Ri Jeremiy 29 - Quiché Bible

U wuj ri Jeremiy chque ri e c'amom bic pa jun ulew chic

^1-2 Aretak c'u c'amtajinak chi bic ri ajawinel Jeconiy pa jun ulew chic, junam ruc' ri u nanaxel, ri pataninelab re ri rachoch ri ajawinel, ri e c'amal tak be pa Juda xukuje' pa Jerusalen, ri e nawinelab tak ajchaquib xukuje' ri e ch'ayal tak räx ch'ich', ri Jeremiy ri k'axal tzij kas pa Jerusalen c'o wi xutak bic jun wuj chque ri e qui tz'akatil ri nimak tak tatayib ri xecanaj canok chque ri xec'am bic pa jun ulew chic, xukuje' ri e cojol tabal tok'ob, k'axal tak tzij xukuje' chque ri winak ri xebuc'am bic ri ajawinel Nabucodonosor pa Jerusalen xebuya' pa Babilon.

³ We wuj ri' xc'am bic rumal ri Elas, u c'ojol ri Sapan, xukuje' ri Jemariy, u c'ojol ri Hilsiy, ri xetak bic rumal ri Sedequiy, ajawinel re Juda, pa Babilon che copanem chuwäch ri Nabucodonosor. Ri wuj je cubij wa':

⁴ “Je' wa' cubij ri Ajawaxel ri c'o ronojel u cuinem, ri u Dios ri Israel, chque conojel ri xuban wi chi xebesax bic pa Jerusalen xec'am c'u bic pa Babilon:

⁵ ‘Chebibana' iwachoch chixjekelok; chebitica' wächinel tak che' chebitija' c'ut ri qui wäch.

⁶ Chixc'ulanok, chec'ol i c'ojol xukuje' tak i mia'l, xukuje' c'u ri e are' chec'ulanok chec'ol c'u calc'ual. Chixq'uiyirok c'u chila', mabe c'ut i q'uisic.

⁷ Chixchacun che u lok'exic ri tinimit ri ix nu c'amom wi ulok, chi tz'onoj c'u tok'ob chwe puwi', rumal rech chi che ri rutzil qui c'am wi ri utzil chiwe.

⁸ In, ri Ajawaxel ri c'o ronojel u cuinem, ri u Dios ri Israel, quinya' u bixic wa' chiwe: Miya' iwib chi quixquisub ri e k'axal tak tzij xukuje' ri ch'obanelab ri e jekel chixo'l ix; miya' i xiquin chque tak ri ichic' ri quequibanala'.

⁹ Ri quequiya' tak qui bixic chiwe pa ri nu bi' xa' banoj tzij. In man e nu takom ta bic. In, ri Ajawaxel, quinjiquiba' u bixic.’

¹⁰ Ri Ajawaxel cubij: ‘Aretak chetz'akat ri oxc'al lajuj (70) junab che ri Babilon, quinya' na ri to'banic chiwe ix quintz'akatisaj c'u na ri nu chi'nic chiwe ri sibalaj man c'o ta c'o wi chi quinban chiwe chi quixtzelej chupam we c'olbal ri'.

¹¹ In e weta'm ri chomanic ri e c'o wuc' chiwe, chomanic che u banic utzil chiwe man che ta etzelal, che u ya'ic jun eyebal c'uxaj ri cäpe na. In, ri Ajawaxel, quinjiquiba' u bixic.

¹² C'äte c'u ri' ri ix quixtz'onon na chwe, quixtzijon c'u na wuc' quixintatabej c'u na.

¹³ Quinitzucuj na quinirik c'u na, rumal rech chi quinitzucuj na ruc' ronojel iwanima'.

¹⁴ Je, in quinya' c'u na c'olbal chiwe chi quiniriko, quinban c'u na chi quinq'uex ri qui taklebej: quixinwesaj na chquixo'l ri nimak tak tinimit xukuje' pa tak ri c'olbal jawije' tak ri xixinjabuj wi, quixinmulij c'u na quinban c'u na chi quixtzelej chupam we c'olbal ri' ri xixinwesaj wi bic. In, ri Ajawaxel, quinjiquiba' u bixic.’

¹⁵ Ix quibij: ‘Ri Ajawaxel e u yo'm k'axal u tzij chke pa Babilon.’

¹⁶ (Ri Ajawaxel cubij ri cuc'ulmaj na ri ajawinel ri cat'uyi' na puwi' ri u tem re ajawibal ri David xukuje' ri caquic'ulmaj na ri winak ri e c'o chupam we tinimit ri', ri e iwachalaxic ri man xec'am ta ulok iwuc' chupam ri ulew ri ix c'amom wi ulok:

¹⁷ ‘In, ri Ajawaxel ri c'o ronojel u cuinem, quinbij: Quentaka' ulok ch'o'j, wi'jal xukuje' cämisanel yabil. Quenbana' chi je quecanajic e jacha' we k'ayinak tak higo ri', rumal c'u rech chi sibalaj man e utz taj man cuya' taj quetijic.

