Ri Jeremiy 2 - Quiché Bible

Ri man u jiquil taj ri Israel

¹ Ri Ajawaxel xinuch'abej, xubij c'u chwe:

² “Jät jatzijobej ri tinimit Jerusalen; charaka' a chi' rech utz u tatabexic cäquibano: ‘¡Jewa' cubij ri Ajawaxel! Cänataj chwe chi aretak c'ä at ac'al, jic xatbin chnuwäch, chi' aretak xatux wixokil xinalok'ok'ej, xatteri c'u chwij pa ronojel ri chaki'j uwo sak, ulew ri man c'o ta cätic chuwäch.’

³ Ri Israel u jachom rib che nu nimaxic, are' ri utzalaj u wächinic ri nu tico'n. We c'o jachin jun cuban c'ax che, ri in quinc'äjisaj u wäch quebentak ulok nimak tak c'axc'ol puwi'. In, ri Ajawaxel, quinjiquiba' u bixic.”

⁴ Rija'lil tak ri Jacob, achalaxic tak aj Israel, chitatabej ri u tzij ri Ajawaxel.

⁵ Ri Ajawaxel cubij chiwe: “¿Jas ri lawaloyil xquirik ri e i mam pa ri in chi xenajtin chwe? Xebe chquij tak diosib ri man c'o ta qui patan, xukuje' c'u ri e are' xebux man c'o ta qui patan.

⁶ Man xeboc ta il che nu tzucuxic, xebenwesaj c'u ne ulok pa Ejipt, xinc'am c'u ne qui be chupam ri chaki'j uwo sak, chaki'j ulew ri nojinak chque tak siwan, ulew ri man c'o ta wi ja', nojinak chque tak sayowem, ulew ri man coc'ow ta wi jachin jun.

⁷ Ri in xixinc'am ulok pa we ulew ri' ri wächinel, rech quebitij tak ri e u wächinic xukuje' ri utzalaj tak jastak ri quequiyao. Xixpe c'ut ix xiwawasij ri wulew, xiban chwe chi xmuluw nu c'u'x che we ulew ri', ri wech.

⁸ Ri e cojol tabal tok'ob man xinquitzucuj taj, ri e ya' tak qui no'j ri nu tinimit man xquich'ob ta nu wäch, ri e c'amal tak be xquiwalijisala' tak quib chwij, e are chi c'ut ri e k'axal nu tzij xech'aw pa u bi' ri Baal xukuje' xequiterenej tak ri diosib ri man c'o ta qui patan.”

K'atoj tzij chrij ri Israel

⁹ “Rumal ri', in, ri Ajawaxel, quinjiquiba' u bixic: Quinjekeba' jun c'ulelanic iwuc' xukuje' cuc' ri e u wi' tak i mam.

¹⁰ Jix jawije' e c'o wi ri ch'akatak tak ulew chupam ri plo pa ri mox k'ab chixca'y c'ut; chitaka' bic jachin jun pa Sedar kas utz u ca'yexic chubana', che ri rilic we je c'ulmatajinak

¹¹ chi jun nim tinimit ri e k'ijilal ta diosib, e u q'uexom ta ri e u diosib. ¡Xa' c'u ne e subunelab tak diosib wa'! Are' c'u ri nu tinimit in u tzakom canok in ri in u juluwem, che qui k'ijilaxic ri e diosib ri man c'o ta jubik' qui patan.

¹² ¡Chaxibij awib, caj, chuwäch wa'! ¡Chatbirbob rumal xibim ib! In, ri Ajawaxel, quinjiquiba' u bixic.

¹³ Ri nu tinimit quieb u wäch ri mac u banom: in u q'uiakom canok in, u q'uiyibal c'aslic ja', xequic'ot c'ut ri kas e qui c'ua', c'ua' tak ri e xarxobinak ri man quequic'ol ta ri ja'.”

Ri xebuc'am ulok ri man u jiquibalil taj ri Israel

¹⁴ “Ri Israel man jun lok'om pataninel taj; ri are' man xalax taj jacha' jun lok'om pataninel. ¿Jas c'u che catolobaxic?

¹⁵ ¿Jas c'u che caquiban c'ax che e jacha' ta ne e coj, cuc' cowilaj tak wunem? Quiyojim can ri ulew; ri u tinimit tak xeporoxic man c'o ta c'u jun xto'taj ta can chupam.

¹⁶ Ri winak re Memps xukuje' re Tapnes xquipaxij ri a jolom.

¹⁷ Je a c'ulmam wa' rumal rech chi xinaq'uiak canok ri in, ri in ri Ajawaxel ri a Dios ri quinc'am c'u a be chupam ri be.

¹⁸ Are c'u ri camic, ¿jas ri cach'äc ruc' ri a bic pa Ejipt che ruq'uiaxic ri u ja'il ri Nil? ¿Jas ri cach'äc ruc' ri a bic pa Asiriy che ruq'uiaxic ri u ja'il ri Euprats?

¹⁹ Ri kas awetzelal cac'äjisan na a wäch, ri man a jiquil taj catc'okon na. Chatchomanok cawil c'u na ri lawaloyil xukuje' ri c'ayil ri uxinak chi quinaq'uiak canok man a yo'm ta nu k'ij in, ri in ri Ajawaxel ri a Dios. In, ri Ajawaxel ri c'o ronojel u cuinem, quinjiquiba' u bixic.”

