Ri Ester 2 - Quiché Bible

Ri Ester cacoj che ixok ajawinel

¹ Oc'owinak chi c'u jun k'ijol, ri ajawinel Asuer, oc'owinak chi ri royowal, xnataj ri Basti che, che ri xuban canok xukuje' ri takanic ri u yo'm chrij.

² Xquibij c'ut ri rach k'atal tak tzij che: “Rajawaxic chi quetzucux che ri ajawinel k'apojib tak alitomab ri e je'lic.

³ Chebucojo' ri ajawinel tzucul tak quech pa conojel ri u tz'akatil ri rajawibal, xubij c'u bic chque chi chequic'ama' ulok conojel ri quebequiriko chupam ri cachoch ri ixokib ri u cojom ri ajawinel chupam ri tinimit Sus, checoj c'u chuxe' ri u chajinic ri Hegay, achi ri u cuban u c'u'x ri ajawinel chrij chajil c'u que ri ixokib. Chebuje'lisaj c'ut ri Hegay,

⁴ are c'u ri ali ri sibalaj cakaj na chuwäch ri ajawinel are chäcoj che ixok ajawinel are' cacanaj chupam ri u c'olbal ri Basti.” Ri chomanic xkaj pa u jolom ri ajawinel, je c'u xbanic.

⁵ Chupam ri tinimit Sus jekel wi jun aj judey Mardoquey u bi', u c'ojol ri Jair, rija'lil c'u ri Simey xukuje' re ri Sis, aj ramak' ri Benjamin.

⁶ Are' jun chque ri q'uialaj winak ri xebuc'ama' ulok ri ajawinel Nabucodonosor re Babilon pa Jerusalen junam ruc' ri Jeconiy, ajawinel re Juda.

⁷ Ri Mardoquey c'o jun rachalaxic ali, man c'o ta chi u tat u nan, ri xuban u mia'l che aretak xcäm ri u tat xcäm ri u nan. Hadas u bi' xukuje' cäbix Ester che, sibalaj je'lic xukuje' sibalaj je'l u bantajic.

⁸ Aretak xjabun u bixic ri takanic ri xuya' ri ajawinel e q'ui ri alitomab xemulix chupam ri cachoch ri ixokib ri c'o chupam ri tinimit Sus xecoj c'u chuxe' ri u chajinic ri Hegay, ri chajil quech ri ixokib, are' c'u jun ri Ester chquixo'l.

⁹ Ri ali sibalaj xkaj chuwäch ri Hegay, nim xril wi', rumal c'u ri' sibalaj utz rilixic xubano, xuya' ronojel ri rajawaxic che u wikic rib xukuje' sibalaj utz u tzukic xubano; xebucoj wukub utzalaj tak pataninel rech ri e c'o chupam ri rachoch ri ajawinel, e rachil wa' xuk'axaj chquipam ri utzalaj tak ja ri e c'o chupam ri cachoch ri ixokib.

¹⁰ Ri Ester man c'o ta jas xubij chrij ri rija'lil mawi ri e rachalaxic, u bim c'u ri Mardoquey che chi man cutzijoj taj.

¹¹ Ri Mardoquey cawacat chuwäch ri uwo ja re ri cachoch ri ixokib che retamaxic we utz u banom ri Ester, xukuje' jas ri rilixic cabanic.

¹² Conojel we alitomab ri' e cojom pa jun suc'umanic re je'licalil ri cabeytaj cablajuj (12) ic'. Ri nabe wakib ic' caquibil ri qui cuerp ruc' aseit re mir, are chi c'u ri wakib ic' chic ri cäraj na, cuc' tak c'oc'al xukuje' tak crem ri quequicoj tak ri ixokib. Aretak caq'uis qui suc'umaxic chquijujunal ri alitomab quebopan chuwäch ri ajawinel Asuer,

¹³ cäya' c'u che ri ali chi cuc'am bic chupam ri cachoch ri ixokib ronojel ri cutz'onoj aretak cabe pa ri rachoch ri ajawinel.

