Ri Jeremiy 32 - Quiché Bible

Ri Jeremiy culok' jun ulew

¹ Ri Ajawaxel xtzijon ruc' ri Jeremiy pa ri ulajuj junab re ri rajawinic ri Sedequiy pa Juda, are c'u uwajxaklajuj junab ri rajawinic ri Nabucodonosor.

² Pa ri k'ijol ri' ri e rajch'ojab ri ajawinel re Babilon cätajin quech'ojin ruc' ri Jerusalen, are c'u ri Jeremiy ri k'axal tzij tz'apital cho ri uwo ja rech ri rachoch ri ajawinel ri e c'o wi ri chajinelab.

³ Xtak c'u u tz'apixic rumal ri ajawinel Sedequiy, rumal rech chi u bim ri Jeremiy: “Cächa ri Ajawaxel: ‘Quenbana' chi we tinimit ri' cakaj pa u k'ab ri ajawinel re Babilon,

⁴ are c'u ri ajawinel Sedequiy man cäto'taj ta na pa qui k'ab ri aj caldeyib, xane' cäkaj na pa u k'ab ri ajawinel re Babilon cutac'aba' c'u na rib chuwäch.

⁵ Ri Nabucodonosor cuc'am na bic ri Sedequiy pa Babilon, ri cacanaj wi na canok c'ä chnataj chi na chwe. Pune' quixch'ojin ri ix cuc' ri aj caldeyib, man utz ta quixel na. In, ri Ajawaxel, quinjiquiba' u bixic.’ ”

⁶ Xubij c'ut ri Jeremiy: “Ri Ajawaxel xinutzijobej, xubij c'u chwe:

⁷ ‘Ampe', ri awachalaxic Hanameel, ri u c'ojol ri a wican Salum, cäpe na che u bixic chawe chi chalok'o' ri rulew ri c'o pa Anatot, at ri ya'tal chawe calok'o rumal rech chi at ri achalaxic ri c'o na nakaj.’

⁸ Je c'u xelic jacha' ri xubij ri Ajawaxel chwe, ri wachalaxic Hanameel xpe che wilic cho ri uwo ja ri e c'o wi ri chajinelab xubij c'u chwe chi chinlok'o' ri rulew ri c'o pa Anatot, ri c'o pa ri rulewal ri ramak' ri Benjamin, ya'tal c'u chwe chi in ri quinlok'owic cäcanaj c'u can wuc', rumal rech chi in ri rachalaxic ri nakaj in c'o wi che. Aretak c'u xinch'obo chi u takanic ri Ajawaxel Dios wa',

^9-10 xinlok' ri rulew Hanameel ri wachalaxic. Xebenjach waklajuj rakan sak puak che, are c'u rajil wa' ri xk'atic, xinban c'u wuj che ri xuc'ulaj wi rib ka tzij, xt'ikic xquitz'ibaj ri qui bi' ri k'alajisanelab.

¹¹ Xinc'am c'ut ri quieb wujil re ri c'ulwächinic, jun ri t'ikom ri cubij wi ri u cholajil ri xlok'ic, ri jun chi c'ut ri jakalic,

¹² xebenjach c'u pa u k'ab ri Baruc, u c'ojol ri Neriy ri' u mam c'ut ri Maasiy, chuwäch ri Hanameel ri wachalaxic, chquiwäch c'u ri k'alajisanelab ri qui cojom ri qui bi' che ri xuc'ulaj wi rib ka tzij chquiwäch c'u conojel ri aj judeyib ri e t'uyut'oj cho ri ja ri e c'o wi ri chajinelab.

¹³ Chquiwäch wa' xinbij che ri Baruc:

¹⁴ ‘Ri Ajawaxel ri c'o ronojel u cuinem, ri u Dios ri Israel, cacha': Chac'ama' ri quieb wujil ri banom wi ri c'ulwächinic, ri t'ikom xukuje' ri jakalic chebacolo' chupam jun colobal re bo'j, rech naj caquich'ijo.

