Ri Esdras 8 - Quiché Bible

Ri qui bi' ri xetzelejic

¹ Are wa' ri cajilabal ri c'ämal tak qui be ri jujun tak ja winak, je jas ri cajilabal ri jujun ja winak chquijujunal, ri pa tak ri u k'ijol ri rajawinic ri Artajers xquiya' can ri Babilon xetzelej c'u pa Jerusalen cachil ri Esdras:

^2-3 ri Jerson: aj rija'lil ri Pinees; ri Daniel: aj rija'lil ri Itamar; ri Hatus: (ri u tat ri Hatus are' ri Secaniy), aj rija'lil ri David; ri Zacariy: aj rija'lil ri Pars, achilatal cumal jun sient ruc' cawinak lajuj (150) achijab ri tz'ibatal qui bi';

⁴ ri Elioenay: (ri u tat ri Elioenay are' ri Seraiy), aj rija'lil ri Pahat-moab, achilatal cumal quieb sient (200) achijab;

⁵ ri Secaniy: (ri u tat ri Secaniy are' ri Jahaziel), aj rija'lil ri Zat, achilatal cumal oxib sient (300) achijab;

⁶ ri Ebed: (ri u tat ri Ebed are' ri Jonatan), aj rija'lil ri Adin, achilatal cumal cawinak lajuj (50) achijab;

⁷ ri Jesaiy: (ri u tat ri Jesaiy are' ri Ataliy), aj rija'lil ri Elam, achilatal cumal oxc'al lajuj (70) achijab;

⁸ ri Zebadiy: (ri u tat ri Zebadiy are' ri Micael), aj rija'lil ri Sepatiy, achilatal cumal jumuch' (80) achijab;

⁹ ri Obadiy: (ri u tat ri Obadiy are' ri Jehiel), aj rija'lil ri Joab, achilatal cumal quieb sient wajxaklajuj (218) achijab;

¹⁰ ri Selomit: (ri u tat ri Selomit are' ri Josipiy), aj rija'lil ri Bani, achilatal cumal jun sient oxc'al (160) achijab;

¹¹ ri Zacariy: (ri u tat ri Zacariy are' ri Bebay), aj rija'lil ri Bebay, achilatal cumal juwinak wajxakib (28) achijab;

¹² ri Johanan: (ri u tat ri Johanan are' ri Hacatan), aj rija'lil ri Azgad, achilatal cumal jun sient lajuj (110) achijab;

¹³ ri Elipelet: ri Jeiel, ri Semaiy, q'uisbal tak rija'lil ri Adonicam, achilatal cumal oxc'al (60) achijab, ri c'ä chumatam xetzelej ulok;

¹⁴ ri Utay, xukuje' ri Zabud: aj rija'lil ri Bigbay, achilatal cumal oxc'al lajuj (70) achijab.

Ri e pataninelab chupam ri Rachoch Dios

¹⁵ In, Esdras, xebenmulij conojel wa' chunakaj ri u be ja' ri quetakal pa ri nima' Ahab, oxib k'ij c'ut xujcanaj chila'. Xinoc c'u che retamaxic qui wäch conojel ri winak xukuje' tak ri e cojol tabal tok'ob, man c'o ta jun aj levi xinriko.

¹⁶ Rumal c'u ri' xintak bic ri Eliezer, ri Ariel, ri Semaiy, ri Elnatan, ri Jarib, ri Elnatan, ri Natan, ri Zacariy xukuje' ri Mesulam, e winak ri nimak qui k'ij, xukuje' ri ajtijab ri Joiarib xukuje' ri Elnatan, xya' bic ri takanic chque che u solixic ri Id,

¹⁷ takanel pa ri c'olbal ri Casip u bi', xinbij c'u bic chque ronojel ri caquiya' u bixic che ri Id xukuje' chque tak ri e rachil, ri e chajil tak re ri Rachoch Dios ri e c'o pa Casip, rech quequic'am ulok winak chke ri cujquito' chupam ri Rachoch ri ka Dios.

¹⁸ Maltiox c'u che ri Dios, xquic'am ulok ri Serebiy chke, achi ri sibalaj c'o retamabal, rija'lil jun aj levi (Mali u bi'), e rachil ri e u c'ojol xukuje' tak ri e rachalal; e wajxaklajuj (18) winak chi conojel.

¹⁹ Xequic'am chi ulok chke ri Hasabiy xukuje' ri Jesaiy, e rija'lil ri Merar, e juwinak (20) chi conojel e cachil ri e qui c'ojol xukuje' tak ri e cachalal.

²⁰ Ri e pataninel tak re ri Rachoch Dios ri e cojom rumal ri David xukuje' ri c'ämal tak be ri e c'o chuxe' ri qui takanic tak ri aj levitib, e c'o quieb sient ruc' juwinak (220), conojel tz'ibatal ri qui bi'.

²¹ Xinya' c'u u bixic chi man quewa' ta na jujun k'ij chunakaj ri nima' Ahab, che u k'alajisaxic chi uj macuninak chuwäch ri ka Dios, che c'u u tz'onoxic che chi colom chujuc'ama' bic xukuje' ri e kachalaxic xukuje' ri jastak ke.

