Ri Jeremiy 10 - Quiché Bible

Ri qui k'ijilaxic ri diosib, xukuje' ri u k'ijilaxic ri kas Dios

¹ Chattatabenok, tinimit aj Israel, we tzijol ri' ri cutak u bixic ri Ajawaxel chawe.

² Ri Ajawaxel cubij: “Mitakej qui banic ri caquiban ri jule' nimak tak tinimit chic mawi mixe'j tak iwib chque tak ri etal cho ri caj, jacha' ri caquiban we nimak tak tinimit ri'.

³ Ri qui cojonic we tinimit ri' man c'o ta qui patan. Caquit'oy jun cuta'm chupam ri c'ache'laj, jun k'olol dios cujos ruc' jun ch'ich',

⁴ cuwik c'ut ruc' sak puak xukuje' k'an puak, caquibajij tak clawux che ruc' bajibal rech man catzak taj.

⁵ Ri e diosib jeri' quebanataj poyib e xibil tak tun ch'oc pa jun ulew ri tiquil wi melon; man quecuin taj quech'awic, cajwataj c'u na qui telexic, rumal rech chi man quebin taj. Mixe'j iwib chquiwäch, man c'o ta c'u etzelal caquiban ta che jun winak mawi utzil.”

⁶ Ajawaxel, man c'o ta jachin jun jacha' ta ri lal: ri lal nim banic la, ri bi' la nim u banic xukuje' cuinel.

⁷ ¿Jachin ta ri ma ta cuxe'j rib chwäch la, cajawinel ri nimak tak tinimit? Lal ya'tal che la chi chxex ib chwäch la. Chquixo'l conojel ri ajno'jab xukuje' tak ri ajawinelab re ri uwächulew, man c'o ta jachin jun jacha' ta ri lal.

⁸ Conojel e are' e con, man c'o ta jubik' quetamanic. ¡Man c'o ta jas ri cacuin ta wi jun ch'akap che' ri quebutijoj ta wi!

⁹ Ri e qui diosib e xa' sak puak ri c'amom ulok pa Tarsis xukuje' k'an puak aj Upas; jastak ri e banom cumal josol tak diosib, xukuje' ch'ayal tak sak puak cojom c'u tak catz'iak morato xukuje' quiäk. Conojel e banom cumal nawinelalaj josol tak diosib.

¹⁰ Ri Ajawaxel, are ri' ri kas Dios, ri c'aslic Dios, ri junalic ajawinel. Aretak coyowaric, cayicop ri uwächulew ri nimak tak tinimit man caquich'ij ta u coch'ic ri royowal.

¹¹ (Ix, israelib, chibij chque tak ri e k'ijilal diosib: “Ri diosib ri man e are' taj xebanow ri caj mawi ri ulew casach na qui wäch cho ri uwächulew; mawi jun chque cacanaj ta can chuxe' ri caj.)”

Bix che u k'ijilaxic ri Dios

¹² Ri Ajawaxel ruc' ri u cuinem, xuban ri ulew; ruc' ri u no'j co xutiquiba' ri uwächulew; ruc' ri retamanic xulic' ri caj.

¹³ Ruc' ri u ch'abal re cakulja cubano chi cawulul ri ja' pa ri caj, cubano chi quewalij bic ri sutz' tza'm ri ulew, cubano chi querepelaj tak ri caypa' pa u niq'uiajil ri jäb caresaj c'u ulok ri quiakik' jawije' ri u c'olom wi.

¹⁴ Man c'o ta u no'j xukuje' man c'o ta retamanic ronojel winak. Ri e diosib quequisub ri quebanowic: e subunelab tak wächbalil man c'o ta c'u qui c'aslemal;

¹⁵ e banoj ri man c'o ta qui patan, e yabal tak tze', casachisax c'u na qui wäch rumal ri Ajawaxel pa ri k'atan tzij.

¹⁶ ¡Nim ri u jalbem rib ri u Dios ri Jacob, xuban ronojel ri c'olic! Ri are' xucha' ri Israel jacha' che rechbal. Ri Ajawaxel ri c'o ronojel u cuinem are wa' ri u bi'.

Ri u tzij ri k'axal tzij ruc' ri nim tinimit

¹⁷ “Are c'u ri at, nim tinimit, ri at c'o chupam ri nim tapia, chebamulij ri jastak awech re ri awulew.

¹⁸ Rumal rech chi cubij ri Ajawaxel: ‘Che we jumul ri' naj quebenq'uiak wi ri e u winakil tak we ulew ri'. Quebencoj pa tak latz', che rilic we ruc' wa' quinquiriko.’

¹⁹ ¡Tok'ob nu wäch, in c'o c'ut chupam ri etzeletajic! ¡Ri e nu socotajic man c'o ta qui cunaxic! ¡Xinchomaj c'ut in chi quincuin ri' che u coch'ic we k'oxomal ri'!

²⁰ Ri nu lic'om ja yojyobinak, conojel tak ri e u c'amal e t'okopitajinak. Ri e walc'ual in qui tzakom canok, ¡Man e c'o ta chic! Man c'o ta chi jachin jun catanin ta ri e nu lic'om ja, ri quelic'ow ta tak ri u wi'.

²¹ Ri rajyuk'ab we tinimit ri' man etal ta tzij; man caquitzucuj taj ri Ajawaxel. Rumal ri' e c'o pa tzakmajic ronojel c'ut ri u tzobaj jabutalic.

²² ¡Chixtatabenok! ¡Cul jun tzijol! Re jun ulew ri c'o pa ri iquiak'ab petinak jun nimalaj tininem ri quebujalwächij tak ri tinimit tak ri e re Juda pa jun chaki'j uwo sak ri xuwi xex tak awaj quec'oji' na chupam.”

²³ Ajawaxel, weta'm chi ri winak man pa u k'ab taj c'o wi ri u c'aslemal, chi man c'o ta u takanic puwi' ri u binem.

²⁴ Chujjic'a' la jas ri u cholajil ri suq'uilal la, man ruc' ta c'ut oyowal la, casachisaj c'u la ka wäch ri'.

²⁵ Chkasaj ri oyowal la paquiwi' ri nimak tak tinimit ri man cacaj taj caquetamaj wäch la, paquiwi' tak ri tinimit ri man caquiya' ta k'ij la, quibik'om c'ut ri u tinimit ri Jacob, quiyojim ronojel, quetzelam c'u can ri ulew.