Ri Jeremiy 16 - Quiché Bible

Ri Jeremiy cuc'am takanic pa u k'ab ri Ajawaxel

¹ Ri Ajawaxel xinuch'abej, xubij c'u chwe:

² “Man catc'uli' taj mawi chec'oji' ta awalc'ual chupam we ulew ri'.

³ In c'ut, ri Ajawaxel, quinya' na u bixic chawe ri quequic'ulmaj na ri alc'ualaxelab ri quebalax na chupam we ulew ri' xukuje' chque ri tataxelab ri e c'o quech.

⁴ Quebecäm na cumal xibibalalaj tak yabilal man c'o ta c'u jun quebok'en na mawi c'u quemuk na: quepuni na canok cho tak ri ulew e jacha' ta ne qui mes tak awaj. Ri ch'o'j xukuje' ri wi'jal queq'uisow na tzij paquiwi', we cäminakib tak ri' xa' c'uch quet'ubin na xukuje' juyubal tak awaj.”

⁵ Ri Ajawaxel xubij chwe xukuje': “Man catoc ta chupam jun ja ri c'o wi jun cäminak; man cawok'ej ta u wäch mawi cac'ut awib chi at c'axc'obinak ta che, wesam ri nu jamaril che we tinimit ri', ri nu lok'ok'ebal c'uxaj xukuje' ri welebal c'uxaj. In, ri Ajawaxel quinjiquiba' u bixic.

⁶ Chi nimak chi ch'utik quecäm na chupam we ulew ri'; man c'o ta jun quemukuwic, mawi quebok'enic, mawi cuc'ut ta rib chi c'axc'obinak ta chque cusoc ta ri u cuerp o cutolorisaj taj ri u jolom.

⁷ Man c'o ta jun quebuban ta ula'nic quech cäminakib che u cu'bisaxic ta qui c'u'x ri aj cäminakib, pune' ta ne are' cäcäm ri tataxel o ri nanaxel.

⁸ Mawi ne matoc pa jun ja ri cätajin caban wi ula'nic, c'äte t'uyul ta c'u cuc' che wa'im xukuje' uq'uianic.

⁹ Rumal rech chi ri in, ri Ajawaxel, ri c'o ronojel u cuinem, ri u Dios ri Israel, quink'alajisaj: In quinban na chi quebetanabax pa we ulew ri' ri bix tak que nimak'ij xukuje' quech quicotemal, xukuje' tak ri bix quech tak c'ulanem. We jastak ri' quebec'ulmataj na chquipam tak ri kas qui k'ij, kas c'u ix quixilow na.

¹⁰ Aretak chaya' u bixic we tzijol ri' che ri tinimit, caquic'ot na a chi': ‘¿Jasche u takom ulok ri Ajawaxel pakawi' we c'axc'ol ri' ri sibalaj nim? ¿Jas ri etzelal ri ka banom? ¿Jas ri macaj ri ka banom chuwäch ri Ajawaxel ri ka Dios?’

¹¹ At chatzelej u bixic chque: ‘Ri Ajawaxel cujiquiba' u bixic: Wa' cäc'ulmatajic rumal rech chi ri e i mam xinquitzak canok xebe che qui terenexic diosib, che qui ya'ic tak k'ijilanic chque xukuje' che u ya'ic tak qui k'ij; are c'u ri in xinquitzak canok man xequitz'akatisaj ta c'u qui banic tak ri pixbenic ri xebenya' chque.

¹² Are chi c'u ri ix xoc'ow chi na u wi' ri etzelal ri xebiban chquiwäch ri xequiban ri e i mam, chi jujunal c'ut are i takem ruc' taquil ri itzelalaj u chomanic ri ranima' man c'u e nimaninak ta chwe.

¹³ Rumal ri' quebenwesaj bic chupam we ulew ri' quec'am bic pa jun ulew ri mawi ri ix mawi ri e i mam e quilom taj, chila' c'u quequipatanij wi na chi pa k'ij chi chak'ab jule' tak diosib chic, man c'u quel ta na nu c'u'x chiwe.’

¹⁴ In, ri Ajawaxel quinjiquiba' u bixic, cäpe c'u na jun k'ijol ri man cäquiban ta chic ri chi'nic ri kas cäban na, man cäquibij ta chic: ‘Rumal ri u c'aslemal ri Ajawaxel, ri xebesan ulok ri aj israelib pa Ejipt’,

¹⁵ xane' caquibij na: ‘Rumal ri u c'aslemal ri Ajawaxel ri xebesan ulok ri aj israelib chupam ri ulew ri c'o pa ri iquiak'ab xukuje' chquipam ri niq'uiaj tak ulew chic ri e u jabum tak wi'’. In quinban na chi quixtzelej chupam ri iwulew, chupam ri ulew ri xinya' chque ri e i mam.

¹⁶ In, ri Ajawaxel, quinjiquiba' u bixic, quenbana' chi quepe q'ui tak caranelab rech quequicarij ri aj israelib. Quenbana' c'u na chi quepe q'ui tak tzucunelab che quitzucuxic quequesaj c'u ulok pa conojel tak ri c'ache'laj xukuje' paquiwi' tak ri juyub xukuje' c'ä pa tak ri pec ri e c'o xo'l tak ri tzac'atzak tak abaj.

¹⁷ Quebenwil c'u conojel tak ri e qui banoj; man c'o ta jun cäc'utaj ta can chnuwäch, mawi ri e qui mac quequic'u ta can quib chquiwäch ri nu bak'wäch.

¹⁸ Nabe quinban na chque chi quequicamulij qui tojic tak ri quetzelal xukuje' tak ri qui mac, rumal rech chi xquitz'iloj ri wulew cuc' tak ri xawebalalaj cäminak tak e qui diosib, pa ronojel c'ut ri ulew ri xinya' chque jacha' che quechal xequiban jastak ri itzel quebenwilo.”

Ri Jeremiy cätzijon ruc' ri Ajawaxel

¹⁹ Ajawaxel, chuk'ab xukuje' to'bal wib, nu panibal pa ri jok'otaj aretak xak quieb cubij panuwi'; uc' la quepe wi na ri nimak tak tinimit ri c'o tzam tak ri uwächulew, caquibij c'u na che la: “Xuwi e subunelab tak diosib, man c'o ta qui patan mawi c'o ta jas quecuin ta che qui banic xequic'am ri e ka mam che quechbal.

²⁰ ¿La cäcuin ri winak quebuban tak ri e u diosib? ¡Man ba' kas ta e diosib ri'!”

Ri xutzelej u bixic ri Ajawaxel

²¹ “Rumal ri', kas xa' jumul quenc'utu' na ri nu cuinem puwi' ronojel; jeri' caquetamaj na chi ri nu bi' are ri Ajawaxel.”