Ri Jeremiy 28 - Quiché Bible

Ri Jeremiy xukuje' ri k'axal tzij ri Hananiy

¹ Chupam ri uro' ic' re ri junab, che ri u bixic, re ri ucaj junab re ri rajawinic ri Sedequiy pa Juda, ri k'axal tzij ri Hananiy, u c'ojol ri Azur, ri aj tinimit Gabaon, xutzijobej ri Jeremiy chupam ri rachoch Dios, chquiwäch ri e cojol tabal tok'ob xukuje' ronojel ri tinimit, xubij c'u che:

² “Ri Ajawaxel ri c'o ronojel u cuinem, ri u Dios ri Israel, cubij: ‘Quinc'äjij ri reka'bal ri ajawinel aj Babilon,

³ pa quieb junab c'ut quinban na chi quebeltzelex chupam we c'olbal ri' conojel ri chaconisan re ri rachoch Dios ri xebuc'am bic ri ajawinel Nabucodonosor pa Babilon.

⁴ Quinban c'u na xukuje' chi quetzelej ulok chupam we c'olbal ri' ri Jeconiy, u c'ojol ri Joasim ajawinel re Juda, xukuje' conojel ri niq'uiaj winak chic ri xebesax bic pa Juda xec'am c'u bic pa Babilon. Je, in quinc'äjij na ri reka'bal ri ajawinel re Babilon. In, ri Ajawaxel, quinjiquiba' u bixic.’ ”

⁵ Ri k'axal tzij Jeremiy xutzelej u bixic che ri k'axal tzij ri Hananiy, chquiwäch ri e cojol tabal tok'ob xukuje' chuwäch ronojel ri tinimit ri cärik taj chupam ri rachoch Dios:

⁶ “¡Je', c'o ta banom wi chi ri Ajawaxel chubana' ta wa'! ¡C'o ta banom wi chi chubana' ta ri Ajawaxel chi che tz'akat taj ri tzij ri e a bim, chetzelex ta c'u ulok tak ri chaconisan rech ri rachoch Dios chetzelex ta c'u ulok conojel ri xec'am bic pa Babilon!

⁷ Chatatabej ba wa' ri quinbij chawe xukuje' che ronojel ri tinimit:

⁸ Ri e k'axal tzij ri xec'oji' canok chquipam tak ri ojer tak k'ijol ri e oc'owinak, c'ä majok chujalaxok at xukuje' ri in, xquiya' u bixic ch'o'j, c'axc'ol, cämisanel yabil ri cäpe na paquiwi' nimak tak tinimit xukuje' tak ajawibal ri e c'o qui cuinem.

⁹ Aretak c'u jun k'axal tzij cuya' u bixic chi cäpe utzil, xuwi c'ut we je quebel wi ri jastak ri tzij ri e u bim cäch'obotajic chi kastzij are' ri Ajawaxel takowinak.”

¹⁰ Ri Hananiy xuc'am c'ut ri eka'bal ri c'o chrij u wi' ri Jeremiy xuban ch'akatak che,

¹¹ xubij c'u chuwäch ronojel ri tinimit: “Je cubij wa' ri Ajawaxel: ‘Kas je quenbana' wa', pa quieb junab quinwesaj na chrij qui wi' conojel ri nimak tak tinimit ri reka'bal ri ajawinel Nabucodonosor re Babilon, quinban c'u na ch'akatak che.’ ” Xbe c'ut ri Jeremiy.

¹² Oc'owinak chi c'u jun k'ijol aretak ri Ananiy resam chic ri eka'bal ri c'o chrij u wi' ri Jeremiy, xujak'ij c'ut; ri Ajawaxel xuya' u bixic che ri Jeremiy ri k'axal tzij, xubij che:

¹³ “Jät jabij c'u che ri Hananiy chi in, ri Ajawaxel, quinbij: Xabanch'akatak che jun eka'bal re che', are' c'u ri in nu suc'umam chawe jun eka'bal re räx ch'ich'.

¹⁴ In c'ut ri Ajawaxel ri c'o ronojel u cuinem, ri u Dios ri Israel, quinbij: Nu cojom chrij qui wi' conojel we nimak tak tinimit ri' jun eka'bal re räx ch'ich' rech quepataninic e jacha' lok'om tak pataninelab che ri ajawinel Nabucodonosor re Babilon. Xukuje' ne tak ri juyubal tak awaj e nu cojom chuxe' ri u cuinem.”

¹⁵ Xubij c'ut ri Jeremiy che ri Hananiy: “¡Chattatabenok, Hananiy! Ri Ajawaxel man at u takom taj, are c'u ri at cätajin caya' che we tinimit ri' jun u cawäch jiquiban c'uxaj.

¹⁶ Rumal ri' ri Ajawaxel cubij: ‘Catin wesaj cho ri uwächulew chi casach a wäch. Pa we junab ri' catcäm na, rumal rech chi cumal ri a tzij atakchi'm ri tinimit che nu c'ulelaxic.’ ”

¹⁷ Ri Hananiy ri k'axal tzij xcäm chupam ri uwuk ic' re ri junab ri'.