Ri Jeremiy 20 - Quiché Bible

Ri cuculmaj na ri Pasur, ri u c'ulel ri Jeremiy

¹ Aretak ri Pasur, u c'ojol ri Imer, ri are' jun cojol tabal tok'ob xukuje' nabe takanel chupam ri rachoch Dios, xuta' u bixic ri cac'ulmataj na ri xubij ri Jeremiy,

² xuya' takanic chi ch'ayok chcoj c'u chupam ri cojbal akanaj ri c'o chuchi' ri Oquibal ri c'o Chicaj aj Benjamin ri cabe pa ri rachoch Dios.

³ Chucab k'ij xtakanic chi chesax ri Jeremiy chupam ri cojobal akanaj, xubij c'ut ri Jeremiy che: “Ri Ajawaxel u q'uexom ri a bi' Pasur xucoj c'u Magormisabib che u q'uexwäch.

⁴ Ri Ajawaxel je cubix wa': ‘Catin jalwächij pa xibriquil chawe chbil awib xukuje' chque conojel ri awachil awib cuc'; chquiwäch ri e a bak'wäch, ri awachil awib cuc' quekaj na chuxe' ri qui ch'ich' re ch'o'j ri qui banom qui c'ulel chawe. Quebenjach na conojel ri winak ri e c'o pa Juda pa u k'ab ri ajawinel re Babilon, ri quixresaj na bic quebuc'am c'u na bic pa Babilon o ch'ich' re ch'o'j cucämisabej quech.

⁵ Quebenjacha' na xukuje' pa qui k'ab ri c'ulel ri jastak ri pakapoj cajil, xukuje' conojel tak ri e quik'inomal tak ri ajawinelab re Juda, rech quec'am bic pa Babilon.

⁶ Are' c'u ri at, Pasur, catc'am na bic pa Babilon, quebawachilaj c'u bic conojel ri e awachalaxic. Chila' c'u catecäm wi na xukuje' chila' c'u catmuk wi na at xukuje' conojel ri awachil awib cuc' ri xebaya' wi qui bixic subunelab tak jastak chque.’ ”

Cäch'ach'at ri Jeremiy che ri Ajawaxel

⁷ Ajawaxel ri lal xinsub la, are c'u ri in xinya' wib pa subic; nim na ri chuk'ab la, xcuin c'u la che nu ch'äquic. Xak amak'el in yacal tze'; conojel xak cäquetz'bej nu wäch.

⁸ Amak'el aretak quinch'awic are quinya' u bixic tokinic xukuje' sachoj wächaj; amak'el cäquitze'j nu wäch xukuje' cäquetz'bej c'u nu wäch rumal rech chi quinya' u bixic ri tzij la.

⁹ We quinbij: “Man quinchoman ta chic che ri Ajawaxel, mawi jumul quintzijoj chic ri u bi',” are c'u ri tzij la pa ri wanima' cäq'uextaj pa jun k'ak' ri cäjarisanic, ri copan c'ä cho tak ri nu bakil. Quintzucuj u k'atixic man c'u quinticar taj.

¹⁰ Quincuinic quintatabej ri qui jasjatem ri winak: “¡C'o xibriquil pa ronojel c'olbal!” Caquibij: “¡Tisaj jo' che u tzujuxic!” Xukuje' ne ri wachil wib cuc' queyem chi quinkaj pa jun c'ambejebal. Je caquibij wa': “Cäraj ne cuya' rib pa subutajem; cäkaj c'u na pa ka k'ab cakaya' c'u na ri rajil u c'axelal che.”

¹¹ Are c'u ri lal, Ajawaxel, lal c'o wuc' jacha' jun ajch'o'j ri man cäch'äctaj ta wi; ri caquitzucuj ri nu kajic pa qui k'ab, cäquichak'ij na quib; quech'äctaj na, quel c'u na qui q'uixbal, xa' c'u jumul cäcanaj ri qui q'uixbal paquiwi' ri elinak, man casachisax taj.

¹² Ajawaxel ri c'o ronojel u cuinem, lal cänic'on la ruc' suq'uilal, lal ri quil la ri c'o c'ä chupam ri ranima' ri winak, chya' la chwe chi quinwil ri u c'äjisaxic qui wäch we winak ri', nu yo'm c'u pa k'ab la ri c'ax ri caquiban ri winak chwe.

¹³ ¡Chixbixon che ri Ajawaxel, chixk'ijilan che ri Ajawaxel! Ri are' cuto'tajisaj ri caban c'ax che rumal ri qui cuinem ri banal tak etzelal.

¹⁴ ¡C'okotajinak ri k'ij ri xinalaxic! ¡Chi ri k'ij ri xinalax rumal ri nu nan ma ta tewichitalic!

¹⁵ ¡C'okotajinak ri xquicotisan ri nu tat ruc' ri tzijol ri xya' che chi alatajinak jun u c'ojol ala!

¹⁶ ¡Chi we winak ri' chuxok jacha' ri tinimit tak ri kas xa' jumul xsachisax u wäch rumal ri Dios! ¡Chi pa ri u sakaric chebutatabej rakoj tak chi'aj re c'axc'olil. Wululem c'ut re ch'o'j pa tiq'uil k'ij,

¹⁷ are c'u ri Dios man xuban ta chwe chi xincäm ta pa ri u c'u'x ri nu nan! Jeri' ri are' are ta xux ri xinmuk wi are c'u ri in ma ta jubik' ri' xinalaxic.

¹⁸ ¿Jasche xinel ulok pa ri c'uxaj xak xuwi che rilic k'oxomal xukuje' elem tak ch'ujilal, che c'u u q'uistajic ri nu c'aslemal ch'ukutajinak che q'uixbal?