¹⁸ Quebenc'axc'obisaj ruc' ch'o'j, wi'jal xukuje' cämisanel yabil. Quinban na chi conojel ri nimak tak tinimit ri e c'o cho ri uwächulew cäquetzelaj na qui wäch aretak quequilo, quinban c'u na chque chi' quebux na elesabal tak no'j re c'okonic xukuje' re q'uixbal, pa jun jasach ri cuya' tze'bal xukuje' xe'n ib pa conojel ri nimak tak tinimit ri e nu jabum tak wi.

¹⁹ Rumal rech chi man xquiya' ta qui xiquin chque tak ri pixbenic ri xinban chque cumal ri e pataninelab wech ri e k'axal tak tzij, ri xibentak ulok quieb oxib mul chiwe, man c'u xiwaj taj xebitatabej. In, ri Ajawaxel, quinjiquiba' u bixic.

²⁰ Chebinimaj ba', ri nu tzij, iwonojel ri xinban chiwe chi xixesax bic pa Jerusalen xixc'am c'u bic pa Babilon.’)

²¹ Ri Ajawaxel ri c'o ronojel u cuinem, ri u Dios ri Israel, cuya' u bixic ri cuc'ulmaj na ri Acab, u c'ojol ri Colaiy, xukuje' ri cuc'ulmaj na ri Sedequiy, u c'ojol ri Maasiy, ri quequibij qui cawäch tak jastak chiwe pa ri u bi' ri Ajawaxel: ‘Quenbana' chque chi quekaj pa u k'ab ri ajawinel Nabucodonosor re Babilon, are' c'ut ri are' quecämisan na chiwäch ix.

²² Jeri' ri e aj Juda ri e c'amom bic pa jun ulew chic ri e c'o pa Babilon cäcaj caquic'okoj jachin jun, quecha' na: Ri Ajawaxel chubana' chawe jacha' ri xuban che ri Sedequiy xukuje' che ri Acab, ri xebusa' ri ajawinel cho k'ak'.

²³ U mac rech chi xquiban etzelal pa Israel: xekaj pa tak mac cuc' tak ri quixokil ri cajil quitz'akat, xequibij c'u jastak pa ri nu bi' ri xa' e banoj tak tzij ri man xebentak ta che qui bixic. In, ri Ajawaxel, quinjiquiba' u bixic.’ ”

Tzijol che ri Semaiy

²⁴ Ri Ajawaxel xuya' takanic che ri Jeremiy chi chubij che ri Semaiy aj Nehelam:

²⁵ “Ri Ajawaxel ri c'o ronojel u cuinem, ri u Dios ri Israel, cacha': ‘At xatak pa ri kas a bi' jun wuj che ronojel ri tinimit ri c'o pa Jerusalen, xukuje' che ri cojol tabal tok'ob Soponiy, u c'ojol ri Maasiy, xukuje' chque conojel tak ri e cojol tabal tok'ob. Chupam ri wuj cabij wi che ri Soponiy:

²⁶ Ri Ajawaxel at u cojom jacha' cojol tabal tok'ob pa ri u c'olbal ri Joiad, rech at ri takanel ri nim na u k'ij chupam ri rachoch Dios. We cäwalij jun ch'u'j cuchaplej c'u tzijonem jacha' jun k'axal tzij, rajawaxic cäcoj at chupam ri cojbal akan jun pach'um ch'ich' c'ut cayutbej rech.

²⁷ ¿Jas c'u che man ak'ilom taj ri Jeremiy aj Anatot, ri u takem tzijonem chiwäch jacha' jun k'axal tzij?

²⁸ U takom c'u ne ulok jun wuj chke pa Babilon, ri je cubij wa' chupam: Ri i c'olem pa jun ulew chic sibalaj naj cäbeytaj na; chebiyaca' iwachoch chi jekeba' c'u iwib, xukuje' chebitica' wächinel tak che' chebitija' c'u tak ri qui wäch.’ ”

²⁹ Ri Soponiy ri cojol tabal tok'ob xusiq'uij ri wuj chuxiquin ri Jeremiy.

³⁰ Are' c'u ri Ajawaxel xuch'abej ri k'axal u tzij, xubij c'u che':

³¹ “Chataka' u bixic chque ri e c'o chupam ri jun ulew chic chi in, ri Ajawaxel Dios, quinbij chque: Rumal rech chi ri Semaiy re Nehelam ix u tzijobem pa ri nu bi' ri man takom ta wumal, u yo'm c'ut jun u cawäch cu'lbal c'uxaj,

³² in, ri Ajawaxel, quinbij chi quenc'äjisaj u wäch ri Semaiy xukuje' ri rija'lil. Man quecanaj ta rija'lil chupam ri nu tinimit, mawi curik ta na rech ri utzil ri quenya' na che ri nu tinimit, rumal c'u rech chi cumal tak ri e u tzij xuc'am bic che nu c'ulelaxic. In, ri Ajawaxel, quinjiquiba' u bixic.”