Ri Hajey 1 - Quiché Bible

Pixbenic che u yaquic ri rachoch Dios

¹ Chupam ri ucab junab re ri rajawinic ri ajawinel Dariy, chupam ri nabe rajilabal ri uwak ic', ri Ajawaxel, rumal ri Hajey k'axal tzij, xutzijobej ri k'atal tzij re Juda, ri Zorobabel (ri Salatiel are' ri u tat ri Zorobabel), xukuje' ri c'amal qui be ri cojol tabal tok'ob, ri Jexu (ri Josadac are' ri u tat ri Jexu).

^2-3 Are wa' ri xubij ri Ajawaxel ri c'o ronojel u cuinem rumal ri k'axal u tzij: “We winak ri' caquibij c'ä maja' copan ri k'ijol che u banic ri wachoch.

⁴ ¿La are ta c'u k'ijol chiwe ix quixjeki' chquipam je'licalaj tak ja ri nimak qui banic, c'ä yojyobinak c'ut ri wachoch?

⁵ In, ri Ajawaxel ri c'o ronojel u cuinem, quinbij chiwe utz u chomaxic ri i c'aslemal chibana' ri iwuc'am.

⁶ Ri ix, q'ui ri tico'n quibano, xa' c'u jubik' ri wächinic ri quiyaco; quixwa'ic, quixuq'uianic, man c'u quixnoj taj, quixcanaj c'u ruc' chaki'j chi'; quipisisej iwib, man c'u quixoc ta pa mik'inal; are c'u ri cachacun chk'ij, cuya' ri cuch'äco chupam jun c'olbal ri tek'elic.

⁷ In, ri Ajawaxel ri c'o ronojel u cuinem, quinbij chiwe utz u chomaxic ri i c'aslemal chibana' ri iwuc'am.

⁸ Jix pa tak ri c'ache'laj, chebic'ama' ulok tak che', c'ac' u yaquic ri wachoch chibana'. In quinc'oji' na chila' ruc' quicotemal, quinc'ut c'u na ri nu juluwem.

⁹ Ri ix sibalaj q'ui ri quitzucuj xa' c'u jubik' ri quiriko; are c'ut ri quic'ol chupam ri iwachoch, xa' juwup quiya' bic che. ¿Jasche? Rumal rech chi yojyobinak ri wachoch, are c'u ri ix xak xuwi quixoc il che quilixic tak ri kas e iwachoch. In, ri Ajawaxel quinjiquiba' u bixic.

¹⁰ Rumal ri' man c'o ta jäb cäkaj piwi', mawi ri ulew quebuya' ta tak ri e u wächinic chiwe.

¹¹ In ri xinc'amow ulok ri sak'ij paquiwi' tak ri ulew xukuje' paquiwi' tak ri juyub, puwi' ri trico, paquiwi' tak ri juwi' tak uva xukuje' paquiwi' tak ri juwi' tak aseitun, paquiwi' tak ri qui wächinic ri ulew, paquiwi' ri achijab xukuje' paquiwi' ri awaj, xukuje' paquiwi' conojel tak ri chac.”

¹² Ri Zorobabel, ri Jexu xukuje' ri e qui tz'akatil ri winak xquina' xe'n ib aretak xquita' ri xubij ri Ajawaxel chque rumal ri Hajey, ri k'axal u tzij, are wa' ri u chilibem u bixic ri Dios ri Ajawaxel chi chubij.

¹³ Are c'ut ri Hajey, ri u tako'n ri Ajawaxel, xebuch'abej pa ri u bi' ri Dios, xubij c'u chque: “Cächa' ri Ajawaxel: ‘In, ri Ajawaxel, quinjiquiba' u bixic: In in c'o iwuc'.’ ”

^14-15 Je xuban wa' ri Ajawaxel che u ya'ic chajin anima' che ri Zorobabel, u k'atal tzij ri Juda, che ri Jexu, c'amal qui be ri e cojol tabal tok'ob, xukuje' ri e qui tz'akatil tak ri winak, chupam c'ut ri k'ij juwinak quiejeb rajilabal ri uwak ic' re ri ucab junab re ri rajawinic ri Dariy xquichaplej u banic ri rachoch ri qui Dios, ri Ajawaxel ri c'o ronojel u cuinem.