Ri Jeremiy 17 - Quiché Bible

Ri u mac xukuje' ri c'äjisabal u wäch ri Juda

¹ “Juda, ri a mac tz'ibam ruc' tzoq'uibal re räx ch'ich', tzoc'om ruc' u wi' diamant chuwäch ri rabajil ri awanima', chquij tak ri cuc'a' ri a porobal.

² Ri e awalc'ual quenataj tak ri porobal chque xukuje' ri tastalicalaj tak cuta'm ri que k'ijilaxic ri e c'o chquinakaj ri juwi' tak che' ri k'eku'm tak qui xak xukuje' paquiwi' tak ri juyub ri naj e elinak tak chicaj

³ xukuje' paquiwi' tak juyub ri e c'o pa tak ri ulew. Qui mac tak quech ri e a mac, quinban na chi quebeläk'ax tak ri e a k'inomal xukuje' ri jastak awech ri pakal tak cajil, chi chetolobax tak ri e qui wi' tak ri tastalic tak a juyub pa conojel tak ri e awulew.

⁴ Cajam na canok ri ulew ri xinya' chawe jacha' che awechbal, quinban c'u na chawe chi catux jun lok'om pataninel chque ri e a c'ulel pa jun ulew ri man e awilom taj, rumal rech chi ri woyowal tzijtajinak jacha' jun k'ak' ri catuporoj na.”

Quieb oxib k'alajisanic

⁵ Ri Ajawaxel cubij: “C'okotajinak jachin ri cutas ri ranima' chwij are c'u cujiquiba' u c'u'x chquij tak ri winak cutzucuj c'u u tok'exic rib chquij.

⁶ Cux na jacha' ri q'uix ri caq'uiy pa ri chaki'j uwo sak, ri man c'o ta jachin quilinic: ri caq'uiy xo'l tak ri abaj, pa ri ulew re atz'am, ri man c'o ta jun winak ri cajeki' ta chila'.

⁷ Utz re c'u ri winak ri cujiquiba' u c'u'x chwij, ri queyem chwe.

⁸ Cux c'u na jacha' juwi' che' ri tiquil chuchi' jun nima', ri quebuyuk tak ri e u ra'b chuchi' ri ja' man c'u cuna' ta rib aretak quepe tak ri k'ak'al, amak'el xak cätojtak wi ri e u xak. Pa ri u k'ijol ri sak'ij man cuna' taj, mawi jumul cutanaba' ta u ya'ic u wäch.

⁹ Man c'o ta jun jasach c'olic ri sibalaj ta subunel na xukuje' sibalaj ta etzeletajinak na jacha' ri anima'aj aj winak. ¿Jachin ta ri ticarel che retamaxic?

¹⁰ In, ri Ajawaxel, ri quinnic'oj ri anima'aj weta'm c'ut ri c'o c'ä chupam, quinya' c'u chque chi chquijujunal ri takalic, e je jas ri e u banoj.”

¹¹ Ri man ruc' ta suq'uilal cak'inomaric xak junam ruc' ri sakco'r ri cujupulej qui sakmol jule' chic. Quetiltit rakan u k'ab cuya' can ri u k'inomal, chuq'uisbalil xa' c'u jun con chic.

¹² Ri rachoch ri ka Dios are' jun tem re ajawibal ri cäjuluwic, ri c'o chicaj kas pa ri tiquiritajic.

¹³ Ajawaxel lal ri' ri eyebal u c'u'x ri Israel. Ronojel ri catzakow la canok cacanaj pa q'uixbal. Ronojel ri cunajtajisaj rib che la cäsach na u wäch jacha' jun bi'aj ri tz'ibam pa ri puc'uc' ulew, rumal ri tzakic la canok, ri bulbux ja' ri cajororic.

Ri Jeremiy cätzijon ruc' ri Ajawaxel

¹⁴ Chincunaj la, Ajawaxel, quincunataj c'u na; chincolo' la, quincolotaj c'u na, xuwi c'u ri lal quink'ijilan che la.

¹⁵ Ri winak caquibij chwe: “¿Jas xc'ulmataj cuc' tak ri e u tzij ri Ajawaxel? ¡Chbe tz'akat ba' camic!”

