Ri Habacuc 2 - Quiché Bible

Ri xuk'alajisaj ri Ajawaxel chuwäch ri Habacuc

¹ Xak quineyenic xukuje' quinchajinic, jacha' ri cuban ri yuxlenel chupam ri u c'olbal, che rilic ri cubij na ri Ajawaxel chwe jas c'ut ri tzelebal qui wäch tak ri e nu ch'ach'atem.

² Ri Ajawaxel xutzelej u bixic chwe: “Chebatz'ibaj chquiwäch perepak tak t'ac ri quenc'utu' na chawäch, rech ri cäsiq'uinic caxiq'uin che u nimaxic.

³ C'ä maja' c'u ne copan ri k'ijol ri chetz'akat we c'utwächinic ri'; ma ta c'u ne ma ta chetz'akatok. At chateyenok, pune' cabeytajic, copan c'u na ri k'ijol ri rajawaxic.

⁴ Chatz'ibaj chi ri e banal tak etzelal e banal tak nimal, e are' c'u ri suc' quec'asi' na rumal ri qui cojonic.”

Ri caquitaklebej ri e banal tak c'ax

⁵ Ri winak ri e banal tak nimal caquirayij ri cuinem; man quebuxlan ta che u tzucuxic, amak'el c'ut are ta c'u ne cäcaj caquitik u wi', pune' c'u ne ri cuinem quieb u wäch jachanel. Caquijak ri qui chi', jacha ri u jul ri cäminak; mawi jubik' quenojic, jacha' ri cämical, rumal ri' cäquiq'uiakala' quib che qui ch'äquic nimak tak tinimit chrij nimak tak tinimit.

⁶ Conojel c'ut ri nimak tak tinimit ri e ch'äctajinak caquitze'j na u wäch ri xech'äcowic quequibixoj c'u che: “¡Tok'ob a wäch, chi cak'inomarisaj awib ruc' ri man awech taj! ¿C'ä jampa' lo ri catakej na ri qui mulixic tak ri k'inomal ri xebakajo?”

⁷ Aretak man aweyem taj, quebopan na ri tok'il tak a c'as, cac'astaj c'u na qui wäch ri are cacaj catquic'axc'obisaj catquich'anaba' c'u canok.

⁸ Ri nimak tak tinimit caquimulij na quib chawij che u banic c'ax chawe catquitoloba' c'u na canok jacha' ri xaban at che qui tolobaxic ri e are'. Caquiban na chawe chi quebatoj tak ri il patan ri e a banom, ri tokinic tak ri xebaban pa ri ulew che u banic c'ax chque ri tinimit tak xukuje' ri winak ri e c'o chquipam.

⁹ ¡Tok'ob a wäch, ri a nojisam ri awachoch cuc' tak ri jastak ri xa' e aweläk'am, che u to'ic awib rech man catkaj ta pa u k'ab apachique c'axc'olil!

¹⁰ Ruc' wa' ri cabano e a ch'ukum ri awachoch che q'uixbalil, at c'ut at banowinak ri u sachisaxic a wäch aretak xasachisaj qui wäch ri q'uialaj nimak tak tinimit.

¹¹ Xukuje' ne tak ri abaj quech ri nimak tak tapia xukuje' ri che' que tak ri tem quequirakala' na tak qui chi' che a c'ulelaxic.

¹² ¡Tok'ob a wäch, chi quebayac ri a tinimit tak puwi' ri qui tac'alibal ri il patan xukuje' puwi' ri man suq'uilal taj!

¹³ Ri Ajawaxel ri c'o ronojel u cuinem cubana' che ri a chac chi man c'o ta cubij xukuje' ri awelebal ch'u'j, conojel c'ut ri e a chac cäsachisax na qui wäch rumal ri k'ak'.

¹⁴ Are c'u ri retamaxic u wäch ri u juluwem ri Ajawaxel cunojisaj c'u na ronojel ri uwächulew, jacha' ri cuban ri ja' cunojisaj ri plo.

¹⁵ ¡Tok'ob a wäch chi quebak'abarisaj tak ri e a c'ulja caya' c'u u wa'l uva chque ri yujum itzel tak jastak ruc', che qui mach'irisaxic quebaca'yej c'ut ri qui ch'analiquil!

¹⁶ Che u q'uexwäch ri u nimarisaxic a k'ij, catch'ukutaj na che q'uixbal, rumal rech chi ri Ajawaxel cuya' na chawe chi cawuq'uiaj jun kumubal ri cac'utuw na chi man cojom ta awetal re ri kopinic ruc' ch'ich' xukuje' catuq'uex na pa juluwem.

¹⁷ Ri tokinic tak ri xebaban che ri juyub Libano quebakajbej na, caxibij c'u na awib rumal ri qui cämisanic ri cawaj. Cäpe na wa' pawi' rumal quech tak ri etzelal ri e a banom xukuje' cumal tak ri tokinic ri xebaban chupam ri ulew xaban c'ax chque ri tinimit tak xukuje' chque tak ri winak ri e c'o tak chquipam.

¹⁸ ¿Jas ta lo ri u patan ri josom che' aretak q'uisom u josic? ¿Jas ta ri u patan jun wächbal ri xuwi cac'aman bic pa banoj tzij? Ri e diosib man quecuin taj quech'awic; ¿Jas ta c'u lo cuban ri winak cäcuinic cujiquiba' ta u c'u'x chquij ri e are' c'u xbanowic?

¹⁹ ¡Tok'ob a wäch, chi che jun dios re che' cabij wi chac'astajok, xukuje' c'u che jun memalaj abaj, chi chatac'alok! ¿La quecuin ta c'u lo wa' quequiya' ta jun tzijol? ¡Jayi', rumal rech chi man c'o ta qui c'aslemal pa quech wi, pune' ta ne ch'ukum tak quij ruc' k'an puak xukuje' sak puak!

²⁰ Are c'u ri Ajawaxel c'o chupam ri tastalicalaj rachoch: ¡Chixyinil chuwäch are' ronojel ri uwächulew!