiquiba' u bixic.”

¹² Cächa ri Ajawaxel ri c'o ronojel u cuinem: “Chupam we ulew ri' ri uxinak chaki'j uwo sak, ri man e c'o ta wi winak mawi awaj xukuje' pa conojel ri u tinimit tak, queq'uiy chi na echa' ri quequic'am wi na bic tak ri ajyuk'ab ri e qui jumulaj.

¹³ Jas ri pa ri tinimit tak ri e c'o chupam ri rulewal ri c'ache'laj jacha' xukuje' ri e c'o pa ri lianic, xukuje' ri e c'o pa ri Negueb xukuje' chupam ri rulewal ri Benjamin, xukuje' ri e c'o pa tak u xcut ri Jerusalen xukuje' pa ri niq'uiaj ri u tinimit tak chic ri Juda, queilitaj chi na ri ajyuk'ab ri quecajilaj tak ri e qui chij. In, ri Ajawaxel, quinbij.”

¹⁴ Ri Ajawaxel cujiquiba' u bixic: “Copan na ri k'ij aretak quebetz'akat tak ri chi'nic re tewichinic ri xebenchi'j che ri tinimit Israel xukuje' ri re ri Juda.

¹⁵ Aretak chopan we k'ijol ri' xukuje' we k'ij ri', quinban na chi ri David c'o na jun kas rija'lil, ri cujekeba' na ri suq'uilal xukuje' ri colomal chupam ri ulew.

¹⁶ Pa we k'ijol ri' ri Juda man c'o ta cuc'ulmaj na xukuje' ri Jerusalen cajeki' na pa jiquiban c'uxaj. Are c'u bi'aj wa' ri caquinatabej rech: ‘Ri Ajawaxel Dios are' ka ch'äcanem.’

¹⁷ In, ri Ajawaxel, quincha': Mawi jubik' ma ta c'o jun rija'lil ri David ri ma ta cat'uyi' na puwi' ri tem re ajawibal aj Israel,

¹⁸ mawi ma ta e c'o na cojol tabal tok'ob e rija'lil ri Levi ri ronojel k'ij quequichi'j tabal tok'ob chwe ri quechajirisaxic, quequiporoj tabal tak tok'ob re c'äj che u ya'ic nu k'ij tabal tak tok'ob chwe k'ij chi k'ij.”

¹⁹ Ri Ajawaxel xutzijobej ri Jeremiy, xubij c'ut:

²⁰ “In, ri Ajawaxel, quicha': Man bantajel taj chi ma ta cätz'akat ri c'ulwächinic ri nu banom ruc' ri pa k'ij xukuje' ruc' ri chak'ab, jeri' chi ri pa k'ij xukuje' ri chak'ab ma ta quebopan kas pa ri qui k'ijol.

²¹ Jewa' xukuje', man bantajel taj chi ma ta quetz'akat ri nu c'ulwächinic ri nu banom ruc' ri pataninel wech ri David, ma ta c'u ne c'o jun rija'lil ri cajawin ta na puwi' ri u tem re ajawibal, o chi ma ta chtz'akat ri c'ulwächinic cuc' tak ri e nu tako'n ri e cojol tabal tok'ob ri e rija'lil ri Levi.

²² Xukuje' cuc' ri e rija'lil ri David ri pataninel wech, xukuje' cuc' tak ri e nu pataninelab ri e rija'lil ri Levi, quinban na chque chi man quebajilataj taj e jacha' ri ch'imil re ri caj xukuje' ri qui wäch tak ri sanyeb re ri plo, ri man c'o ta jun cäcuinic querajilaj.”

²³ Ri Ajawaxel xutzijobej ri Jeremiy, xubij c'u che:

²⁴ “¿La ma ta a tom chi quecha' ri winak chi wetzelam qui wäch ri cak'at winak ri kas in in chowinak, ri Israel xukuje' ri Juda? ¡Rumal rech wa' man nim ta chic cäquil wi ri nu tinimit, man c'u jun nim tinimit ta chic chquiwäch!

²⁵ Are c'u ri in, ri Ajawaxel, quinbij: In, ri nu banom jun c'ulwächinic ruc' ri k'ijil xukuje' ruc' ri chak'ab, ri e nu cojom tak pixab ri quetakan puwi' ri caj xukuje' puwi' ri uwächulew,

²⁶ mawi jubik' chinwetzelaj ta na qui wäch ri e rija'lil ri Jacob xukuje' ri e rech ri David ri pataninel wech, mawi quinya' ta c'olbal chi quebesax ta chquixo'l ri quetakan paquiwi' ri e rija'lil ri Abraham, ri Isaac xukuje' ri Jacob. Rumal rech chi ri in quel na nu c'u'x chque quinban c'u na chi caq'uextaj ri caquitaklebej.”