Ri Ester 3 - Quiché Bible

Ri Mardoquey xukuje' ri Aman

¹ Oc'owinak chi c'u jun k'ijol, ri ajawinel Asuer xuya' rekle'n ri Aman, u c'ojol ri Hamedat, rija'lil ri Agag, xucoj che c'amal qui be conojel ri k'atal tak tzij pa ri nim tinimit.

² Conojel ri quepatanin che ri ajawinel chupam ri rachoch quexuquic xukuje' caquipachba' ri qui jolom aretak coc'ow ri Aman xukuje' aretak e c'o chuwäch, je c'u takanic wa' u yo'm ri ajawinel; man c'u xraj ta ri Mardoquey xunimaj taj we takanic ri'.

³ Are c'u ri e pataninel tak re ri ajawinel xquic'ot u chi' ri Mardoquey jas che man cunimaj taj ri takanic ri u yo'm ri ajawinel.

⁴ Ronojel c'u k'ij caquiban we c'otoj chi'aj ri' che, ri are' man coc ta il che ri caquibij che. Xebe c'u che u bixic che ri Aman, che rilic we man cuq'uex ri u tzij ri Mardoquey, u bim chi c'u chque chi aj judey.

⁵ Aretak c'u kas xril ri Aman chi ri Mardoquey man cäxuqui' taj mawi cupachba' ri u jolom are tak coc'owic, sibalaj xyactaj royowal;

⁶ bim chi c'u che jas ija'lil ri cäpe wi ri Mardoquey, xuchomaj c'ut chi man c'o ta jas cuch'äco we xuwi cuc'äjisaj u wäch ri are', xuchaplej u chomaxic jas ri cuban che u sachisaxic qui wäch conojel ri aj judeyib, ri e jekel pa ri rajawibal ri Asuer.

Cätz'ibax ri takanic che u sachisaxic qui wäch ri aj judeyib

⁷ Pa ri nabe ic' re ri junab, o are' ri ic' re Nisan, chupam ri cablajuj junab re ri rajawinic ri Asuer, xeq'uiak taklebenic chuwäch ri Aman rech cac'ut ri k'ij xukuje' ri ic' ri takal u banic ri u chomanic, are c'u xutaklebej ri roxlajuj (13) rajilabal ri ucablajuj ic', o are' ri ic' Adar.

⁸ Xubij c'ut ri Aman che ri ajawinel Asuer: “Chquixo'l conojel tak ri tinimit ri u tz'akatil ri ajawibal la, c'o jun ri u tasom rib chquixo'l ri niq'uiaj chic; e c'o u pixab ri man e junam ta cuc' ri niq'uiaj tinimit chic, man c'u caquinimaj taj ri e u takanic ri ajawinel. Man takal ta che ri ajawinel chi we tinimit ri' cutakej jekelem chupam ri ajawibal la.

⁹ Jeri', we utz che ri ajawinel, chuya' jun takanic ri cutak u sachisaxic qui wäch, are c'u ri in pa wech wi quinjach na chque ri e c'olol tak puak wukub mil quieb sient oxc'al (7,260) quintal sak puak pa qui k'ab ri quebanow we chac ri' cäk'ax ruc' ri u rajil ri ajawinel.”

¹⁰ Xpe c'u ri ajawinel xresaj ri u mulk'ab xuya' c'u che ri Aman, qui c'ulel ri aj judeyib,

¹¹ xubij c'u che: “Ri sak puak ri cachi'j chcanaj awuc'. Are c'u ri tinimit ri a bim, chabana' che jas ri a rayibal.”

¹² Chupam ri oxlajuj (13) rajilabal ri nabe ic' re ri junab xesiq'uix ri rajtz'ibab ri ajawinel, ri xquitz'ibaj ri u takanic ri Aman chque ri k'atal tak tzij ri e c'o pa ri e u tz'akatil ri ajawibal xukuje' chque tak ri takanelab ri quetakan paquiwi' ri ajch'ojab pa jujun tak c'olbal, xukuje' chque ri qui nimakil ri tinimit. We takanic ri' xetz'ibax pa tak ri qui tz'ib xukuje' pa tak ri kas qui ch'abal ri e u tz'akatil ri ajawibal, pa tak ri kas qui ch'abal conojel tak tinimit, ri xetz'ibax bic pa ri u bi' ri ajawinel Asuer, xet'ik c'u bic ruc' ri u t'ikbal ri ajawinel,

¹³ xec'am c'u bic cumal ri e ya'l tak wuj pa ronojel ri u tz'akatil ri ajawibal. Ri takanic ri xya' bic chupam ri wuj chi kas cäsachisax qui wäch chnimalaj conojel, xa c'u pa jun k'ij, conojel ri aj judeyib, chi c'ojolab, chi ri'jab, chi ac'alab, chi ixokib. Chebiwechbej tak c'ut ri qui k'inomal. Ri k'ij ri xc'ut che u banic wa' are ri roxlajuj rajilabal ri ucablajuj ic', ri ic' re Adar.

¹⁴ We takanic ri xesax u tzijol xcanaj c'u jacha' che pixab ri xya' retamaxic pa conojel ri u tz'akatil ri ajawibal xukuje' pa tak tinimit, rech e suc'umatal chic aretak copan we k'ij ri'.

¹⁵ Ri e ya'l tak wuj ruc' aninakil xebel bic rumal ri u takanic ri ajawinel, we takanic ri' xjabux u bixic chupam ri tinimit Sus. Ri ajawinel rachil ri Aman xet'uyi che ruq'uiaxic tzam, cajawin c'u ne ri man tatajel ta re xe'n ib chupam ri tinimit Sus.