¹⁴ Coc ak'ab cabe pa ri rachoch ri ajawinel, ak'ab chucab k'ij cäk'axex pa jun c'olbal chic pa ri cachoch ri ixokib, ri c'o pa u k'ab ri Saasgaz, achi ri u cuban wi u c'u'x ri ajawinel, are' chajil quech ri man kas ta e rixokil; aretak coc'ow wa' man copan ta chic chuwäch ri ajawinel, xuwi ne we kajinak chuwäch ri are cutak c'u na u siq'uixic.

¹⁵ Aretak c'u ri Ester, u mia'l ri Abihail, rican ri Mardoquey, xurika' ri k'ij copan chuwäch ri ajawinel, xuwi xuc'am bic ri u bim ri Hegay che, achi ri u cuban wi u c'u'x ri ajawinel xukuje' chajil que ri ixokib. Pa tak c'u ri k'ij ri', ri Ester sibalaj xkaj chquiwäch conojel ri queilowic.

¹⁶ Ri Ester xc'am bic pa ri rachoch ri ajawinel che opanem chuwäch ri ajawinel Asuer, chupam ri lajuj (10) ic' ri xukuje' cabix Tebet che, re ri uwuk (7) junab re ri rajawinic.

¹⁷ Xbe c'u ranima' ri Asuer ruc' ri Ester ri mawi ta jumul benak ta ranima' ruc' jun ixok chic jacha' ruc' ri Ester, jeri' chi sibalaj xlok'ok'ex rumal ri Asuer, ri are sibalaj xajawax na chquiwäch ri niq'uiaj alitomab chic ri e c'olinak ruc', xucoj ri corona re ixok ajawinel che ri u jolom, xucoj c'u che u q'uexwäch ri Basti.

¹⁸ Xuya' c'u jun nimalaj wa'im che u ya'ic u k'ij ri Ester, xerula'j c'u conojel ri e rach k'atal tak tzij xukuje' ri quetoban ruc' pa ri rajawinic, xebukasaj tak ri alcabal ri quequitoj tak ri u tz'akatil ri ajawibal xebujach c'u q'ui sipanic, jacha' ri cäpe pa ranima' jun ajawinel.

Ri Mardoquey xuto chi cachomax u cämisaxic ri Ajawinel

¹⁹ Pa tak ri k'ij aretak ri alitomab quec'am bic quebeyok chi chupam jun c'olbal chic ri c'o chupam ri cachoch ri ixokib, ri Mardoquey t'uyul chuchi' ri rachoch ri ajawinel.

²⁰ Jacha' c'ut ri no'j ri u yo'm ri Mardoquey, ri Ester man u yo'm ta u tzijol ri u tinimit mawi ri e rachalaxic, xane' u takem u tz'akatisaxic ri pixbenic ri u yo'm ri Mardoquey che, jacha' ri cubano aretak c'o chuxe' ri u to'banic.

²¹ T'uyul c'ut ri Mardoquey chuchi' ri rachoch ri ajawinel, xuta' ri xquibij ri Bigtan xukuje' ri Ters, quieb qui nimal ri ajch'ojab ri quechajin ri ajawinel ri quichajim ri oquibal chupam ri rachoch ri ajawinel. Sibalaj c'u e oyowarinak, cätajin caquichomaj ri caquiban che u cämisaxic ri ajawinel Asuer.

²² Aretak xretamaj ri Mardoquey we itzel chomanic ri', xutzijoj che ri ixok ajawinel Ester, ri are' xuya' c'u u bixic che ri ajawinel ri xuta' ri Mardoquey.

²³ We jasach ri' xtzucux u ch'obic, aretak c'u xch'obotajic chi kastzij, ri quieb qui nimal ajch'ojab xtak qui jitz'axic. We c'ulmatajic ri' xtz'ibax canok, chuwäch ri ajawinel, chupam ri wuj ri quetz'ibax wi tak ri u tzijobelil ri nim tinimit.