Ri Jeremiy 15 - Quiché Bible

Cäya' u bixic ri c'äjisabal wächaj

¹ Ri Ajawaxel xubij chwe: “Pune' ta ne ri Moises rachil ri Samuel quelquitac'aba' ta quib waral, chnuwäch in, man quel ta na nu c'u'x che we tinimit ri'. Chabij chque chi chebel chnuwäch, chi cheboj.

² We c'u ne caquicot a chi' jawije' ri quebe wi na, chabij wa' chque ri quinbij: ‘Ri xya' u bixic chi quecäm rumal cämisanel yabilal quecäm na rumal cämisanel yabilal; ri xya' u bixic chi quecäm chupam ri ch'o'j, chupam ri ch'o'j quecäm wi na, ri xya' u bixic chi quecäm rumal wi'jal, rumal wi'jal quecäm na; ri xya' u bixic chi quec'am na bic pa jun ulew chic, quec'am na bic pa jun ulew chic.’

³ In, ri Ajawaxel, quinjiquiba' u bixic: quebentak ulok quiejeb jalan tak c'äjisabal wächaj: quecämisax na pa ri ch'o'j, quejurux na cumal tak ri tz'i', quet'ubix na cumal tak ri c'uch quet'okopix na cumal tak ri juyubal tak awaj.

⁴ Quinban na chi conojel ri nimak tak tinimit pa ri uwächulew caquixe'j na quib che ri quenbana' na chque, rumal rech ri u banom ri ajawinel re Juda, ri Manases, ri u c'ojol ri Ezequiy pa Jerusalen.

⁵ ¿Jachin ta lo ri quel ta na u c'u'x chawe, Jerusalen? ¿Jachin ta lo ri cätok'obisan ta na a wäch? ¿Jachin ta lo ri coc ta na il che ri rutzil a wäch?

⁶ At xinaxutuj canok, are xaya' can ri awij chnuwäch. In, ri Ajawaxel quinjiquiba' u bixic. Rumal ri' in, in k'itajinak che ri coch'onic, quinwalijisaj na ri nu k'ab che u c'äjisaxic a wäch, quinsachisaj c'u na a wäch.

⁷ Xebenjabuj ri a winak jacha' ri caban che ri pajo, xebenwesaj chquipam tak ri tinimit re ri ulew; man e c'o ta ralc'ual ri nu tinimit xebenya' canok, xinsachisaj u wäch rumal rech chi man xraj taj xuya' ta can ri itzel u c'aslemal.

⁸ C'o na ri qui q'uiyal ri malca'nib ri xebenya' can chquixo'l chuwäch ri sanyeb re ri plo. Kas tiquil k'ij xinbano chi xkaj ri cämical paquiwi' ri nanaxelab ri e c'o tak cal c'ojolab; xak c'ätetal xinbano chi xkaj ri c'axc'ol xukuje' ri xibriquil paquiwi'.

⁹ Ri nanaxelab ri e c'o q'ui cal cäpe canima', cäbe ri cuxlab; elinak qui q'uixbal e mach'ital c'ut, ri u sakil ri k'ij cux k'ekumalil chque. We e c'o jujun quec'asi' canok, quinban na chi quecämisax cumal tak ri e qui c'ulel. In, ri Ajawaxel, quinya' nu tzij.”

Curak u chi' ri k'axal tzij

¹⁰ ¡Tok'ob nu wäch nu nan, chi xinalaj la. Xa' che c'ulelanic xukuje' che ch'ojinic ruc' ronojel ri uwächulew! Man c'o ta jachin jun nu yo'm ta puak che pa kajical, mawi qui yo'm ta chwe pa kajical, conojel c'ut quinquic'okoj.

¹¹ Je chelok jas ri qui c'okonic, Ajawaxel, we man utz patanixic la nu banom, we man nu bochi'm la paquiwi' ri e nu c'ulel. Aretak e c'o pa u q'ueyowal xukuje' c'axc'olil.

Ri Dios cuya' u bixic ri u c'äjisaxic u wäch ri Israel

¹² “¿Jachin ta ri cäcuinic cupaxij ri räx ch'ich' re ri iquiak'ab xukuje' ri k'an ch'ich'?

¹³ Qui mac quech ri e a mac Israel, quebenjacha' ri jastak awech xukuje' tak ri e a k'inomal chque tak ri e a c'ulel, ronojel ri c'o pa ri awulew, rech quequic'am bic xak c'u quequicochij bic.

¹⁴ Quenbana' chawe chi catux jun lok'om pataninel chque ri e a c'ulel pa jun ulew ri man a c'oxomam taj, rumal rech chi nicowirinak ri woyowal jacha' jun k'ak' ri cuporoj na.”

Ri k'axal tzij cutz'onoj ri u to'banic ri Ajawaxel

¹⁵ Ajawaxel, lal chi eta'm la ronojel, ¡Chinnataj che la pet c'u la che nu to'ic! ¡Chya' la rajilal u c'axelal chque ri caquitzucuj u banic c'ax chwe! Sibalaj c'u macoch'on na la chque chi quinya' la pa ri cämical, chila la chi rumal ech la quinch'ij ri nu yok'ic.

¹⁶ Aretak catzijon la wuc', in quebenbik' bic tak ri e tzij la: man e c'o ta c'u e jewa' chwe quicotemal c'ut che ri wanima', rumal rech chi in ech la, Ajawaxel xukuje' Dios ri c'o ronojel u cuinem.

¹⁷ In nu k'ilom wib che u rikic wib cuc' ri xuwi caquichomaj u quicotisaxic quib; aretak xban ech la chwe nu c'amom bic jun c'aslemal pa nu tuquiel wi, xinanojisaj c'u la ruc' ri oyowal la.

¹⁸ ¿Jasche man c'o ta u q'uisic ri nu k'oxomal? ¿Jasche man cunatajel taj ri nu socotajic, man c'u cuc'amowaj ta ronojel u wäch cunanic? Lal uxinak chwe jacha' xa' jun c'utwächinic ja' ri xa' cawäch.

Ri xutzelej u bixic ri Ajawaxel

¹⁹ Xutzelej c'ut u bixic ri Ajawaxel chwe: “We cattzelej wuc', catinc'am chi jumul catcuin c'ut quinapatanij. We cak'il awib che xak qui bixic tak tzij we xuwi quebabij jastak ri nimak qui banic, at ri' ri catch'aw na che nu q'uexwäch. E are' ri rajawaxic quetzelej awuc', man at ta c'ut ri cattzelej ta cuc'.

²⁰ In quinban na chi chatux che we tinimit ri' jacha' jun tapia re k'an ch'ich', ri man cäban ta cuinem che u ch'äquic. Quech'ojin na awuc' man c'u quecuin ta che a ch'äquic, in c'o c'ut awuc' che a colic xukuje' che a toric. In, ri Ajawaxel, quinya' nu tzij.

²¹ Catin wesaj na pa qui k'ab ri itzel tak winak, ¡Catincol na catinwesaj na pa qui k'ab ri tokinelab!”