U c'ulelanic ri Israel

²⁰ “Kas ojer ulok in a c'ulelam ulok, xak'il awib che nu nimaxic. Je xa bij wa': ‘Man quinwaj taj quinpatanijic.’ Puwi' conojel u tza'm ri juyub ri naj elinak chicaj xukuje' chuxe' ronojel che' ri jewel u xak xajach wi awib che ri cuc'axic quib cuc' achijab ixokib che qui banic macunic.

²¹ In xatintico jacha' uva ri sibalaj utz na, jacha' uva ri sibalaj utz na rija'lil. ¡Sibalaj c'u ne awetzelam awib, chi man quinch'ob ta chi ne a wäch!

²² Pune' ta c'u ne cach'aj awib ruc' u wa'l chaj cäcoj ta c'u ne ronojel ri ch'ipak ri cawaj, chnuwäch in xak je wi ri u k'ekal ri a mac. In, ri Ajawaxel quinjiquiba' u bixic.

²³ ¿Jasche catcuinic cabij: ‘Man nu tz'ajom ta wib mawi e nu k'ijilam subunelalaj tak diosib?’ Chawila' jas ri a c'aslemal ri xawuc'aj pa ri beya', chawila' ronojel ri a banom at, ati't camey ri aninak caxiq'uinilok pa ronojel ri cabe wi;

²⁴ juyubal ati't bur ri cunim rib chupam ri juyub ri casirnaj u pa u tza'm cäcasow chque rayinic. Aretak cachokchotic, man c'o ta jachin cäcuin ta che u k'ilic. We cätzucux rumal jun ama' man cak'itaj taj: amak'el cachokchotic.

²⁵ ¡Israel, mebe a soc ri awakan catxiquinic man e c'o ta a xajäb, maya' c'olbal chi cachaki'jar ri u pa a kul! Are c'u ri at xabij: ‘Jayi', man bantajel taj; quebenlok'ok'ej ri e jule' quinbe na cuc'.’ ”

Ri Israel takal u c'äjisaxic u wäch

²⁶ “Jacha' ri eläk'om ri quesax u q'uixbal aretak cätatajic, jewa' ri u q'uixbal ri Israel ri quel na, ri tinimit, ri ajawinelab, tak ri e c'amal tak be, ri e cojol tabal tok'ob xukuje' ri e k'axal tzij;

²⁷ che c'u juwi' che' je caquij wa' che: ‘Lal nu tat’; che c'u jun abaj: ‘Lal nu nan.’ Are c'u ri chwe in, are caquiya' ri quij chnuwäch man are ta ri qui palaj. Xuwi c'u caquina' jubik', chi e c'o chupam u q'ueyowal, caquibij chwe: ‘¡Chpet la che ka to'tajisaxic!’

²⁸ Juda, ¿jawije' tak e c'o wi ri diosib ri xebaban chawe? ¡E q'ui ri a diosib e c'olic e jacha' tak ri tinimit! ¡Chepet ba' ri e are', cakil c'ut we quecuin che a to'tajisaxic aretak chpe ri u q'ueyowal!

²⁹ ¿Jas ri nu c'ulelaxic quibano, iwonojel c'ut ix uxinak man ix ta nimanel chwe? In, ri Ajawaxel, quinjiquiba' u bixic.

³⁰ Xak lok' xinc'äjisaj qui wäch ri e i c'ojol, man xcaj ta c'ut xquetamaj taj ri tijonic. Kas ri ix, ix junam cuc' ri c'analaj tak coj, xebicämisaj tak ri e k'axal tak tzij ri e c'o iwuc'.

³¹ (Xukuje' c'u ri ix, ri ix re we ija'lil ri' camic, chiya' i xiquin che ri cubij ri Ajawaxel chiwe.) Israel, ¿la in puch uxinak jun chaki'j uwo sak chawe?, ¿jun ulew ri nojinak chque tak mujal? Nu tinimit, ¿jasche cabij: ‘Uj torotalic; mawi jumul cujtzelej chic uc' la?’

³² ¿La cuya' puch jun ixok quesach pa u jolom ri e u mulk'ab ri u witak u xiquin xukuje' tak ri e wikbal tak rib re ri u c'ulanem? Man je ta c'u u banom ri nu tinimit, sibalaj ojer chi ri' in sachinak pa u jolom.

³³ ¡Sibalaj aweta'm ri be aretak catbe che qui tzucuxic ri quebarayij! ¡At ajtij pa ri tijobal re ri etzelal!

³⁴ Tz'ajtajinak ronojel ri awatz'iak cumal ri qui quiq'uel ri mebayib ri man c'o ta qui mac, quech winak ri man xebarik taj ri cätajin ta caquiban jun il.

³⁵ Pune' c'u a banom ronojel wa': ‘Man c'o ta nu mac catcha' c'ut. Ri Dios man oyowarinak ta wuc'.’ Utz ri', cabij c'u ya' chi man at macuninak taj, quinchoman c'u na awuc'.

³⁶ ¿Jasche sibalaj aninak at c'o che qui q'uexic ri e to'l tak awech? Xukuje' ri Ejipt man catuto' ta na, jacha' ri u banom chic ri Asiriy chawe man xatuto' taj.

³⁷ Cattzelej c'u na ulok caya' can ri Ejipt at nojinak che q'uixbal, rumal rech chi ri in man u c'ulam ta nu wäch cuc' ri a cuban a c'u'x chquij chi catquito', man c'o ta c'u cach'äc na cumal.”