Ri Jeremiy 23 - Quiché Bible

Eyebal c'uxaj ri cäpe na

¹ Ri Ajawaxel cujiquiba' u bixic: “¡Tok'ob qui wäch ri ajyuk'ab ri xak queca'yic cäsach qui wäch tak ri e nu chij xukuje' xak c'u caquijabula' tak quib!”

² Ri Ajawaxel, ri u Dios ri Israel, je cubij wa' chque ri ajyuk'ab ri quebajawin puwi' ri u tinimit: “Ix e i jabum ri e nu chij, i banom c'u chque chi e animajinak bic man c'u e qui chajin taj. Are c'u ri camic, in sibalaj quinoc na il che ri utzalaj u c'äjisaxic qui wäch ri e itzel tak qui banoj. In, ri Ajawaxel, quinjiquiba' u bixic.

³ Kas in c'ut quebenc'am na ulok tak ri e nu chij ri e to'tajinak pa tak ri ulew ri xinban wi chque chi xebanimaj wi bic, quebenmulij na quinban c'u na chque chi quetzelej na ulok chquipam tak ri quecha', rech sibalaj queq'uiyir tak na ri cal.

⁴ Quebencoj c'u na ajyuk'ab ri quechajinic, rech ma ta c'o jas ri caquixibij ta wi na quib mawi c'o ta jun cäsach ta na chque. In, ri Ajawaxel, quinjiquiba' u bixic.”

⁵ Ri Ajawaxel cujiquiba' u bixic: “Cäpe na jun k'ij aretak quinban na chi ri David cac'oji' na jun kas rija'lil, jun ajawinel ri cajawin na ruc' no'j cuban c'u na ri suq'uilal xukuje' ri colomal chupam ri ulew.

⁶ Pa tak ri u k'ijol, ri Juda cäto'taj na xukuje' ri Israel man c'o ta chi cäyo'w ta chi latz' che. Are c'u u bi' wa ri cäbix na: ‘Ri Ajawaxel are' ka ch'äcanic.’ ”

⁷ Ri Ajawaxel cujiquiba' u bixic: “Quepe tak na ri k'ij aretak man cäquiban ta chic ri chi'nic ri kas cäban na, cäquibij: ‘Rumal ri u c'aslemal ri Ajawaxel, ri xebesan ulok ri aj israelib pa Ejipt’,

⁸ xane' queban na chi'nic ri kas cäban na, quecha': ‘Rumal ri u c'aslemal ri Ajawaxel, ri xebesan ulok ri e rija'lil ri Israel, pa ri ulew re ri riquiak'ab ri elebal k'ij xukuje' pa conojel ri jule' tak ulew chic jawije' tak ri xeben jabuj wi' tak.’ Quejeki' c'u na chupam ri kas culew.”

Tzijol ri cäya' u bix chquij ri e k'axal tzij

⁹ Tzijol ri cäya' u bixic chquij ri e k'axal tzij: kas sibalaj in sachinak; ronojel ri nu cuerp cabirbitic, je ta ne quinpe jun k'abarel, jun a chi ri ramatajinak rumal ri u wa'l uva, rumal rech ri Ajawaxel xukuje' cumal c'u tak ri e suc'alaj tak u tzij.

¹⁰ Ri ulew nojinak chque tak winak ri xekaj pa mac ruc' jun winak chic, chque winak ri quexiq'uin che u banic ri etzelal ri quequicoj ri qui cuinem che qui banic tak ri man suq'uil taj. Rumal ri' ri Ajawaxel xuc'okoj ri ulew, xchaki'jar c'ut ri ulew, xec'at tak c'ut ri echa' chupam ri chaki'j uwo sak.

¹¹ Ri Ajawaxel cujiquiba' u bixic: “Xukuje' c'u ne tak ri e k'axal tak tzij xukuje' tak ri e cojol tabal tok'ob man e nimanelab taj; kas chupam ri wachoch e nu rikom wi caquiban ri etzelal.