¹⁵ Are c'ut ri Ajawaxel ri c'o ronojel u cuinem, ri u Dios ri Israel cacha': Chupam we ulew ri' quebelok' chi na tak ja, ulew xukuje' ticbal tak uva.’ ”

U ch'awem ri Jeremiy ruc' Dios

¹⁶ “Aretak e ya'tajinak chic ri e u wujil ri xlok'ic che ri Baruc, u c'ojol ri Neriy, xinban we ch'awem ri' ruc' Dios:

¹⁷ ‘Lal, Ajawaxel, ruc' nimalaj u liq'uic ri cuinem la xban la ri caj xukuje' ri ulew. Man c'o ta jun jasach ri ma ta cacuin la chubanic.

¹⁸ Ri lal cac'ut la ri lok'ok'ebal c'u'x la c'ä chi jun mil (1,000) ija'lil, xukuje' c'ut cäc'äjisaj la qui wäch ri winak rumal rech ri qui mac tak ri qui tat. ¡Oh nimalaj Dios xukuje' c'o cuinem la, ri bi' la Ajawaxel c'o ronojel u cuinem!

¹⁹ Lal nim banic la pa tak ri e chomanic la c'o c'u cuinem la pa tak ri e chac la. Lal quil la ronojel ri caquiban ri winak caya' c'u la chque chquijujunal jachique ri takal chque tak ri e qui banoj.

²⁰ Lal xeban la tak mayibal xukuje' tak etal pa Ejipt, xukuje' c'u ne camic takem la qui banic pa Israel jacha' xukuje' chquixo'l tak ri winak, jeri' chi ri bi' la uxinak nim u k'ij.

²¹ Lal, ruc' ri nimalaj u liq'uic ri cuinem la, xesaj la ulok pa Ejipt ri tinimit la Israel, xeban tak la mayibal xukuje' tak etal xenojisaj c'u la conojel ri winak che xibin ib.

²² Xya' la che ri Israel we ulew ri' ri cabelel wi ri leche xukuje' ri juyubal räx cab jacha' ri ja', je jas ri xchi'j la chque ri e qui mam.

²³ Aretak c'u xeboc chupam ri ulew xeboc c'u che rechbexic, man xeniman ta che la mawi xebequitakej ri qui banic tak ri pixab ri xeya' la chque, mawi c'o xquiban chque ri xetak la che qui banic. Rumal ri' xtak la ulok ronojel we nimalaj c'axc'ol ri' paquiwi'.

²⁴ Are c'u ri aj caldeyib e qui banom ak'anibal che u banic c'ax che ri tinimit, ri ch'o'j, ri wi'jal ri cämisanel yabil caquiban na chi ri tinimit cäkaj pa qui k'ab ri e banal tak c'ax. Ajawaxel, quil la chi cätajin cätz'akat ri xya' la u bixic.

²⁵ Xintakchi'j c'u ne la, Ajawaxel, chi quinlok'o' xukuje' quintoj we ulew ri' chquiwäch k'alajisanelab, pune' ta c'u ne cäkaj ri tinimit pa qui k'ab ri aj caldeyib.’ ”

²⁶ Xutzelej c'ut u bixic ri Ajawaxel che ri Jeremiy:

²⁷ “In ri' ri Ajawaxel, ri u Dios ronojel c'aslic. Man c'o ta jun jasach ri ma ta quincuin chubanic.

²⁸ Je c'u ri', in quinbij chawe: Quenbana' chi we tinimit ri cäkaj pa u k'ab ri Nabucodonosor, rajawinel ri Babilon, xukuje' pa qui k'ab ri aj caldeyib.

²⁹ Ri aj caldeyib cätajin caquiban c'ax che ri tinimit queboc c'u na chupam caquit'ik c'u na k'ak' che; caquiporoj na junam cuc' tak ri ja ri queporox tak wi c'oc' k'ol paquiwi' rachil u wa'l uva che ri Baal xukuje' quecoj wi tak tabal tak tok'ob chque tak diosib chic.

³⁰ Kas pa ri chaplebal, ri tinimit Israel xukuje' ri tinimit Juda qui banom ulok amak'el ri man cäkaj ta chnuwäch; ri aj israelib man qui tanabam ta u yaquic woyowal cumal tak ri diosib ri kas e are' xebanow chque. In, ri Ajawaxel Dios, quinjiquiba' u bixic.

