Ri Esdras 3 - Quiché Bible

U chaplexic chi jumul ri k'ijilanic

¹ Aretak xurik ri uwuk ic', ri aj israelib e jekejoj chi c'ut chquipam ri kas qui tinimit, ronojel ri tinimit xumulij rib pa Jerusalen,

² are' c'u ri Jexu, u c'ojol ri Josadac, xukuje' tak ri e rachil ri e cojol tabal tok'ob, xukuje' c'u ri Zorobabel, u c'ojol ri Salatiel, xukuje' tak ri e c'o quebux che, xeboc che u yaquic ri porobal ri re ri u Dios ri Israel, che qui chi'xic tak ri tabal tok'ob ri cächajirisaxic ri cätakan wi ri u pixab ri Moises, achi ri pataninel re ri Dios.

³ Utzalaj c'u u yaquic ri porobal xquibano, caquixe'j c'u quib chquiwäch tak ri winak ri e c'o chquinakaj, ronojel c'u ak'abil xukuje' ronojel que k'ij quequichi'j tabal tok'ob ri cächajirisaxic puwi'; che u ya'ic u k'ij ri Ajawaxel.

⁴ Xukuje' xcoc'owisaj ri nimak'ij quech tak ri Cäbal, jacha' ri cubij ri pixab ri tz'ibatalic, ronojel k'ij quequichi'j tak ri tabal tok'ob ri cächajirisaxic ri nak'atisam qui banic, je xquiyao jas ri ajilabal ri takal qui ya'ic ronojel k'ij,

⁵ je jacha' ri tabal tok'ob ri quechajirisaxic ri queya' ronojel k'ij xukuje' ri queya' pa ri c'ac' ic', ri queya' pa tak ri u nimak'ij ri Ajawaxel ri e tastalic, xukuje' ri quequichi'j jachin tak pa que wi che ri Ajawaxel.

⁶ Kas pa ri nabe k'ij re ri uwuk ic' xquichaplej qui chi'xic tak ri tabal tok'ob ri quechajirisax chuwäch ri Ajawaxel, c'ä majok c'u ne chi chaplex u banic u yaquic ri Rachoch ri Ajawaxel.

⁷ Xya' c'u ri puak chque ri yacal tak ja xukuje' chque ri ajanelab, wa, uq'uia' xukuje' aseit chque ri winak aj Tir xukuje' aj Sidon, rech c'ä pa ri Libano quec'am wi ulok che' re chacalte' puwi' ri plo queyok c'ä pa Jop, je c'u wa' ri xuya' ri Sir, ajawinel re Pers, chi caquibano.

Cachaplex chi jumul u banic u yaquic ri Rachoch Dios

⁸ Ri Zorobabel, u c'ojol ri Salatiel, xukuje' ri Jexu, u c'ojol ri Josadac, junam cuc' tak ri e cachil ri e cojol tabal tok'ob xukuje' ri aj levitib, xukuje' conojel ri xec'am bic pa Babilon ri xetzelej pa Jerusalen, xquichaplej chi jumul u banic u yaquic ri Rachoch ri Dios pa ri ucab ic' re ri ucab junab che ri copanic pa Jerusalen, xjach c'ut ri u c'amic ri qui be ri chac pa qui k'ab ri aj levitib ri oc'owinak chi juwinak qui junab.

⁹ Ri Jexu, tak ri e u c'ojol, xukuje' tak ri e rachalal xebux xa juk'at ruc' ri Cadmiel xukuje' tak ri e u c'ojol, ri e rija'lil ri Juda, xukuje' xecachilaj ri e quija'lil ri e u c'ojol xukuje' ri e rachalal ri Henadad, ri aj levitib, che u c'amic qui be ri cätajin caquiban ri chac che ri Rachoch ri Dios.

¹⁰ Aretak ri yacal tak ja xquicoj ri u tac'alibal ri Rachoch ri Ajawaxel, ri e cojol tabal tok'ob xetaq'ui'c, quicojom ri catz'iak ri cajwataj che ri k'ij ri' cuc'am tak ri trompet. Ri aj levitib ri e rija'lil ri Asap e cuc'am ri quetecak tak k'an ch'ich' che u k'ijilaxic ri Ajawaxel, jas ri u cholajil ri takanic ri u yo'm can ri David, ajawinel re Israel.

¹¹ Jujun caquibixoj tak bix, jule' chi c'ut je u tzelexic u wäch wa' caquibano: “Chebiya' tak maltioxinic che ri Ajawaxel, rumal rech chi utz ri are', rumal rech chi junalic ri lok'ok'ebal u c'u'x che ri Israel.” Ronojel c'ut ri tinimit curak u chi' rumal quicotemal, cäk'ijilan c'u che ri Ajawaxel, chapletajinak chi c'u u banic u yaquic ri Rachoch ri Ajawaxel.

¹² E q'ui c'ut chque ri e cojol tabal tok'ob, aj levitib xukuje' ri e c'ämal qui be jujun tak ja winak, ri e ri'jab tak winak chic ri quilom can ri nabe Rachoch Dios xquitzokopij ok'ej ruc' rakoj chi'aj rumal rech chi caquilo chi cächaplex u yaquic we c'ac' Rachoch Dios ri'. E q'ui chi c'u na ri xukuje' caquirak qui chi' rumal quicotemal.

¹³ Man c'o ta jun cacuinic cuch'obo jachique ri rakoj tak chi'aj re quicotemal xukuje' jachique ri cok'ej ri winak, sibalaj c'u co ri rakoj tak chi'aj ri xquibano chi sibalaj naj xtataj wi ri rakoj chi'aj.