Ri Jeremiy 27 - Quiché Bible

C'utbal: ri eka'bal

¹ Chupam ri ucaj junab re ri rajawinic ri Sedequiy, u c'ojol ri Josiy, pa Juda, ri Ajawaxel xutzijobej ri Jeremiy,

² xubij c'u che: “Chebabana' jujun tak jat'ibal xukuje' jun eka'bal, chacojo' c'u chrij a wi'.

³ Chaya' c'u bic jun takquil chque tak ri ajawinelab re Edom, re Moab, re Amon, re Tir xukuje' re Sidon are' che c'amow bic ri tako'n ri e petinak pa Jerusalen che u solixic ri ajawinel Sedequiy.

⁴ Chaya' takanic chque chi chiquibij chque ri e qui nimakil chi ri in, ri Ajawaxel ri c'o ronojel u cuinem, ri Dios re Israel, quinbij:

⁵ Ruc' nimalaj u liq'uic cuinem xinban ri uwächulew, ri winak xukuje' ri awaj ri e c'o puwi', quincuin c'ut quinya' che apachin che ri quinwaj wi.

⁶ Are c'u ri camic, in e nu cojom conojel we ulew ri' chuxe' ri u takanic ri pataninel wech ri Nabucodonosor, ajawinel re Babilon, c'ä xukuje' c'u ne ri juyubal tak awaj e nu cojom chuxe' ri u takanic.

⁷ Conojel ri nimak tak tinimit quec'oji' na chuxe' ri u takanic ri are', ri u c'ojol, ri ri' u mam, c'ä copan c'u na ri k'ij aretak ri u nimak tak tinimit cac'oji' na chquixe' ri qui takanic nimak tak tinimit xukuje' tak ajawinelab ri e c'o tak qui cuinem.

⁸ We c'u e c'o jujun nimak tak tinimit, o ajawinelab ri man caquicoj ta quib chuxe' ri reka'bal ri Nabucodonosor, quinc'äjisaj na qui wäch ruc' ch'o'j, wi'jal xukuje' cämisanelalaj yabil, c'ä conojel quec'oji' na chuxe' ri u cuinem. In, ri Ajawaxel, quinjiquiba' u bixic.

⁹ Rumal ri', minimaj ri caquibij we e k'axal tak tzij chiwe, ch'obonelab o e k'alajisal tak ichic', mawi chque tak ri itzinelab ri quesubun che u bixic ri c'ä maja' cäpetic ri cäcoj i c'u'x cumal chi man qui coj ta iwib chuxe' ri u takanic ri ajawinel re Babilon.

¹⁰ Wa' we cäbix chiwe xa' e banoj tzij, xuwi c'u wa' ri qui ch'äc na ix chi quixelesax bic chupam ri iwulew, chi qui xinjabuj c'ut in quixcäm c'u na.

¹¹ Are c'u ri nim tinimit, ri cucoj rib chuxe' ri u cuinem ri ajawinel re Babilon, ri in quinya' na che chi cäcanaj chupam ri rulew rech cajeki' chupam cutic c'u u wäch. In, ri Ajawaxel quinjiquiba' u bixic.”

¹² In, Jeremiy, xinbij ronojel wa' che ri Sedequiy, ajawinel re Juda, xinbij c'u che xukuje': “Chicojo' iwib chuxe' ri u cuinem ri ajawinel aj Babilon xukuje' che ri u tinimit, quixc'asi' c'u na.

¹³ ¿Jas ri rajawaxic wi chi catcämic ri at xukuje' ri a tinimit u mac rech ri ch'o'j, ri wi'jal xukuje' ri cämisanelalaj yabil? U bim c'ut ri Ajawaxel chi jewa' cuc'ulmaj na ronojel nimak tak tinimit ri man cucoj ta rib chuxe' ri u takanic ri ajawinel re Babilon.

¹⁴ Minimaj ri caquibij ri e k'axal tzij chiwe ri quequicoj i c'u'x chi man qui coj ta iwib chuxe' ri u takanic ri ajawinel re Babilon, rumal rech chi ri caquibij chiwe xa' banoj tzij.

¹⁵ Ri Ajawaxel cujiquiba' u bixic chi man are' ta e takowinak ulok; xa' subunic ri caquibano quech'aw pa ri u bi' ri Ajawaxel. Rumal c'u rech wa', ri Ajawaxel cuq'uis i jabuxic ix, ri ix xukuje' tak ri k'axal tzij ri e bininak tak we jastak ri chiwe quecäm na.”

¹⁶ Xukuje' xebentzijobej tak ri e cojol tabal tok'ob xukuje' ronojel ri tinimit, xinbij chque: “Are wa' ri cubij ri Ajawaxel: ‘Minimaj ri caquibij ri e k'axal tzij ri caquijiquiba' u bixic chiwe chi chanim quetzelej ulok pa Babilon ri chaconisan tak rech ri wachoch. Wa' we quequibij chiwe xa' banoj tzij.

¹⁷ ¡Miya' i xiquin chque! Chicojo' iwib chuxe' ri u takanic ri ajawinel re Babilon quixc'asi' c'u na. ¿Jas ri rajawaxic wi chi we tinimit ri' caq'uextaj pa jumulaj etzeletajic?

¹⁸ We kas e k'axal nu tzij we c'u kastzij chi in tzijoninak cuc' quitz'onoj ba' chwe, ri Ajawaxel ri c'o ronojel u cuinem, chi minya' c'olbal chi chec'am bic pa Babilon ri chaconisan ri c'ä e canajinak chupam ri rachoch Dios, chupam ri rachoch ri ajawinel re Juda xukuje' pa Jerusalen.’

^19-21 Aretak ri ajawinel Nabucodonosor xresaj bic ri Jeconiy pa Jerusalen u c'ojol ri Joasim ajawinel re Juda, xuc'am c'u bic pa Babilon junam cuc' conojel ri achijab ri nimak qui k'ij pa Juda xukuje' pa Jerusalen, man xebuc'am ta bic tak ri rakan ja, mawi ri nimalaj c'olbal ja' re k'an ch'ich', mawi tak ri tac'alibal, mawi ri niq'uiaj chi chaconisan rech ri rachoch Dios. Ri Ajawaxel ri c'o ronojel u cuinem xuya' u bixic ri caquic'ulmaj na ri niq'uiaj jastak chic ri xecanaj chupam ri rachoch Dios, ri e c'o chupam ri rachoch ri ajawinel re Juda, xukuje' pa Jerusalen:

²² ‘Quec'am na bic pa Babilon, chila' c'u quecanaj wi na c'ä jampa' ri quinwaj queben c'am na ulok quebentzelej c'u pa we c'olbal ri'. In, ri Ajawaxel, quinjiquiba' u bixic.’ ”