Ri Jeremiy 12 - Quiché Bible

Ri k'axal tzij cätzijon ruc' ri Dios

¹ Ajawaxel, we quinec'ulelan che la, ri lal amak'el are c'o na rumal ri cäbij la; are ta c'u ne quinwaj quinc'ot ta chi' la che ri qui c'ulmatajic jujun jastak. ¿Jasche man c'o ta caquic'ulmaj ri itzel tak winak? ¿Jasche utz e c'olic ri man kas e jic taj?

² Lal xelic la caquitzokopij c'ut ri qui ra'b pa ri ulew, queq'uiyic, caquiya' c'ut wächinic. Che ri qui chi' nakaj lal c'o wi chque are c'u ri che ri canima' naj e c'o wi che la.

³ Are c'u ri lal, Ajawaxel, etamam la nu wäch; quinil la eta'm c'u la jachique tak ri e nu chomanic che la. ¡Chec'ama' la bic we winak ri' jacha' ri cäban chque ri chij ri quec'am bic pa ri pilbal; chcojo' la quetal che ri k'ij re ri cämisanic!

⁴ ¿C'ä jampa' cutakej chaki'jaric ri ulew quechaki'jar c'ut ri' ri k'ayes ri c'o pa tak ri juyub? Ri awaj xukuje' tak ri chicop ri e c'o qui xic' cätajin quecämic u mac quech ri quetzelal ri e u winakil cho ri ulew, are c'u pa qui c'u'x chi man cäil ta la ri caquibano.

Ri xutzelej u bixic ri Dios

⁵ “We sibalaj xatcosic xatxiq'uin chquij ri winak ri quebin chicakan, ¿Jas ta lo ri caban na cacoj awib cuc' ri winak ri e quiejeninak chquij quiej? Puwi' cowilaj ulew man c'o ta jas cana' wi awib, ¿jas c'u lo ri caban na chupam ri u tzatzal ri Jordan?

⁶ Xukuje' c'u ne tak ri e awachalal, ri kas e awachalal, man kas e jic taj chawij, caquirak qui chi' chrij a wi'. Majiquiba' a c'u'x chquij, pune' ta ne catquitzijobej cuc' utzalaj tak tzij.”

Cabison ri Ajawaxel rumal ri cutaklebej ri u tinimit

⁷ “Nu wonobam can ri nu tinimit, nu xutum ri xux can wech nabe. Nu jachom pa qui k'ab ri qui banom qui c'ulel chque, ri nim tinimit ri sibalaj quinlok'ok'ej.

⁸ We tinimit ri', ri wech canok nabe, uxinak c'u chwe camic jacha' jun coj aj c'ache'laj; cawun chwe, rumal ri' quinwetzelaj u wäch.

⁹ Ri nu tinimit je ta ne jun chicop ri e c'o u xic' ri sibalaj e je'l ri rismal, ri caban c'ax che cumal jule' tak chicop chic ri e c'o qui xic', ¡Chepet conojel ri juyubal tak awaj; chquimulij quib che u tzukic quib!

¹⁰ E q'ui c'ämal tak be ri e c'ulel qui sachisam u wäch ri nu ticbal uva, qui xak'alem ri nu juyub. Xquiban jun tolotic chaki'j uwo sak che ri ulew ri sibalaj lok' na chnuwäch.

¹¹ Xquiban can chaki'j uwo sak che xukuje' xquitoloba' canok, quinwil c'ut in chi carok'ebej rib. Ronojel ri ulew uxinak chaki'j uwo sak, man c'o ta c'u jun coc ta il che.

¹² Paquiwi' conojel ri wuk'uwak tak juyub re ri chaki'j uwo sak xebel wi ulok tokinelab tak winak, rumal rech chi ri in, ri Ajawaxel, c'o jun nu ch'ich' re ch'o'j ri cusachisaj na u wäch ri ulew pa tak ri e u c'ulbatil, man c'o ta c'u jamaril che jachin jun.

¹³ Xquitic trico q'uix xuya' ri ulew chque; ronojel ri qui chac ri xquibano man c'o ta xupatanij. Aretak xeyac ri u wächinic ri ulew xa' tzakmajic xquiriko u mac rech ri nicowelalaj woyowal.”

E u chi'nic ri Ajawaxel chque tak ri tinimit ri e u c'ulja' ri Israel

¹⁴ Jewa' cubij ri Ajawaxel chque ri e itzel tak tinimit, ri e u c'ulja ri Israel, ri quisachisam u wäch ri ulew ri xuya' are' jacha' che echbal che ri u tinimit Israel: “In quebenbok na chupam tak ri culew, quinwesaj c'u na ri Juda pa quiniq'uiajil wa'.

¹⁵ Aretak c'u e boktajinak chic quel chi na nu c'u'x chque, quinban c'u na chque chi quetzelej chupam ri kas quechbal xukuje' chupam ri culew.

¹⁶ Kas c'u ne tzij e are' xetijon ri nu tinimit che u banic ri chi'nic ri kas cäban na pa ri u bi' ri Baal, are c'u ri camic cuya' quejeki' pa u niq'uiajil ri nu tinimit, we kas caquic'amowaj ri u cojonic ri nu tinimit cäquiban ri chi'nic ri kas cäban na pa ri nu bi' je ta c'u cubij wa': ‘Rumal ri u c'aslemal ri Ajawaxel.’

¹⁷ Are c'u ri nim tinimit ri man caniman ta chwe, quinbok na c'ä chuxe' quinsachisaj c'u na u wäch. In, ri Ajawaxel quinjiquiba' u bixic.”