Ri Ester 8 - Quiché Bible

Ri takanic che u to'ic quib ri aj judeyib

¹ Kas pa ri k'ij ri', ri ajawinel Asuer xusipaj che ri ixok ajawinel Ester ri rachoch ri Aman, ri qui c'ulel ri aj judeyib, xopan c'ut ri Mardoquey chuwäch ri ajawinel, u bim chi c'ut ri Ester che chi rachalaxic ri Mardoquey.

² Xresaj c'ut ri ajawinel ri u mulk'ab ri xresaj che ri Aman, xuya' c'u che ri Mardoquey. Ri Ester pa re wi, xucoj ri Mardoquey che takanel paquiwi' conojel ri jastak ri e rech can ri Aman.

³ Xpe ri Ester xtzijon chi jumul ruc' ri ajawinel, xutzakisaj c'u rib pa rakan, queturuw ri e u bak'wäch che ok'ej, xutz'onoj tok'ob che chi chuchupisaj ri itzelalaj takanic ri u yo'm can ri Aman maban c'ut ri qui cämisaxic ri aj judeyib ri u bim canok ri Aman.

⁴ Ri ajawinel xulic' ri u bara' re k'an puak. Ri Ester xwalijic, xtaq'ui' c'ut chuwäch ri ajawinel.

⁵ Xubij: “We ri ajawinel utz che, we c'u cuchomaj chi suc' ri quintz'onoj, we c'u ri ajawinel quinraj xukuje' utz c'u quinril wi, chtz'ibax bic jun takanic che u chupisaxic tak ri wuj ri e u takom bic ri Aman che u sachisaxic qui wäch ri aj judeyib ri e c'o pa conojel ri u tz'akatil ri rajawibal ri ajawinel.

⁶ ¿Jas ta c'u lo ri quinban na che u coch'ic ri u q'ueyowal ri kajem cuban puwi' ri nu tinimit, xukuje' ri u sachisaxic qui wäch ri e wachalal?”

⁷ Ri ajawinel Asuer xutzelej c'u u bixic che ri ixok ajawinel Ester xukuje' che ri Mardoquey, ri aj judey: “Xya'taj ri rachoch ri Aman che ri Ester wumal, xxequebetaj ri are' puwi' ri jitz'abal rumal rech chi are ta xraj xebucämisaj taj ri aj judeyib.

⁸ Quinya' pa i k'ab chi chitz'ibaj bic pa ri nu bi', ri utz na quiwilo che u to'ic quib ri aj judeyib. ¡Chebit'ika c'u bic tak ri wuj ruc' ri u t'ikbal ri ajawinel!” (Jun wuj ri tz'ibam pa ri u bi' ri ajawinel, ri xukuje' t'ikom ruc' ri u t'ikbal, man cuya' taj cächupisaxic.)

⁹ Ruc' aninakil xesiq'uixtax ri rajtz'ibab ri ajawinel. Chupam ri juwinak oxib ri rajilabal ri urox ic', are ri ic' re Siban. Ronojel c'ut ri takanic ri xuya' ri Mardoquey xtz'ibax bic chque ri aj judeyib, chque ri k'atal tak tzij, ri quetakan paquiwi' ri culewal ri nimak tak tinimit, xukuje' chque tak ri niq'uiaj chic ri quetakan paquiwi' ri juwinak wukub (127) nimak tak tinimit ri u tz'akatil ri ajawibal ri quechaptaj ulok kas pa ri India queq'uis c'ä pa ri Etiopiy, pa ri qui ch'abal xukuje' pa ri kas qui tz'ib conojel ri u tz'akatil ri ajawibal. Xukuje' chque ri aj judeyib xetz'ibax bic pa ri qui ch'abal xukuje' pa ri qui tz'ib.

¹⁰ Ri wuj tak xetz'ibax bic pa ri u bi' ri ajawinel Asuer aretak c'u xet'iktaj bic ruc' ri u t'ikbal ri ajawinel, xeya' bic chque ri e jachal tak wuj, ri xequiquejej bic tak quiej ri sibalaj aninak quebinic ri xebesax bic chquixo'l tak ri e u quiej ri ajawinel.

¹¹ Chquipam tak ri wuj ri ajawinel xuya' bic takanic chque ri aj judeyib, pa apachique tinimit ri e jekel wi, chquimulij tak quib che u to'ic ri qui c'aslemal, chequicämisaj xukuje' chequisachisaj qui wäch, chquechbej c'ut ri jastak quech ri winak re apachique tinimit o u tz'akatil ri ajawibal ri cäcaj quech'ojin tak cuc' chebequiyala' tak chque nim mequil wi ri ixokib mawi ri ac'alab.

¹² Ronojel wa' caban xa pa jun k'ij pa conojel ri u tz'akatil ri ajawibal ri e rech ri ajawinel Asuer; ri k'ij ri c'utum are ri oxlajuj rajilabal ri ucablajuj ic', ri ic' re Adar.

¹³ We takanic ri' rajawaxic cäjabux u bixic jacha' jun pixab, cäya' retamaxic pa conojel tak tinimit, pa tak ri u tz'akatil ri ajawibal, rech caquisuc'umaj tak quib ri aj judeyib pa ri k'ij ri', rech quequiya' rajil u q'uexelal chque ri e qui c'ulel.

¹⁴ Rumal ri u takanic ri ajawinel, ri e jachal tak wuj xebel bic ruc' ronojel aninakil, xebesax tak bic quiej chquixo'l tak ri e u quiej ri ajawinel xeya' bic chque, we takanic ri' xukuje' xjabux u bixic chupam ri tinimit Sus.

¹⁵ Ri Mardoquey xel ulok pa ri rachoch ri ajawinel u cojom atz'iak re ajawinel azul ruc' sak jun nimalaj corona re k'an puak xukuje' jun u k'u' sakloloj atz'iak re lino ruc' morato. Ronojel ri tinimit Sus xurak u chi' ruc' quicotemal,

¹⁶ chque c'ut ri aj judeyib ronojel xuxic sakil, quicotemal, jajatem xukuje' xya' qui k'ij.

¹⁷ Pa conojel u tz'akatil ri ajawibal, pa conojel tak tinimit xukuje' tak c'olbal jawije' tak ri copan wi ri u takanic ri ajawinel, ri aj judeyib xenoj che quicotemal xukuje' jajatem, xequiban tak wa'im cuc' tak nimak'ij. E q'ui c'u na chque ri winak re ri ulew xebux aj judeyib, rumal rech chi xech'äcataj rumal ri xe'n ib chquiwäch ri aj judeyib.