Ri Jeremiy 22 - Quiché Bible

Tzijol che ri rachoch ajawinel pa Juda

¹ Ri Ajawaxel xubij chwe: “Jät pa ri rachoch ri ajawinel chaya' c'u u bixic we tzijol ri'

² chuwäch ri rajawinel ri Juda, ri t'uyul puwi' ri u tem re ajawibal ri David, chquiwäch c'ut ri rach k'atal tak tzij xukuje' ri winak re ri tinimit: ‘Chitatabej ri cubij ri Ajawaxel.

³ Chibana' ri suq'uilal chupam we c'olbal ri' xukuje' ri colomal, chito'tajisaj ri cat'orixic pa u k'ab ri t'orinel, misub ri man i winakil taj, ri minorib xukuje' ri malca'nib. Mebicämisaj winak ri man c'o ta qui mac.

⁴ We kas qui ban wa' ri quixintak che u banic, caquitakej na qui c'olem tak ajawinelab ri quec'oji' na puwi' ri u tem re ajawibal ri David, ri queboc na pa tak carwaj wiktalic xukuje' chquij tak quiej queboc'ow na chupam ri roquibal we rachoch we ajawinel ri', achilatal cumal tak ri e rach k'atal tak tzij xukuje' rumal ri tinimit.

⁵ We c'u ne man caquiya' qui xiquin chque tak we pixbenic ri', we rachoch we ajawinel ri' cäwulitaj na. In, ri Ajawaxel, quinjiquiba' u bixic.’ ”

⁶ Cubij c'ut ri Ajawaxel che ri rachoch ri rajawinel ri Juda: “Ri at chwe in at jacha' ri juyub re Galaad, at jacha' ri u wi' ri juyub re ri Libano, quinban na ri chi'nic ri kas cäban na chi catinjalwächij na pa jun chaki'j uwo sak, pa jun c'olbal ri man e c'o ta wi winak.

⁷ Quebentak ulok winak chawij ri e cuc'am ulok tak qui ch'ojibal, ri quepe na che u sachisaxic a wäch. Quequit'akij tak na ri e a rakan tak ja re chacalte' quequicoj c'u na pa k'ak'.

⁸ Winak quech nimak tak tinimit queboc'ow na chunakaj we tinimit ri', caquic'otola' c'u na qui chi': ‘¿Jasche ri Ajawaxel je xuban wa' che we tinimit ri' ri sibalaj nim?’

⁹ Caquitzelej c'u na u bixic: ‘Rumal rech chi xquixutuj can ri c'ulwächinic ri xuban ri Ajawaxel, ri qui Dios cuc', xequik'ijilaj xukuje' xequiya' tak k'ijilanic chque ri e jule' tak diosib.’ ”

Tzijol ri cuya' ri Jeremiy che ri cuc'ulmaj na ri Salum (Joacaz)

^10-11 Miwok'ej ri ajawinel Josiy, miwok'ej ri u cämical; are chi wok'ej ri Salum ri u c'ojol, ri cäbec man cätzelej ta chi c'u ulok mawi c'u jumul cäril ta chi na ri ulew ri xalax wi. Jewa' cubij ri Ajawaxel che ri cuc'ulmaj na ri Salum, u c'ojol ri Josiy, ajawinel re Juda, ri xcanaj can che u q'uexwäch ri u tat puwi' ri tem re ajawibal, xel c'u bic chupam we c'olbal ri': “Man cätzelej ta chi c'u na ulok,

¹² xa' c'u ne cäcäm na chupam ri ulew ri queyok wi aretak chac'amtaj bic, mawi c'u jumul cäril ta chi na ri u wäch ri rulew.”

Tzijol che ri cuc'ulmaj na ri Joasim

¹³ “¡Tok'ob a wäch, chi are xacoj ri etzelal xukuje' ri man suq'uilal taj che u yaquic ri awachoch xukuje' ri tac'atak tak awachoch aj ajawinel ri quebacoj wi ri winak pa tak chac man c'u c'o ta tojbal quech cayao!

¹⁴ Catcha' c'ut: ‘Quenyaca' jun je'lalaj wachoch, quebenbana' nimak tak ja pa ri u catik.’ Quebaban c'u tak wenta'n che, quebach'uk ri e u tapia cuc' chacalte' quiäk c'ut ri k'obal ri cäcoj che.

¹⁵ ¿La are puch pa a c'u'x chi ri rajawinic jun ajawinel are ta ri c'olem chupam chacalte'? Ri a tat xquicot pa ri c'aslemal; are c'u xuban ri suq'uilal xukuje' ri colomal, rumal ri' utz xel pa ronojel.