¹² Rumal ri' ri qui be cux na k'ekumalil xukuje' cajililic: in quinban na chi quech'iquimixic chetzak c'ut. Aretak chebenban ajilanic cuc', quinc'am na ulok ri quiäkasakil paquiwi'. In, ri Ajawaxel, quinjiquiba' u bixic.

¹³ In e wilom ri e k'axal tzij pa Samar quequiban tak jastak ri quinquic'axc'obisaj: quik'axen tzij pa u bi' ri Baal qui banom c'ut chi ri nu tinimit Israel u jech'obisam rib.

¹⁴ In e wilom ri e k'axal tzij pa Jerusalen quequiban xibibalalaj tak jastak: quekaj pa mac ruc' jun winak chic xukuje' t'orinic, je tak caquiban wa' che quiya'ic tak chajin anima' chque ri banal tak etzelal rech man caquitanaba' ta u banic ri quetzelal. Ri e are' xukuje' tak ri winak ri e jekel chupam ri tinimit xak e junam tak qui banic wa' chwe jacha' ri Sodom xukuje' ri Gomor.

¹⁵ Rumal ri' in, ri Ajawaxel ri c'o ronojel u cuinem, quinbij wa' we c'ax ri' ri caquikajbej tak na ri e k'axal tzij: Quenya' na jun c'ayilaj jasach chque pa tijic; quenya' na cuq'uia' ri c'o cämisabal chupam, rumal rech chi chque ri e k'axal tzij pa Jerusalen u lic'om rib ri etzelal pa ronojel ri ulew.”

¹⁶ Cächa ri Ajawaxel ri c'o ronojel u cuinem: “Aj israelib, miya' i xiquin che ri cäquibij ri e k'axal tak tzij. Ri caquibij xa' e banoj tak tzij, jastak ri xak pa tak qui jolom cäpe wi, chi ri in man nu yo'm ta u bixic chque.

¹⁷ Quecha' chque ri caquetzelaj u wäch ri nu tzij ‘Ronojel utz quel na chiwäch.’ Chque tak c'ut ri qui takem ri tacalaj u rayinic ri canima', quecha' chque: ‘man c'o ta jun etzelal cäpe ta na piwi'.’ ”

Cämayin ri Jeremiy

¹⁸ ¿Jachin ta quec'oxoman ri e awatalic ri e c'o ruc' ri Ajawaxel?, ¿xril ta c'ut, xuta' ta c'ut ri u tzij?, ¿jachin ri xtataben ri u tzij xuxiquinaj ta c'ut?

¹⁹ Ri royowal ri Ajawaxel jacha' jun salc'um, jacha' jun k'ekal jäb ri e c'o cakulja chupam ri cäkaj tak paquiwi' ri e banal tak etzelal.

²⁰ Ri royowal ri Ajawaxel man cätani' ta na c'ä quebuban tak na ri jastak ri e u chomam qui banic. Cäpe na ri k'ijol aretak ri ix quixchoman na quebich'ob c'u na we jastak ri'.

Tzijol ri cuya' ubixic ri Ajawaxel che ri caquic'ulmaj na ri e subunelab tak k'axal tzij

²¹ “In man xebentak ta bic tak we e k'axal tzij ri', mawi c'u ne xintzijon ta cuc', we winak ri' quexiq'uinic xebel bic xebetzijon pa ri nu bi'.

²² We ta xequetamaj tak ri jastak ri e c'utal wuc', xequiya' ta qui bixic ri' ri nu tzij che ri nu tinimit; xecuin ta c'u ri' chque chi xquitas ta quib che ri itzel qui be xequiya' ta c'u can tak ri' ri itzel tak qui banoj.”

²³ Ri Ajawaxel cujiquiba' u bixic: “Naj o nakaj, in ri' ri Dios.

²⁴ ¿Jachin ta lo ri cäcuinic cuc'u' ta rib chquiwäch ri nu bak'wäch? Ruc' ri nu wächbalil quinnojisaj ri caj xukuje' ri ulew. In ri Ajawaxel quinjiquiba' u bixic.

²⁵ Ri in nu tom ri xquibij tak we e k'axal tak tzij, xquik'axaj banoj tzij pa ri nu bi', je c'u caquibij wa: xtzijon wuc' pa ichic'.

