Ri Habacuc 3 - Quiché Bible

U ch'awem ri Habacuc ruc' Dios

¹ Are wa' ri u ch'awem ri Habacuc (ri k'axal u tzij) ruc' ri Dios:

² Ri tzijol la ri quinto, Ajawaxel, xukuje' ronojel ri banom la, qui nu nojisaj che u ya'ic nimalaj k'ij la. Chebana' ba' la camic, pa ri ka c'aslemal, ri e nimak tak banoj la ri xeban can la pa jujun tak k'ijol, rech xukuje' ri uj cheketamaj tak qui wäch. Je wa' chbana' la che u c'utic chkawäch ri u tok'obisaxic ka wäch umal la pune' ta ba' pa u niq'uiajil ri oyowal la.

³ Ri Dios quel na ulok chupam ri rulew ri Teman; are c'u ri tastalic Dios petinak wi ulok pa ri juyub Paran. Ri u juluwem culic' rib chuwäch ronojel ri caj, ronojel c'ut ri uwächulew cänoj che u ya'ic u k'ij.

⁴ Quel ulok pistal chupam juluwemalaj chuplinic, chque tak c'ut ri u k'ab quechuplin tak sakilal ri cac'utuw ri cuinem ri e c'utal ruc'.

⁵ Chuwäch ri are' quebopan wi ri cämisanelalaj tak yabil, chrij c'ut ri nimalaj k'ak' lak'apunel.

⁶ Ri ulew cäyicopic aretak ri are' cätaqui'c; quebirbob ri nimak tak tinimit aretak quebuca'yej; ri e ojer tak juyub quewulijic queja'r c'ut ri ojer tak juyub; e are' tak c'ut ri e u be ri Dios e re chbe k'ij sak.

⁷ In e wilom ri winak re Cusan e bik'itajinak chupam ri quiäkasakilal, xukuje' tak ri winak re Madian qui mojcolim tak quib rumal xe'n ib.

⁸ ¿La e yactajinak oyowal la, Ajawaxel, chquij tak ri nima'? ¿La nicowinak ri c'anal la chquij tak ri plo? ¿Rumal c'u ri' caquiejen la chquij tak ri e quiej la coc c'u la chupam ri carwaj la ri ch'äcanel?

⁹ Suc'umam la ri q'uiakbal ch'ab xukuje' xak e c'o tak conojel tak ri ch'ab. Cumal tak ri nima' e banom la k'et pa ri ulew.

¹⁰ Ri tacatak tak juyub queyicopic aretak quil la cumal; quetzokopitaj ulok ri nimak tak jäb cho ri caj, ri choalaj plo cäjininic ri u jininem quebuyac c'ut ri nimak tak u rekbala'.

¹¹ Ri k'ij xukuje' ri ic' man quebel ta ulok chupam ri c'olbal quib chuwäch ri c'aslicalaj quijulk'inic ri e ch'ab la xukuje' tak ri e ruc'upinic che ri tz'imaj ch'ich' la.

¹² Chupam ri oyowal la cabinibej la ronojel ri uwächulew; chupam ri c'anal la quexak'alej la ri nimak tak tinimit.

¹³ Ri lal, lal elinak la ulok che u to'ic ri tinimit la xukuje' che u to'ic ri ajawinel ri cha'om la. Yojim la ri u wi' ri rachoch ri itzel winak, e jolim la ri e u tac'alibal c'ä cho ri nim abaj.

¹⁴ Xcämisaj la ri c'amal u be cumal tak ri kas e u ch'ab, aretak ri e rajquiejab, e jacha' ta ne jun quiakik' jäb, xquiq'uiak quib ruc' ronojel qui ch'ujilal che qui jabuxic ri man quecuin taj caquito' ta quib, che u sachisaxic qui wäch chi c'uyal.

¹⁵ Cumal tak ri e quiej la cabinibej la ri plo, ri nimalaj qui wäch ri ja' ri quepuluwic.

¹⁶ Aretak xinta' ronojel wa' xinxe'j wib. Ri e nu chi' xequichaplej birbitem, ri e nu ch'ec man caquich'ij ta chic quetaq'ui'c' ronojel c'ut ri nu cuerp xchukchubic. In c'u ne jewa', man quinel ta na ch'u'j che reyexic ri k'ij aretak ri Dios quebucoj pa c'axc'olil ri cajch'ojab ri e banal tak c'ax chke.

^17-18 C'äte c'u ri' quinnoj na che quicotemal rumal ri Ajawaxel ri nu Colonel. Quink'ijilan na che pune' man quecotz'ijan tak ri e qui che'al tak higo mawi chiquiya' ta qui wächinic tak ri juwi' tak uva xukuje' tak ri e qui che'al tak ri aseitun; pune' man e c'o ta chi wächinic pa tak ri juyub; pune' casach qui wäch ri jumulaj tak chij ma ta c'u ne e c'o chic wacax pa tak ri e qui cäbal.

¹⁹ Quebuya' c'ut nu chuk'ab ri Ajawaxel, quebuya' chque ri nu ch'ec ri raninakil ri mazat quinuc'am c'u na bic pa tak chicajil jawije' ri quinto'taj wi na.