¹⁶ Xuto' qui wi' ri mebayib xukuje' ri man cacuintaj cuto' rib, rumal ri' utz xel pa ronojel. Are wa' ri cäbixic chi are wa' ri retamaxic nu wäch. In, ri Ajawaxel Dios, quinjiquiba' u bixic.

¹⁷ Are c'u ri at xuwi catoc il che qui rikic tak ri ch'äcoj cumal tak eläk'anic; quebajach ri man c'o ta qui mac pa cämisaxic, quebaban c'u c'ax xukuje' quebat'orij ri a tinimit.”

¹⁸ Ri Ajawaxel je cubij wa' che ri cuc'ulmaj na ri Joasim, u c'ojol Josiy, ajawinel re Juda: “Man c'o ta jachin jun cok'em ta na ri u cämical. Man c'o ta jachin jun cok'ic ri cubij ta c'u na: ‘¡Uy, wachalal! ¡Uy wanab! ¡Uy, Ajawaxel! ¡Uy, Ajawinel!’

¹⁹ Cämuk na jacha' jun bur: cäjururex bic queq'uiak canok chrij ri Jerusalen.”

Tzijol che ri cuc'ulmaj na ri Jerusalen

²⁰ “¡Juda chatpakal puwi' ri juyub Libano charaka' c'u a chi'! ¡Chawalijisaj ri a ch'abal chque tak ri c'ache'laj re Basan! ¡Charaka' a chi' kas paquiwi' tak ri juyub re Abarim, conojel c'ut ri at qui lok' e ch'äcatajinak!

²¹ In xatinch'abej pa ri k'ijol aretak utz at c'olic, man xawaj ta c'ut xinatatabej. Je a banom ulok wa' kas pa ri walc'alal: ¡Man a yo'm ta a tzij che u tatabexic ri quinbij chawe!

²² Ri quiakik' are quec'amow bic conojel ri e a c'amal be, e are' tak c'ut ri at qui lok' quec'am na bic pa jun ulew chic. Catcanaj pa q'uixbal xukuje' at mach'irisam qui mac quech tak conojel tak ri e awetzelal.

²³ Camic utz a banom chupam ri a soc man c'o ta cayo'w latz' chawe, chquixo'l tak ri chacalte' ri e c'amom ulok pa ri Libano, ¡quebarika' c'u na c'ax aretak chepe tak ri k'oxomal pawi', k'oxomal tak e jacha' ta ne e re alc'ualanic!”

Tzijol cuya' ri Dios che ri ajawinel Jeconiy

²⁴ Ri Ajawaxel u bim che ri Jeconiy, u c'ojol ri Joasim, ajawinel re Juda: “Quinban ri chi'nic ri kas cäban na rumal ri nu c'aslemal: Pune' ta ne at jun mulk'ab re t'ikbal ri at ta c'o che ri nu wiquiak'ab catinjolij chi'

²⁵ rech catinjach pa qui k'ab tak ri c'ulel, ri sibalaj caxe'j awib chquiwäch. Catinjach na pa u k'ab ri Nabucodonosor, ajawinel re Babilon, xukuje' pa qui k'ab ri aj caldeyib.

²⁶ Catinrokij na bic ri at xukuje' ri a nan pa jun ulew ri man xril ta ri awalaxic, chila' c'u quixcäm wi na ix quieb.

²⁷ Je c'u ri' ri e are' man quetzelej ta na pa ri ulew ri sibalaj caquirayij wi na ri qui tzelejic.”

Cuc'ut ri royowal ri k'axal tzij

²⁸ Ri Jeconiy ¿La jun paxinak mulul ri jisjobinak, jun lak ri man c'o ta jachin cajawinic? ¿Jasche xerokix bic ri are' xukuje' tak ri e u c'ojol pa jun ulew ri man etamatal taj?

²⁹ ¡Ulew, ulew, ulew; chatatabej ri u tzij ri Ajawaxel!

³⁰ Cächa ri Ajawaxel: “Chitz'ibaj ri u bi' we achi ri' chquipam tak ri wuj jacha' jun achi ri man e c'o ta u c'ojol, jacha' jun achi ri xtzakmaj pa ri c'aslemal. Man c'o ta c'u jun chque tak ri rija'lil copan ta na puwi' ri u tem re ajawibal ri David rech cajawin ta chi na pa Juda.”