Ri Jeremiy 18 - Quiché Bible

C'utbal chupam ri rachoch ri banal bo'j

¹ Ri Ajawaxel xinuch'abej, xubij c'u chwe:

² “Chatkaj bic cho rachoch ri banal bo'j chila' c'u quinya' wi na u bixic jun tzijol chawe.”

³ In, Jeremiy, xinkaj bic xenrika' c'ut ri banal bo'j cätajin cuchacuj ri t'ac chupam ri chacubal.

⁴ Aretak c'ut man utz ta quebel ri chac ri cätajin cubano, cuban chi jun kas ruc' ri t'ac ri', c'ä cacanaj na canok jas ri caraj.

⁵ Xubij c'ut ri Ajawaxel chwe:

⁶ “¿La ma ta pu lo quincuinic in che u banic chiwe, ix aj israelib, junam jas ri cuban we banal bo'j ri' ruc' ri t'ac? Ri ix pa ri nu k'ab ix jacha' ri t'ac pa ri u k'ab ri banal bo'j. In, ri Ajawaxel, quinjiquiba' u bixic.

⁷ Pa jun jok'otaj ri takalic quinchomaj u bokic, u t'akixic xukuje' u sachisaxic u wäch jun nim tinimit o jun ajawibal.

⁸ We c'u ne we nim tinimit ri' cutanaba' u banic ri etzelal, man quintak ta chi c'u ulok ri c'äjisabal wächaj ri nu suc'umam u takic che'.

⁹ Pa jun k'ijol chic quinchomaj u yaquic xukuje' u q'uiyisaxic jun nim tinimit o jun ajawibal.

¹⁰ We c'u ne we nim tinimit ri' cuban ri etzelal man coc ta c'u il che u banic ri nu bim che, man quebentak ta chi c'u ulok tak ri utzil ri nu suc'umam u takic che.

¹¹ Chabij, ba', chque ri winak aj Juda xukuje' chque ri winak ri e c'o pa Jerusalen chi ri in, ri Ajawaxel, quinbij chiwe: ‘Nu bin chi cäpe ri etzelal piwi'; cätajin quinchomaj u c'äjisaxic i wäch. Xopan ba' ri k'ij chiya' ba' canok ri itzel be; chiwutzirisaj ri i c'aslemal xukuje' tak ri e i banoj.’

¹² We winak ri' caquibij na chawe: ‘¡Matzak a k'ij! Are cäkatakej na u banic ri cäkaj chkawäch are c'u cäkatakej na ri tacalaj itzel u rayinic ri kanima'.’ ”

¹³ Rumal ri' cacha' ri Ajawaxel: “Chita' u tzijol chquixo'l ri nimak tak tinimit, we c'o jachin jun u tom ta jun jasach ri junam ta ruc' wa'. ¡Ri tinimit re Israel u banom jun jasach ri sibalaj man c'o ta u patan!

¹⁴ ¿La c'o ta pu jumul quetzaj ta ri sakalaj tew paquiwi' ri tac'atak tak abaj aj Libano? ¿La c'o ta pu jumul quetzaj ta ri ja' ri quejororic ri quekaj ulok xo'l tak ri c'ache'laj?

¹⁵ Are c'u ri nu tinimit in sachinak pa u jolom, quebuchi'j c'u c'oc' k'ol chque ri xa' e subunelab tak diosib. U jaluch'um ri u be, ri ojer u be, e u takem c'u tak be ri man e etamatal taj.

¹⁶ U mac rech wa' u banom chi ri ulew uxinak jun chaki'j uwo sak, pa jun mayijinem amak'el. Ronojel ri coc'ow chupam cuxibij na rib cusutisa' na ri u jolom.

¹⁷ In, jacha' jun quiakik' re ri elebal k'ij, quinjabuj na ri Israel; quinban na che chi canimaj chquiwäch tak ri e u c'ulel. In quintzalc'atij ri u wowij che man are taj ri nu palaj, aretak chopan ri k'ij re ri c'äjisabal u wäch.”

Cachomax u cämisaxic ri k'axal tzij

¹⁸ Ri winak xquibij: “Quekabana' jun banel che u sachisaxic u wäch ri Jeremiy. Mawi c'u jubik' ma ta e c'o chic cojol tabal tok'ob chujtijonic, mawi ajno'jab ri cheyo'w ta ka no'j, mawi k'axal tzij ri cheyo'w ta u bixic ri u tzij ri Dios chke. Ka walijisaj jun tzijtal chrij rech cäcämisaxic. C'o makaya' wi ka xiquin che ri cubij.”

Ri u ch'awem ri Jeremiy

¹⁹ ¡Ajawaxel, chintatabej la! ¡Chtatabej la ri caquibij ri e nu c'ulel!

²⁰ ¿La are ri etzelal cätojbex rech ri utzilal? ¡E are' qui c'otom ri nu julil! Chnataj che la chi nu tac'abam wib chwäch la che u banic bochi'nic paquiwi', che u tz'onoxic che la chi tasa' la ri oyowal la chquij.

²¹ ¡Are c'u ri camic, bana' la chi checäm tak ri e qui c'ojol rumal wi'jal o pa u chi' ch'ich' re ch'o'j; che canaj malca'nib ri quixokil ma ta c'u e c'o chi cal! ¡Are c'u ri cämisanel yabil checämisan tak ri cachijab e are' c'ut ri e qui c'ojolab checäm pa ri ch'o'j!

²² Xak c'ätetal chetaka' la ulok paquiwi' juk'at eläk'omab; ¡chetataj tak ri qui rakoj tak chi'aj re xibriquil! Xquic'ot c'u jun jul rech quintzak chupam, xequicoj c'amibal pa ri nu be.

²³ Are c'u ri lal, Ajawaxel, e eta'm la conojel tak ri chomanic ri e qui banom che nu cämisaxic. ¡Mäsach la qui mac che ri quetzelal mawi mäsach ri qui mac pa jolom la! ¡Chbana' la chi quekaj pa k'ab la, chäc'äjisaj la qui wäch ruc' oyowal!