Ri Jeremiy 26 - Quiché Bible

Ri Jeremiy cätzucux u cämisaxic

¹ Pa ri u chapletajic ri rajawinic ri Joasim, u c'ojol ri Josiy, pa Juda, ri Ajawaxel xuch'abej ri Jeremiy xubij c'u che:

² “Chattac'al chuwäch ri wachoch, chabij ronojel ri xatintak wi chi chabij chque ri winak ri e elinak ulok chquipam ri tinimit tak aj Juda che k'ijilanic chupam ri rachoch Dios. Man c'o ta catas canok ri ma ta chabij.

³ Craj ne caquiya' qui xiquin chawe caquiya' ta c'u ne can ri itzel qui c'aslemal, ma ta c'u ne quinc'äjisaj chic qui wäch qui mac quech ri e itzel tak qui banoj, jacha' ri nu chomam ulok.

⁴ Chabij chque chi ri in, ri Ajawaxel, quinbij: ‘We man caquiya' qui xiquin chwe mawi quequitz'akatisaj qui banic tak ri tijonic ri e nu yo'm chque,

⁵ mawi chiquiya' qui xiquin chque tak ri e qui pixbenic tak ri e pataninelab wech ri e k'axal tak nu tzij, ri quieb oxib mul e nu takom ulok chiwe ri mawi c'u ne ix nimaninak ta chque,

⁶ quinban c'u na che we wachoch ri' je jas ri xinban che ri xc'oji pa Sil. Quinban na che we tinimit ri' jun esbal no'j re c'okonic chque conojel tak ri winak re ri uwächulew.’ ”

⁷ Ri e cojol tabal tok'ob, ri e k'axal tak tzij xukuje' ronojel ri tinimit ri xequita' tak we tzij ri' ri xebubij tak ri Jeremiy chupam ri rachoch Dios.

⁸ Aretak c'u xuq'uis u bixic ri xtak che u bixic rumal ri Ajawaxel, ri e cojol tabal tok'ob, ri e k'axal tak tzij xukuje' ri tinimit xquichapo xquibij c'u che: “¡Catecämok!

⁹ ¿Jas ri cabano cachajij anima' che u bixic pa ri u bi' ri Ajawaxel chi we rachoch Dios ri' je cäcanajic jacha' ri ja re ri Sil, xukuje' chi we tinimit casachisax na u wäch man c'o ta chi c'u winak quecanaj ta chi can chupam?” Conojel c'u ri winak xquiq'uiak quib chupam ri rachoch Dios, chrij ri Jeremiy.

¹⁰ Ri c'ämal tak be pa Juda, aretak xquita' ri xc'ulmatajic, xebel ulok chupam ri rachoch ri ajawinel xebe chupam ri rachoch Dios, chila' c'ut, chuchi' ri C'ac' Oquibal, xet'uyi wi.

¹¹ E are' tak c'ut ri e cojol tabal tok'ob xukuje' tak ri e k'axal tak tzij xquibij chque ri c'amal tak be xukuje' che ronojel ri tinimit: “We achi ri' takalic chi cäc'okox che cämical rumal rech chi u bim chi c'ax ri cutaklebej na we tinimit ri'. Ix xita' ruc' tak ri i xiquin.”

¹² Ri Jeremiy xebutzijobej ri c'amal tak be xukuje' ri tinimit, xubij c'u chque: “Ri Ajawaxel are' xintakowic chi chinch'aw pa ri u bi', che u bixic ri cuc'ulmaj na we rachoch Dios ri' xukuje' we tinimit ri' ronojel ri i tom u bixic.

¹³ Chiwutzirisaj ri i c'aslemal xukuje' tak ri e i banoj, chixniman che ri Ajawaxel ri i Dios ri are' man quebutak ta c'u na ulok tak ri c'axc'ol ri e nu yo'm u bixic chiwe.

¹⁴ Are c'u ri in, in c'o pa i k'ab; chibana' chwe jachique ri cäkaj chiwäch.

¹⁵ Are c'u kas utzalaj retamaxic chi bana': We quinicämisaj, ri ix, xukuje' ri e u winakil we tinimit ri' e are' aj chak' tak mac che u cämisaxic jun ri man c'o ta u mac; kas c'u tzij are' ri Ajawaxel in takowinak che kas quiya'ic qui k'alajisaxic chiwe conojel tak we jastak ri'.”

¹⁶ E are' tak c'ut ri e c'amal tak be xukuje' ri tinimit xquibij chque ri e cojol tabal tok'ob xukuje' chque tak ri e k'axal tzij: “Man c'o ta rumal rech cäc'okox ta we achi' ri' rech cäcämisaxic; uj u tzijobem pa ri u bi' ri Ajawaxel ri ka Dios.”

¹⁷ Jujun nimak tak tatayib xewalijic xquibij c'u che ri tinimit ri qui mulin quib:

¹⁸ “Pa tak ri u k'ijol ri Ezequiy, ajawinel re Juda, ri Miquey aj Moreset xutzijobej ronojel ri tinimit Juda pa ri u bi' ri Ajawaxel, je xubij wa' che: ‘Ri Ajawaxel ri c'o ronojel u cuinem je cubij wa': Ri Sion caq'uextaj pa jun ulew c'upum, Ri Jerusalen cux na jumulaj etzeletajic, ri u wi' ri juyub ri c'o wi ri rachoch Dios cänoj na che patzapak tak k'ayes.’

¹⁹ ¿La xcämisax puch ri Miquey rumal ri Ezequiy xukuje' rumal ronojel ri tinimit Juda? Xane' ri xuban ri ajawinel, xuna' rib chuwäch ri Ajawaxel xtz'onon c'u che chi chutok'obisaj qui wäch. Man xutak ta c'u ulok ri Ajawaxel Dios ri nimalaj c'axc'ol ri u yo'm u bixic. ¿La quekekaj ta c'ut ri uj jun il ri sibalaj nim?”

²⁰ Xukuje' ri k'axal tzij ri Uriy, u c'ojol ri Semaiy, ri aj tinimit Quiriat-jearim, xtzijon pa ri u bi' ri Ajawaxel xubij ri cuc'ulmaj na we tinimit ri' xukuje' ri ulew, je xubij jas ri xubij ri Jeremiy.

²¹ Ri ajawinel Joasim, xukuje' ri e rach k'atal tak tzij xukuje' ri e c'ämal tak u be xquito jas ri xubij, are ta c'u xraj ri ajawinel xcämisaxic. Aretak c'u xretamaj ri Uriy, xuxe'j rib xanimajic xbe pa Ejipt.

²² Ri ajawinel Joasim xutak bic pa Ejipt ri Elnatan, u c'ojol ri Acbor, xukuje' niq'uiaj achijab chic,

²³ ri xequic'ama' ulok ri Uriy pa Ejipt xquijach pa u k'ab ri ajawinel Joasim, ri xtakanic chi cämisaxok chiq'uiaka' c'u ri u cuerp chupam ri jul ri quebalix wi conojel ri cäminakib.

²⁴ Ri Ahicam, u c'ojol ri Sapan, xch'aw puwi' ri Jeremiy, are c'u xbanow wa' chi man xjach ta pa u k'ab ri tinimit rech cacämisax rumal.