Ri Esdras 4 - Quiché Bible

Ri e c'ulel xecuinic xquik'atij ri chac ri cätajin cabanic

¹ Ri e u c'ulel ri Juda xukuje' ri Benjamin, xquetamaj chi ri e tzelejinak ulok pa Babilon cätajin caquiban chi jumul u banic u yaquic ri Rachoch ri Ajawaxel, ri u Dios ri Israel,

² xepe che rilic ri Zorobabel xukuje' ri Jexu xukuje' ri e c'ämal tak qui be ri jujun tak ja winak, xquibij c'u chque: “Chiya' c'olbal chke chi quixkato' che ri yaquic, rumal rech chi ri uj, uj junam iwuc' ix, kac'amom ri i Dios e ka chi'm c'u ulok tabal tak tok'ob che, pa tak ri u k'ij ulok ri Esar-hadon, ajawinel re Asiriy, ri xujuc'am ulok c'ä waral.”

³ Are c'u ri Zorobabel, ri Jexu xukuje' ri e jule' chic c'ämal tak qui be ri jujun tak ja winak aj israelib xquitzelej u bixic chque: “Man ya'tal ta chke chi cujito' ta che u banic u yaquic chi jumul ri Rachoch ri ka Dios, xak xuwi ri uj ka tuquiel cäkaban na u banic u yaquic che ri Ajawaxel, ri Dios re Israel, je c'u wa' ri takanic ri u yo'm ri Sir chke, ri ajawinel re Pers.”

⁴ E are' tak c'ut ri winak ri e qui c'ulja xequicoj qui chuk'ab che u cojic qui xib ri winak aj Juda, rech ma ta caquitakej ri yacanic.

⁵ Xquiban c'u u pa qui k'ab ri e k'atal tak tzij, we winak ri' xequicoj qui chuk'ab, xequik'il che u takexic u banic ri cätajin caquibano ronojel ri k'ijol ri xajawin ri Sir, ajawinel re Pers. C'ä xuchaplej na ajawinic ri Dariy, ajawinel re Pers.

⁶ Pa ri u chaplebal ri rajawinic ri Asuer xquitak jun wuj ri xequitzujuj wi bic ri e aj Juda xukuje' ri e aj Jerusalen,

⁷ pa tak ri u k'ijol c'ut ri Artajers, ajawinel re Pers, ri Bislam, ri Mitrid, ri Tabeel xukuje' ri e niq'uiaj tak rachil chic xetz'iban bic che ri Artajers. Ri wuj tz'ibatal bic pa Aramey, rech cach'obotajic jas ri cubij.

⁸ Ri Rehum ri are takanel, xukuje' ri Simsay, ri aj tz'ib, xquitz'ibaj bic jun wuj che ri ajawinel Artajers che qui tzujuxic bic ri e aj Jerusalen.

^9-11 Are wuj wa' ri xquitak bic ri Rehum ri takanel, ri Simsay ri ajtz'ib, xukuje' tak ri e cachil ri e k'atal tak tzij, qui nimakil ajch'ojab xukuje' ri nimak tak qui k'ij ri e aj Pers, ri aj Erec, ri aj Babilon xukuje' ri aj Sus, o are ri Elam, xukuje' ri qui tz'akatil tak ri jalan nimak tak tinimit ri xec'am ulok rumal ri nim u banic xukuje' nim u k'ij ri Asnapar ri xebujekeba' c'u chquipam tak ri tinimit pa Samar xukuje' pa ri niq'uiaj rulew chic pa ri u kajebal k'ij che ri nima' Euprats: “Che ri ajawinel Artajers, jewa' caquibij bic ri e pataninel tak ech la ri e c'o pa ri u kajebal k'ij che ri Euprats:

¹² Chopan retamaxic chuwäch la, chi ri aj judeyib ri xepakaba' la ulok kuc', e bopaninak pa Jerusalen, cätajin c'u cäquiban u banic u yaquic we tinimit ri' ri man nimanel taj, itzel c'ut. E qui cojom tak ri e u tac'alibal tak ri nim tapia chrij ri tinimit qui chaplem c'u qui yaquic.

¹³ Cakaya' c'u retamaxic che la, oh ajawinel, chi we cäban u banic u yaquic we tinimit ri' cäyac ri nim tapia chrij, we winak ri' man cacaj ta chi wa' caquitoj ri takal u tojic cumal, mawi caquitoj chic ri tojbal ri alcabal, cäbe c'u ri u k'inomal ri ajawinel pa c'ax.

¹⁴ Rumal c'u rech chi uj c'o uj che patanixic la, man xak ta cakilo chi cäya' oyowal che la. Rumal ri' cakatak bic u bixic che la ri cätajin cac'ulmatajic,

¹⁵ re canic'ox chquipam tak ri wuj ri qui tz'ibam can tak ri e mam la. Cärik na la chquipam chi we tinimit ri' man coc ta tzij pa u jolom ri xak c'u quieb cubij paquiwi' tak ri ajawinelab rumal, xukuje' chque ri niq'uiaj e u tz'akatil chic ri ajawibal, ri pa jujun tak k'ij chi canok nabe xequisuc'umaj walijisam tak ib chupam, rumal rech wa' xsachisax qui wäch.

¹⁶ Rumal c'u ri', cakaya' retamaxic che la chi we cäban u caban u yaquic we tinimit ri', caquiq'uis c'u u yaquic ri u tapia, ri lal catzak na la ri takanic puwi' ri ajawibal la ri c'o pa ri u kajebal k'ij che ri nima' Euprats.”

¹⁷ Ri xutzelej u bixic ri ajawinel: “Che ri Rehum ri takanel, che ri Simsay ri aj tz'ib, xukuje' chque tak ri e rachil ri e jekel pa Samar xukuje' pa ri u tz'akatil ri ajawibal pa ri u kajebal k'ij che ri nima' Euprats: Quinya' rutzil i wäch.

¹⁸ Rumal ri wuj ri i takom ulok chwe, ri xsiq'uix chnuwäch pa ri nu ch'abal,

¹⁹ xintakan chu tzucuxic ri tz'ibatal wi ri c'ulmatajinak. Rikom c'u chupam, chi kastzij, we tinimit ri' u walijisam rib chquij tak ri ajawinelab, chi qui banom tuquin tak ib xukuje' walijisam tak ib,

²⁰ chi xec'oji' tak ajawinelab pa Jerusalen ri nimak tak qui cuinem ri xetakan puwi' ri ulew ri c'o pa ri u kajebal k'ij che ri nima' Euprats, ri xtoj ri takal u tojic pa qui k'ab, xukuje' tak ri tojbal.

²¹ Rumal ri', chiya' takanic chque we achijab ri' chi chequitanaba' qui banic tak ri chac c'ä cäya' na c'ac' takanic wumal, mätakex u banic u yaquic ri tinimit.

²² Miya' be che we jasach ri', rech man canimataj ta ri etzelal che u banic c'ax che ri ajawibal.”

²³ Aretak xya' u siq'uixic ri u wuj ri ajawinel Artajers chuwäch ri Rehum, ri Simsay ri aj tz'ib, xukuje' tak ri e rachil, conojel wa' xebextax pa Jerusalen, xquicoj c'u na qui chuk'ab chque ri aj judeyib rech caquitanaba' qui banic tak ri chac.

²⁴ Rumal ri', xk'ilk'ob u banic u yaquic ri Rachoch Dios pa Jerusalen c'ä pa ri ucab junab re ri rajawinic ri Dariy re Pers.