Ri Jeremiy 19 - Quiché Bible

C'utbal che ri k'ebal ri cäpaxixic

¹ Ri Ajawaxel xubij chwe: “Jät jalok'o jun k'ebal re t'ac, chebasiq'uij jujun nimak tak tatayib rech ri tinimit xukuje' jujun tak cojol tabal tak tok'ob ri e ri'jab chic.

² Chatel c'u bic jät pa ri Beya' re Ben-inom, chuwäch ri Oquibal ri e c'o wi tak ri Bo'j, chaya' c'u u bixic chila' ri tzijol ri quinya' u bixic chawe.

³ Chabij: ‘Rajawinelab ri Juda xukuje' ri winak ri e c'o pa Jerusalen, chitatabej ri tzijol ri cubij ri Ajawaxel ri c'o ronojel u cuinem, ri u Dios ri Israel: Quintak ulok jun nimalaj c'axc'ol ri sibalaj nim puwi' we c'olbal ri', ronojel c'ut ri cäto'w ri quinya' u bixixic cäpe na ranima'.

⁴ Rumal rech chi ri aj israelib xinquitzak canok xquijalwächij c'ut we c'olbal ri' pa jun ulew chic; chupam xquichi'j wi c'oc' k'ol chque tak ri e jule' diosib, ri man quetamam ta qui wäch mawi ri e are' mawi ri e qui mam mawi tak ri e ajawinelab re Juda, xquinojisaj c'u che qui quiq'uel winak ri man c'o ta qui mac.

⁵ Quequiyac c'u ne xukuje' tak porobal che qui poroxic tak ri e qui c'ojol chetabal tok'ob ri cächajirisaxic che ri Baal, we jasach ri' man xintak ta u banic mawi xinbij chque, ri mawi ne xukuje' xoc'ow ta pa ri nu chomabal.

⁶ Rumal ri' quepe na k'ij chi we c'olbal ri' man cäbinax ta chic Topet che mawi Beya' re Ben-inom, xane' Beya' re ri Cämisanic. In, ri Ajawaxel, quinjiquiba' u bixic.

⁷ Chupam we c'olbal ri' quinban na ch'akatak che ri u chomam u banic ri Juda xukuje' ri Jerusalen. Quinban na chi ri e qui c'ulel quech'äcan na paquiwi' quequicämisaj c'ut, e are' c'ut we cäminak tak winak ri' quebajwataj na che qui ti' tak ri c'uch xukuje' che qui ti' ri juyubal tak awaj.

⁸ Quinban na che we tinimit ri' chi cux jun chaki'j uwo sak, pa jun jasach ri cuya' xibibal ib chque conojel ri queboc'ow chupam quexibitajic xukuje' quemayin na aretak caquilo chi ronojel etzeletajinak.

⁹ Quinban na chi ri winak quequitij ri qui c'ojol xukuje' tak ri qui mia'l, xukuje' chi quequitijila' tak na quib rumal ri rikoj c'ax ri queriktaj wi ri quelatz'obisax wi na cumal ri e qui c'ulel ri e cämel aretak caquisolij rij ri tinimit.’

¹⁰ Aretak cabitaj wa', chabana' ch'akatak che ri k'ebal chquiwäch conojel ri achijab ri at achilaninak,

¹¹ chabij c'u chque: ‘Ri Ajawaxel ri c'o ronojel u cuinem je cubij wa': Quinban na ch'akatak chque we winak ri' xukuje' che we tinimit ri' jacha' ri jachin cuban ch'akatak che jun k'ebal re t'ac, ri man cuya' ta chic cawikic. Ri winak quequimuk tak na ri cäminakib pa Topet, rumal rech chi man c'o ta chi c'olbal ri quemuk ta wi.

¹² Je quenbana' wa' che we tinimit ri' xukuje' chque we winak ri' ri e c'o chupam. Junam quenbana' che jas u c'ulmam ri Topet. In, ri Ajawaxel quinjiquiba' u bixic.

¹³ Ri ja tak re Jerusalen, ri e rachoch tak ri ajawinel re Juda xukuje' ri qui wi' tak ri ja ri quequichi'j wi c'oc' k'ol chque conojel tak ri ch'imil ri quequijamij wi tak sipanic re u wa'l uva chque tak ri qui diosib ri winak, quechomax na chi e tz'il quejunamataj ruc' ri Topet.’ ”

¹⁴ Bantajinak chi c'u wa', ri Jeremiy xtzelej ulok pa Topet, ri takom wi bic rumal ri Ajawaxel che tzijonem pa ri u bi', xutac'aba' c'u rib cho ri uwo ja rech ri rachoch Dios, xubij c'u che ronojel ri tinimit:

¹⁵ “Ri Ajawaxel ri c'o ronojel u cuinem, ri u Dios ri Israel, je cubij wa': ‘Quebentak na ulok che we tinimit ri' xukuje' chque conojel ri c'ulja tak tinimit conojel ri c'äjisabal tak wächaj ri nu yo'm u bixic chque, quitacarisam c'u quib rech man quequinimaj taj ri nu tzij.’ ”