Ri Jeremiy 21 - Quiché Bible

Cäya' u bixic ri c'äjisabal u wäch ri Jerusalen

^1-2 Ri ajawinel Sedequiy xutak bic ri Pasur, u c'ojol ri Malquiy, xukuje' ri Soponiy, ri cojol tabal tok'ob, u c'ojol ri Maasiy, che rilic ri Jeremiy che c'u u bixic che: “Chabana' tok'ob chatz'onoj che ri Ajawaxel jas ri cakaban na rumal rech chi ri Nabucodonosor, ajawinel re Babilon cätajin cujuch'äco. Caraj ne caraj ri Ajawaxel cuban jun chque tak ri e u mayibal chubana' ta c'u che ri Nabucodonosor chi tzelej ta chrij.” Xtzijon c'ut ri Ajawaxel ruc' ri Jeremiy,

³ xutzelej c'u u bixic wa' chque ri e u tako'n ri Sedequiy: “Chibij che ri Sedequiy

⁴ chi ri Ajawaxel, ri u Dios ri Israel, je cubij wa: ‘Quenbana' chi quetzelej ri ajch'ojab, ri cätajin quixch'ojin cuc' chrij ri tapia, cätajin c'u qui tzelej u wäch ri ch'o'j ri cuban ri ajawinel re Babilon chiwe xukuje' quech ri aj caldeyib quebenmulij c'u na pa u niq'uiajil we tinimit ri'.

⁵ Kas in c'ut quinch'ojin na iwuc' ix che i ch'äquic ruc' nimalaj u cojic ri cuinem xukuje' ruc' nicowelalaj oyowal xukuje' nimalaj k'ak'al.

⁶ Quebencämisaj na conojel ri winak ri e c'o chupam we tinimit ri'; winak xukuje' awaj quecäm na rumal jun xibibalalaj cämisanelalaj yabil.

⁷ Chwi chi c'u wa' quinjach na ri Sedequiy, ajawinel re Juda, pa u k'ab ri Nabucodonosor xukuje' pa qui k'ab ri jule' tak e u c'ulel chic ri e cämel, ri e rachil ri e rach k'atal tak tzij xukuje' ri ajch'ojab xukuje' ri winak ri xec'asi' can pa ri tinimit aretak oc'owinak chic ri cämisanel yabil, ri ch'o'j xukuje' ri wi'jal. In quinban na chi quecämisax rumal u pa u chi' ch'ich' re ch'o'j, ri man ruc' ta elebal c'uxaj mawi tok'obisam wächaj, In, ri Ajawaxel, quinjiquiba' u bixic.

⁸ Quinya' u bixic xukuje' che ri tinimit chi in ri Ajawaxel, quinbij: Quinya' ri be re c'aslemal xukuje' ri re cämical chiwäch chicha' c'u jun chque.

⁹ Ri cacanaj can chupam ri tinimit cäcäm na pa ri ch'o'j, o rumal wi'jal o rumal cämisanel yabil. Are' c'u ri quel bic, cujach c'u rib pa qui k'ab ri aj caldeyib ri cätajin quech'ojin ruc' ri tinimit, man cäcäm ta na; cuto'tajisaj c'ut ri u c'aslemal.

¹⁰ Xa' c'u ne jumul nu bim chi quinc'am ulok ri etzelal che u q'uexwäch utzil puwi' we tinimit ri'. Quinjach na pa u k'ab ri ajawinel re Babilon, cut'ik c'u na k'ak' che. In, ri Ajawaxel, quinjiquiba' u bixic.’

Cäya' u bixic ri cuc'ulmaj ri rajawinel pa Juda

^11-12 ‘Che ri rachoch ri rajawinel ri Juda, che ri rachoch ri rajawinel ri David, chabij che chi in quinbinic: Chatatabej ri tzijol ri cuya' ri Ajawaxel: Chabana' suq'uilal conojel tak ri k'ij; chebato'tajisaj ri caban c'ax chque cumal ri e banal tak c'ax, mac'ulmataj ne chi, cumal ri itzel tak a banoj, catzijtaj ta c'u ri woyowal jacha' jun k'ak' canicow ta c'ut ri man c'o ta jachin ta cäcuin che u chupic.’

Cäya' u bixic ri c'äjisabal u wäch ri Jerusalen

¹³ ‘Tinimit ri cätakan puwi' ri beya', jacha' jun xäk pa ri lianic, in, ri Ajawaxel, quink'alajisaj wib chi quinban c'ax chawe. Quixcha' ix: ¿Jachin ta lo ri cäcuin ta che ka ch'äquic?

¹⁴ In quinc'äjisaj na i wäch jacha' ri takal chque tak ri e i banoj; quint'ik na k'ak' chque tak ri e i c'ache'laj, are c'u we k'ak' ri' quebutij na conojel ri e c'o chrij. In, ri Ajawaxel quinjiquiba' u bixic.’ ”