³¹ Are c'u we tinimit ri' kas pa ri k'ij aretak xchaplex u yaquic c'ä pa ri k'ij ri', man c'o ta jas ri u banom xane' xak xuwi ri u yaquic ri woyowal xukuje' ri nu c'anal. Rumal ri' quenbana' che chi quel chnuwäch,

³² rumal ronojel ri c'axc'obenic ri qui banom chwe cumal tak ri itzel ri e qui banom ri tinimit aj Israel xukuje' ri tinimit aj Juda, xak junam qui banom tak ri e cajawinelab, ri e c'ämal tak qui be, ri e qui cojol tabal tok'ob, ri e k'axal tzij ri e c'o cuc' xukuje' conojel tak ri winak ri e c'o pa Juda xukuje' ri e c'o pa Jerusalen.

³³ Quiyo'm can ri quij chnuwäch, man are ta c'ut ri qui palaj. Man c'o ta c'u ne jok'otaj ri nu tanabam ta qui pixbexic, man e nimaninak ta chwe mawi cajawam quic'amowaj ta ri pixbenic.

³⁴ C'ä cawasim ne ri wachoch ri tasom chwe, e quicojom chila' ri e qui diosib ri e xawebal.

³⁵ Xukuje' xequiyac tak porobal che ri Baal chupam ri u Beya' ri Ben-inom, che qui kawisaxic tak ri qui c'ojol xukuje' tak ri qui mia'l che u ya'ic tabal tok'ob che ri Moloc, xquikasaj c'u ri Juda pa macaj, jun jasach wa' ri xawebal ri man xebentak ta wi ri mawi ne xoc'ow pa ri nu chomanic.”

Cächi'xic ri cäpe na

³⁶ “In, ri Ajawaxel, ri u Dios ri Israel, quinbij che we tinimit ri' ri cabij at chi cakaj na pa u k'ab ri ajawinel re Babilon rumal ri ch'o'j, ri wi'jal xukuje' ri cämisanel yabil:

³⁷ Quebenmulij ri e u winakil chquixo'l tak ri ulew jawije' tak ri xebenjabuj wi aretak xinnoj che c'anal, oyowal xukuje' k'ak'al, quebentzelej c'u na ulok chupam we c'olbal ri' rech quec'oji' pa utzil chupam.

³⁸ Ri e are' quebux na nu tinimit, are c'u ri in quinux na qui Dios.

³⁹ Quinban na chi xuwi c'o chic qui rayinic xukuje' qui yo'm chic qui tzij che u ya'ic nu k'ij ronojel ri qui c'aslemal che ri kas cutzil xukuje' chque ri quija'lil.

⁴⁰ Quinban na jun junalic c'ulwächinic cuc': quinya' na nu tzij chi mawi jubik' quintanaba' na u banic utzil chque, quebennojisaj c'u na che rayinic chi xuwi caquiya' na nu k'ij xukuje' chi mawi jubik' caquitas ta chi na quib chwij.

⁴¹ In quinquicot na che u banic utzil chque, ruc' c'u ronojel wanima' xukuje' ruc' ronojel jicomal quinban na chque chi quejeki' chupam we ulew ri'.”

⁴² Ri Ajawaxel xutik u bixic: “Jacha' ri xinban che u takic ulok we nimalaj c'axc'ol ri' puwi' we tinimit ri', xukuje' quebentak na ulok conojel tak ri utzil ri e nu chi'm che.

⁴³ Chupam c'ut we ulew ri', ri cabij chi cätoli' canok, ri man e c'o ta chi wi winak mawi awaj, chi cäkaj c'u na pa qui k'ab ri aj caldeyib, quelok' chi na ulew.

⁴⁴ Quelok' na quetz'ibax c'u na ri c'ulwächinic ri quequibano, ruc' t'ikbal xukuje' quequitz'ibaj tak ri qui bi' ri k'alajisanelab chuxe'. Queban c'u je tak wa' pa ri rulew ri Benjamin, pa tak u xcut ri Jerusalen xukuje' chquipam ri tinimit tak re Juda, je queban wa' pa tak ri ulew ri e c'o wi c'ache'laj jacha' xukuje' pa ri lianic, xukuje' chquipam ri tinimit tak ri e c'o pa ri Negueb, quinban c'u na chi cuq'uex ri cutaklebej ri nu tinimit. In, ri Ajawaxel, quinjiquiba' u bixic.”