²² Xinq'uix c'u che qui tz'onoxic bic ajch'ojab che ri ajawinel che ka chajixic pa ri be rech man cujkaj ta pa qui k'ab ri c'ulel, kabin chi c'u che ri ajawinel chi ri Dios quebuchajij tak ri quetzucun che cukasaj c'u ri u chuk'ab xukuje' ri royowal paquiwi' conojel ri quexutun che.

²³ Man xujwa' ta c'ut xkabochi'j c'ut ri Dios che ronojel wa', xoc c'u il che ka tatabexic.

²⁴ Xebentas c'u cablajuj e cojol tabal tok'ob che c'ämal tak be: ri Serebiy, ri Hasabiy xukuje' lajuj tak cachil,

²⁵ xinpaj c'ut ri sak puak, xinjach bic chque, ri k'an puak xukuje' tak ri chaconisan ri xebuchi'j bic ri ajawinel che sipanic, xukuje' ri e ya'l tak u no'j, ri e rach k'atal tak tzij, xukuje' conojel ri aj israelib ri e c'o chila', che ri Rachoch ri ka Dios.

²⁶ Xebenpaj bic chque quiejeb sient oxc'al cablajuj (472) quintal sak puak, jun sient (100) chaconisan re sak puak xukuje' oxc'al cablajuj (72) quintal ruc' quieb arob k'an puak;

²⁷ e c'o chi c'u na ri' juwinak lak re k'an puak ri quepajan wuklajuj (17) libra ruc' belejeb (9) onz ruc' niq'uiaj onz chi conojel, xukuje' quieb chaconisan chic re k'an ch'ich' ri sibalaj cajuluwic, ri sibalaj je'l u bantajic, ri je ta ne quebantaj k'an puak ri sibalaj pakal cajil.

²⁸ Xinbij c'u chque: “Ix ix tasom che u patanixic ri Ajawaxel, xukuje' tak ri chaconisan. Ri sak puak xukuje' ri k'an puak e re ri Ajawaxel, ri qui Dios tak ri e ka mam.

²⁹ Chixoc il chque, chebichajij c'ä quebipaj na chquiwäch ri e c'ämal tak qui be ri e cojol tabal tok'ob, xukuje' chquiwäch tak ri aj levitib xukuje' chquiwäch ri c'ämal qui be jujun ja winak re Israel, chquipam tak ri alaj tak ja ri e u tz'akatil ri Rachoch ri Ajawaxel, pa Jerusalen.”

³⁰ Are' c'u ri e cojol tabal tok'ob xukuje' tak ri aj levitib xquic'am ri sak puak, ri k'an puak xukuje' tak ri chaconisan ri e pajtalic, xequic'am bic pa Jerusalen, chupam ri Rachoch ri ka Dios.

³¹ Pa ri ucablajuj (12) ri rajilabal ri nabe ic', xujel bic chuchi' ri nima' Ahab che ri ka bic pa Jerusalen. Ri ka Dios xujuto', man xuya' ta c'olbal chi xujkaj ta pa qui k'ab ri c'ulel xukuje' tak ri eläk'omab pa ri be.

³² Aretak xujopan pa Jerusalen, xujuxlan oxib k'ij.

³³ Chucaj k'ij c'ut xpaj ri sak puak, ri k'an puak xukuje' tak ri chaconisan chupam ri Rachoch ri ka Dios, xjach c'u ronojel pa u k'ab ri Meremot cojol tabal tok'ob, u c'ojol ri Uriy. C'o c'ut ri Eleazar ruc', u c'ojol ri Pinees, xukuje' tak ri aj levitib ri Jozabad, u c'ojol ri Jexu, xukuje' ri Noadiy, u c'ojol ri Binuy.

³⁴ Kas pa ri k'ij ri' xpaj ronojel xukuje' xajilax ronojel, xetz'ibax tak c'ut ri eka'n.

³⁵ E are' tak c'ut ri xquiya' can ri Babilon ri xetzelej ulok, xequijach che tabal tok'ob ri quechajirisaxic ri cäya' che ri u Dios ri Israel, pa qui bi' c'ut conojel ri aj israelib, cablajuj (12) alaj tak ama'ib wacax, jumuch' waklajuj (96) ama'ib tak chij, oxc'al wuklajuj (77) alaj ama'ib tak chij xukuje' cablajuj (12) ama'ib tak q'uisic' che sipanic rumal ri mac. Conojel xeporox che u ya'ic u k'ij ri Ajawaxel.

³⁶ Xquijach c'ut ri takanic ri u yo'm ulok ri ajawinel chque tak ri k'atal tak tzij re ri ajawinic, xukuje' chque ri k'atal tak tzij re ri rajawibal ri c'o pa ri u kajebal k'ij che ri nima' Euprats, ri xequiya' to'banic che ri tinimit xukuje' che ri Rachoch Dios.