¹⁶ Man, nu cojom ta c'u ne nu chuk'ab chi cätak ta la ulok jun c'äjisabal wächaj, mawi ne nu rayim chi chepeta tak c'axc'ol paquiwi'. Lal kas eta'm la ri nu bim, chwäch c'u la xinbij wi.

¹⁷ Mux la jun xibriquil chwe, lal c'ut ri nu panibal pa ri jok'otaj re c'axc'olil.

¹⁸ Chesaj la qui q'uixbal ri quebanow c'ax; ma ta c'u are' ri in; e are' ri' choc qui xi'b, ma ta c'u in. Bana' la chi chepet q'ui tak c'axc'ol paquiwi', chq'uisa' la qui muchic jumul xukuje' camul.

Cänatax u chajixic ri k'ij re uxlanem

¹⁹ Ri Ajawaxel xubij chwe: “Jät jatetac'al chuchi' ri Oquibal pa ri Tinimit, jawije' ri queboc wi ulok xukuje' quebel wi bic tak ri ajawinelab re Juda, xukuje' chabana' chquichi' ri niq'uiaj oquibal chic pa Jerusalen.

²⁰ Chabij chque ri winak: ‘Ajawinelab xukuje' tinimit ronojel re Juda, conojel ri winak re Jerusalen ri quixoc'ow pa tak we oquibal ri', chitatabej ri cubij ri Ajawaxel.

²¹ Ri Ajawaxel cubij: Pa ri k'ij re uxlanem che c'u qui tok'obisaxic qui wäch ri kas e i c'aslemal, mebic'am bic eka'n mawi mebicoj bic pa tak ri e oquibal pa Jerusalen.

²² Miwesaj c'u ne jun eka'n chupam ri iwachoch pa ri k'ij re uxlanem, mawi c'o jun chac miban chupam. Chatasa' ri kij re uxlanem chwe, jacha' ri xeben tak wi ri e i mam.

²³ Man xquiya' ta c'u qui xiquin chwe mawi xinquinimaj, xane' xebux täc man xcaj ta c'ut xenimanic mawi xc'äj qui wäch.

²⁴ In, ri Ajawaxel, quinjiquiba' u bixic: Kas c'u chixniman chwe, micoj bic jun eka'n chquichi' tak ri oquibal pa ri tinimit chupam ri k'ij re uxlanem; chitasa' we k'ij ri' chwe c'o c'u jun chac miban chupam.

²⁵ We je qui ban wa', amak'el e c'o tak ajawinelab ri' ri quet'uyi na puwi' ri u tem re ajawibal ri David queboc'ow c'u pa tak ri oquibal re we tinimit ri' pa tak carwaj ri e wiktalic xukuje' chquij tak quiej, ri achilatal cumal ri e cach tak takanelab xukuje' tak winak re Juda xukuje' tak re Jerusalen. Ri Jerusalen amak'el quec'oji' na winak chupam.

²⁶ Quepe c'u na winak ri quebel na ulok chquipam tak ri tinimit re Juda ri e c'o tak chrij ri Jerusalen, xukuje' ri e c'o chupam ri rulewal ri Benjamin, ri re ri lianic, xukuje' ri e c'o pa tak ri rulewal ri c'ache'laj xukuje' ri e c'o pa ri Negueb. Quequic'am tak ulok awaj chupam ri rachoch Dios che tabal tok'ob ri quechajirisaxic xukuje' chque niq'uiaj tabal tak tok'ob chic, sipanic quech tak c'äj xukuje' c'oc' k'ol, xukuje' tak sipanic quech maltioxinic.

²⁷ We c'u ri ix man qui nimaj taj ri nu takanic chi quitas ri k'ij re uxlanem xukuje' chi man quebicoj ta tak eka'n pa ri k'ij ri' pa tak ri oquibal pa ri Jerusalen, quincoj c'u na k'ak' chque tak ri oquibal chupam ri tinimit, jun k'ak' ri cusachisaj na qui wäch tak ri e cachoch tak ri ajawinelab ri e c'o pa Jerusalen man c'o ta c'u jachin ta jun ri cäcuinta che u chupic.’ ”