Ri Jeremiy 14 - Quiché Bible

Ri nimalaj sak'ij

¹ Rumal rech ri sak'ij, ri Ajawaxel xuch'abej ri Jeremiy xubij c'u che:

² “Ri Juda cok'ic rumal bis, ri u tinimit tak e c'o chupam ri rikoj c'ax, ri winak e liq'uiloj chotak ri ulew. Ri Jerusalen curakakej u chi' rumal ri k'oxomal.

³ Ri k'inomab quequitak ri qui pataninelab che u c'amic ja'; quebe wa' chi' tak ri c'ua' man quequirik ta c'ut, quetzelej c'u ulok e cuc'am tak ri qui k'ebal man c'o ta c'o chquipam; sachinak qui c'u'x e nojinak che q'uixbal, quequich'ukula' tak ri qui jolom.

⁴ Ri e jekel pa tak ri juyub sachinak qui c'u'x quequich'ukula' tak ri qui jolom, rumal rech chi man c'o ta jäb sibalaj c'u chaki'jarinak ri ulew.

⁵ Xukuje' ne tak ri ati'tab tak masat pa ri juyub, quequixutuj can tak ri cal ri c'äte quebalataj cumal, rumal rech chi man c'o ta k'ayes che quecha'.

⁶ Ri juyubal tak bur, e tac'atoj tza'm tak ri wuk'uwak chaki'j tak juyub, ri e talonic cäquijic' quiakik' jas cäquiban ri xex tak awaj; xak c'u quecäsow chic rumal rech chi man c'o ta k'ayes che quecha'.”

Ri k'axal tzij cach'aw puwi' ri tinimit ruc' ri Ajawaxel

⁷ ¡Ajawaxel, pune' cujquitzujuj ri ka mac, chtok'obisaj la ka wäch rech cäya' u k'ij ri bi' la! Sibalaj q'ui mul man uj uxinak ta jic chwäch la, uj macuninak chwäch la.

⁸ Eyebal u c'u'x ri Israel, ka Colonel pa tak ri c'axalaj tak k'ijol, ¿Jasche cäban ib la chi man lal ta aj tinimit, jacha' jun binel ri xak xuwi ta cacanaj che roc'owisaxic ri ak'ab?

⁹ ¿Jasche lal je ta ne jun winak ri ma ta cuch'obo jas ri cubano, jacha' jun banal ch'o'j ri man cäcuin taj cätobanic? Are c'u ri camic, Ajawaxel, lal c'o la chkaxo'l, conojel ri winak queta'm chi uj tinimit la; ¡man cujtzak ta la canok!

¹⁰ Ri Ajawaxel je cubij wa' che ri tinimit Israel: “We tinimit ri' are cäkaj ri amak'el wacatem chuwäch cäbe je la' cäbe jeri'. Rumal ri' man cäkaj ta chnuwäch. Camic quenataj ri e u mac chwe quincot c'u na u chi'.”

¹¹ Ri Ajawaxel xubij chwe: “Minabochi'j chi quenbana' utzil che we tinimit ri'.

¹² Pune' ta sibalaj cuq'uisa' rib che man cuya' taj caban wa'im, man quebentatabej taj ri e u tz'ononic; xa' ta ne e joropa' tabal tok'ob ri quechajirisaxic xukuje' tabal tak tok'ob quech c'äj ri quequic'am ta ulok chwe, man utz ta quebenwil na. Quinsachisaj na u wäch rumal ch'o'j, wi'jal xukuje' yabilal.

¹³ Are c'u ri in xintzelej u bixic: Ajawaxel; ri e k'axal tzij cätajin caquibij che ri tinimit chi man c'o ta ch'o'j capetic mawi wi'jal, chi ri lal cäya' na la jun jamaril che ri man c'o ta u q'uisic chupam we c'olbal ri'.

¹⁴ Are c'u ri Ajawaxel xutzelej u bixic chwe: We je caquibij wa' ri e k'axal tzij pa ri nu bi', xa' cätajin caquiban banoj tzij. In man e nu takom ta bic, mawi nu yo'm ta jun takanic chque mawi ta ne e nu tzijobem. Xa' e u cawäch tak k'alajisanic, subunelalaj tak c'utwächinic, xak pa qui jolom e q'uiyinak wi. E are tak wa' ri quequiya' quibixic we e k'axal tak tzij ri'.

¹⁵ Are c'u ri in, ri Ajawaxel, quinbij chi we e k'axal tak tzij ri' ri caquiban quib chi quech'aw pa ri nu bi' ri man e nu takom taj, ri caquibij c'ut chi man c'o ta ch'o'j quebanok mawi wi'jal chupam we ulew ri': we k'axal tak tzij ri' quebecäm na rumal ri ch'o'j xukuje' ri wi'jal.

¹⁶ Are c'u ri tinimit ri quequibij we jastak ri' chque, xukuje' quecäm na rumal ri ch'o'j xukuje' ri wi'jal, e cachil tak ri quixokil, ri e qui c'ojol xukuje' tak ri e qui mia'l. Ri cäminakib querokilax na xo'l tak ri ja pa Jerusalen, man c'o ta c'u jachin quemukuwic. Jewa' quinban na chque che u tojic ri quetzelal.

¹⁷ Chabij che ri tinimit ri quinbij chawe: ‘Cheturuw u wa'l tak nu wäch chi pa k'ij chi chak'ab, ri ma ta che tanic, rumal ri xibibalalaj u q'ueyowal ri c'o wi ri nu tinimit, rumal ri u socotajic ri sibalaj nimatajinak.

¹⁸ Quinbe pa ri juyub, quebenwil ri cäminakib ri xecäm rumal ri ch'o'j; quinoc chupam ri tinimit, quebenwil ri winak cätajin quecäm rumal wi'jal. Xukuje' ne ri e k'axal tzij xukuje' tak ri cojol tabal tok'ob quebe pa jun ulew ri man etamatal taj.’ ”

Ri K'axal tzij cäch'aw ruc' ri Ajawaxel

¹⁹ Ajawaxel ¿La kas xa' jumul xutum la ri Juda? ¿La lal k'itajinak che ri tinimit Sion? ¿Jasche xujsoc la ri man c'o ta wi ka to'tajic? Keyem pok'otajic, man c'o ta c'u jun utzil opaninak ta kuc'. Keyem rutzil ka wäch, xuwi c'u xibim ib c'olic.

²⁰ Ajawaxel cakaya' kib chuxe' ri ketzelal xukuje' ri qui mac ri e ka mam; uj macuninak chwäch la.

²¹ ¡Rumal ri bi' la chi nim u k'ij mujxutuj la, metzelaj la u wäch ri tinimit la ri c'o wi ri juluwemalaj tem re ajawibal la! ¡Chnataj ri c'ulwächinic la che la ri xban la kuc', ma ta c'u chatz'akatisaj la!

²² ¿La c'o ta pu lo chquixo'l ri diosib ri quequik'ijilaj ri e k'ijilal tak diosib jun ri cäcuintaj cukasaj ri jäb? ¿La xak ta pa u lo pa rech wi ri caj quebutak ulok ri jäb? ¡Jayi', Ajawaxel, ka Dios! Lal ri' quebetak la ulok, lal ri' ri cäbanow la conojel we jastak ri'; ¡rumal ri' cujeyem che la!