Ri Jeremiy 13 - Quiché Bible

C'utbal che u c'utic chi man jic taj bininak ri Israel

¹ Ri Ajawaxel xubij chwe: “Jät jalok'o jun sakalaj pas chacojo' c'u xe' a apam, majequej.”

² In xinlok' ri pas, jacha' ri takanic ri u yo'm ri Ajawaxel chwe, xincoj c'u xe'nupam.

³ Xinuch'abej chi c'u jumul ri Ajawaxel xubij c'u chwe:

⁴ “Chac'ama' ri pas ri xalok'o ri xukuje' a cojom, jät chuchi' ri nima' Euprats chac'u' c'u chila' pa ri u pak'ininak wi ri abaj.”

⁵ Xinbe c'ut chuchi' ri nima' Euprats xinc'u' c'ut, jacha' ri takanic ri u yo'm ri Ajawaxel chwe.

⁶ Oc'owinak chi c'u q'ui k'ijol, ri Ajawaxel xubij chwe: “Jät chuchi' ri nima' Euprats chac'ama' c'u ulok ri pas ri xatintak che u c'u'ic chila'.”

⁷ Xinbe chuchi' ri nima' Euprats, xintzucun chupam ri ulew xinwesaj c'u ulok ri pas chupam ri c'olbal ri nu c'u'm wi canok, k'ayinak chi c'ut man c'o ta chi c'u cupatanij.

⁸ Are' c'u ri Ajawaxel xinuch'abej chi jumul,

⁹ xubij c'u chwe: “Kas jewa' quinban na che u sachisaxic u wäch ri nimal ri cac'amow ri Juda xukuje' ri Jerusalen.

¹⁰ We itzel tinimit ri' cuk'il rib che qui nimaxic tak ri e nu takanic are c'u u takem ri tacalaj u chomanic ri ranima'. Benak che qui terenexic qui diosib winak, che qui patanixic xukuje' che qui k'ijilaxic. Xak junam ruc' ri pas ri', ri man c'o ta chi u patan.

¹¹ Je jas ri cuban jun, co cuxim ri pas xe' u pam, je xinban wa' che ronojel ri tinimit Israel xukuje' ronojel ri tinimit ri Juda sibalaj xeben nuc' chwe, rech xebux ta nu tinimit xquiya' ta c'u u tzijol ri nu bi', xebux ta c'u nimarisabal nu k'ij xukuje' nu juluwem. Man c'u xeniman ta chwe. In, ri Ajawaxel Dios, quinjiquiba' u bixic.”

Jun c'utbal chic che u c'utic ri c'äjisabal wächaj ri cäpe na

¹² “Chabij chque xukuje': ‘Ri Ajawaxel, ri u Dios ri Israel, cubij: Apachique k'ebal cuya' canojisax che u wa'l uva.’ Ri aj israelib caquitzelej na u bixic chawe: ‘¿La ma ta pu sibalaj keta'm chi apachique k'ebal cuya' canojisax che u wa'l uva?’

¹³ Are c'u ri at catzelej na u bixic chque: ‘Cächa ri Ajawaxel: Quebenk'abarisaj conojel ri e jekel chupam we ulew ri'; ri ajawinelab ri quet'uyi chupam ri u tem re ajawibal ri David, ri e cojol tabal tok'ob, ri e k'axal tzij xukuje' conojel ri e jekel pa Jerusalen.

¹⁴ Quebenpaxij c'u na e jacha' k'ebal, ri jun cupak'ij na rib ruc' ri jun chic, tataxelab xukuje' c'ojolaxelab xak quejunamatajic. Man quel ta c'u na nu c'u'x chque; quinsachisaj na qui wäch man ruc' ta elebal c'uxaj xukuje' man ruc' ta tok'obisam wächaj. In, ri Ajawaxel, quinjiquiba' u bixic.’ ”

Cäpixbex ri Israel

¹⁵ ¡Aj israelib, ri Ajawaxel ch'awinak! Miban nimal, chitatabej ruc' oquem il.

¹⁶ Chiya' u k'ij ri Ajawaxel, c'ä majok chuc'ama' ulok are' ri k'ekumalil quipak'ila' c'u iwib ix cuc' xibibalalaj tak juyub; c'ämajok chuq'uexa' are' pa räxcanacojil pa tzatzalaj k'ekumalil, ri chäj ri i weyem.

¹⁷ We c'u ne man quixoc ta il che u nimaxic ri cäya' u bixic chiwe, quinok' na chi c'uyal u mac ri nimal ri quixc'amowic; quebelel na ri u wa'l tak wächaj chque ri nu bak'wäch, rumal rech chi e yutuyuj quec'am na bic ri e u jumulaj ri Ajawaxel.

Takanic ri cuya' ri Dios che ri Ajawinel

¹⁸ “Chabij che ri ajawinel xukuje' che ri ajawinel ixok nanaxel: ‘Chixkaj ulok chiya' can ri tem re ajawibal chixt'uyul c'u cho ri ulew, tzakinak c'ut ri corona ri c'o che ri i jolom ri quixwikowic.’

¹⁹ Ri tinimit tak ri e c'o pa ri Negueb e sutim quij; man c'o ta jun cäcuinic coc'owic. Conojel ri e c'o pa Juda xec'am bic pa jun ulew chic chnimalaj conojel c'ut xec'am bic.

²⁰ Chixca'y apan chi naj chica'yej c'ut ri u petic ri c'ulel pa ri iquiak'ab. ¿Jawije' c'o wi ri jumulaj ri nu jachom pa a k'ab ri jumulaj ri' ri caban wi nimal?”

Cäya' u bixic ri u majixic bic ri Israel pa jun ulew chic

²¹ “¿Jas c'u ri cabij na, Jerusalen, aretak cäk'at na tzij pawi' cumal winak ri kas at xatyo'w tijonic chque? Quepe c'u na u k'oxomal yawab ixok chawe.

²² We c'u cäc'ot a chi' jasche je cac'ulmaj wa', rajawaxic cawetamaj chi qui mac quech ri c'axalaj tak a mac; ¡rumal ri' at sanabam banom c'u c'ax chawe!

²³ ¿La cäcuin jun k'ek cuq'uex ri u tz'umal? ¿La cäcuin jun balam curesaj ri e u tz'iquitz'ak ri e c'o chrij? Mawi c'u ne ri ix xukuje', ri ix nak'atal che ri etzelal, man quixcuintaj qui ban ri utz.

²⁴ Rumal ri' ri ix quixinjabuj na jacha' ri pajo ri cacharchatex bic rumal ri quiakik' aj chaki'j uwo sak.

²⁵ Are wa' ri cataklebej na, Israel, are wa' ri takalic ri quinban na chawe. In, ri Ajawaxel quinjiquiba' u bixic. Xinasach c'u pa a jolom xajiquiba' c'u a c'u'x chquij ri subunelab tak diosib ri man c'o ta qui patan.

²⁶ Xukuje' ri in utzalaj a sanabaxic quinban na, catinya' c'u na pa ri q'uixbal.

²⁷ Wilom ri a chokchotem, xukuje' ri a kajic pa mac, ri q'uixibalalaj a c'aslemal jas ri cäcam ri quech ri nim ch'utin, ri e a banoj ri quebaban paquiwi' tak ri juyub xukuje' pa apachique c'olbal. ¡Tok'ob a wäch Jerusalen! ¿joropa' lo k'ijol catakej na c'olem chupam ri a tz'ilol?”