²⁶ ¿C'ä jampa' lo we e k'axal tak tzij ri' caquitakej na quibixic subunic ri xak pa qui jolom queq'uic tak wi?

²⁷ Cuc' tak ri quichic' ri quequitzijola' tak chquixo'l, caquibano chi ri nu tinimit quinsach pa u jolom, jacha' ri e qui mam xinquisach pa qui jolom xebe c'u chrij ri Baal.

^28-29 ¡We jun k'axal tzij c'o jun richic', chubij chi jun ichic', we c'u cuc'am ri nu tzij chuya' u bixic ruc' jicomal! Man cuya' taj cajunamataj ta ri pajo ruc' ri trico. Ri nu tzij jacha' ri k'ak', jacha' jun bajibal ri cuban ch'akatak che ri abaj. In ri Ajawaxel quinjiquiba' u bixic.

³⁰ Rumal ri' quink'alajisaj wib chi quebenc'ulelaj we e k'axal tak tzij ri' ri quequelek'ela' tak ri e nu tzij chquixo'l. In ri Ajawaxel, quinjiquiba' u bixic.

³¹ Quink'alajisaj wib chi quebenc'ulelaj tak we e k'axal tak tzij ri' ri caquibano chi in in yowinak qui bixic subunic ri xak e are' quebinic.

³² Quink'alajisaj wib chi quebenc'ulelaj we e k'axal tak tzij ri' ri quequitzijoj tak ichic' ri xa' e re banoj tak tzij; ri cuc' tak ri qui banoj tak tzij xukuje' tak ri qui no'j quequibano chi ri nu tinimit caquijech'obisaj ri qui be. In man e nu takom ta bic mawi c'o ta jun takanic nu yo'm ta chque, jeri' man e ta ticarel che u to'ic ri tinimit. In, ri Ajawaxel, quinjiquiba' u bixic.”

Ri qui ya'ic tak ri tzijol ri e u yo'm ri Ajawaxel

³³ “Jeremiy, we c'o jun winak aj tinimit o jun k'axal tzij, o jun cojol tabal tok'ob cuc'ot a chi', cubij chawe: ‘¿Jachique ri u chilibenic ri Ajawaxel?’, chatchok chque: ‘Ri Ajawaxel cujiquiba' u bixic chi ix quixupuquij c'ut.’

³⁴ We c'u jun k'axal tzij o jun cojol tabal tok'ob o jun winak re ri tinimit cubij re we tzij ri' ‘u chilibenic ri Ajawaxel’, in quinc'äjisaj na u wäch, ri are' xukuje' ri e aj uwo rachoch.

³⁵ Aretak jun cuc'ot u chi' jun achil, o jun rachalaxic, cuya' cubij: ‘¿Jas ri u tzelem u bixic ri Ajawaxel? ¿Jas ri u bim?’

³⁶ Mucoj chi c'ut ri tzij ‘u chilibenic ri Ajawaxel’, we c'u ne c'o jachin jun cacojowic, quinban na chi ri e u tzij quebux jun chilibenic. Ix i q'uexom ri quel caquibij ri u tzij ri c'aslic Dios, ri rech ri i Dios, ri Ajawaxel ri c'o ronojel u cuinem.

³⁷ Jeremiy, chac'oto' qui chi' ri e k'axal tzij: ‘¿Jas ri u tzelem u bixic ri Ajawaxel? ¿Jas ri u bim?’

³⁸ We c'u caquibij ‘u bim ri Ajawaxel chi quebanok’, chitzelej u bixic chque: ‘Ri Ajawaxel cubij: Rumal c'u rech chi i takem u cojic ri tzij ri xinbij chiwe chi man qui coj taj,

³⁹ ri in quixinwalijisaj na jacha' jun chilibenic, ri ix xukuje' ri tinimit ri xinya' chiwe xukuje' chque ri e i mam, naj c'u quixentzaka' wi canok chwe.

⁴⁰ Amak'el c'ut quinc'am ulok piwi' ix mach'isabal ib xukuje' q'uixbal ri mawi ta ne jubik' quesach ta pa i jolom.’ ”