Ri Esdras 1 - Quiché Bible

Ri u takanic ri Sir

¹ Pa ri nabe junab re ri rajawinic ri Sir, ajawinel re Pers, rech cätz'akat ri u tzij ri Ajawaxel ri xya' u bixic rumal ri Jeremiy, ri Ajawaxel xuya' pa ranima' ri Sir rech cuya' nimalaj u bixic rumal tzij xukuje' rumal tz'ibatalic, we takanic ri':

² “Ri Sir, ajawinel re Pers, cuk'alajisaj ri cätakex u bixic: Ri Ajawaxel, ri Dios ri c'o chicaj, u yo'm pa nu k'ab conojel ri ajawibal aj uwächulew, u yo'm c'u u bixic chwe chi quinyac jun Rachoch Dios pa Jerusalen, ri c'o pa ri rulew ri Juda.

³ Je c'u ri', apachin tak chiwe ri ix u tz'akatil ri u tinimit ri Ajawaxel, chto'ba' rumal ri Dios, choj c'u pa Jerusalen ri c'o pa Juda, che u yaquic ri Rachoch ri Ajawaxel, ri u Dios ri Israel, ri are' ri Dios ri jekel pa Jerusalen.

⁴ Apachin ta c'u ne ri c'ä c'aslic ri quel bic pa ri c'olbal ri jekel wi camic, chyok bic sak puak, k'an puak che cumal tak ri u c'ulja che u to'ic, jastak re, xukuje' tak awaj, xukuje' chquiya' bic sipanic che ri Rachoch ri Dios pa Jerusalen.”

Ri aj israelib quetzelej pa Jerusalen

⁵ Ri c'ämal tak qui be ri jujun tak ja winak aj Juda xukuje' ri aj Benjamin, ri e cojol tabal tok'ob xukuje' ri aj levitib, conojel ri xya' chuk'ab chque rumal ri Dios, xequisuc'umala' tak quib che ri qui bic pa Jerusalen che u banic u yaquic ri Rachoch ri Ajawaxel.

⁶ Conojel tak ri qui c'ulja xequito' bic, cumal xquiya' bic sak puak, k'an puak chque, jastak que, awaj, jastak ri pakapoj cajil, xequiya' c'u bic ronojel qui wäch tak sipanic pa quech wi.

⁷ Ri ajawinel Sir, xebujach bic tak ri chaconisan ri re ri Rachoch ri Ajawaxel ri xeresaj ulok ri Nabucodonosor pa Jerusalen, xebuc'am c'u ulok xebuya' chupam ri cachoch ri e u diosib.

⁸ Ri Sir xutak qui tzelexic rumal ri Mitrid, ri c'olol puak, aretak c'u ajilatajinak chic rumal xebujach pa u k'ab ri Sesbasar, k'atal tzij re Juda.

⁹ Ri cajilabal ri jastak are wa': juwinak lajuj (30) nimak tak lak re k'an puak, jun mil (1,000) nimak tak lak re sak puak, juwinak belejeb (29) cuchilo,

¹⁰ juwinak lajuj (30) lak re k'an puak, quiejeb sient lajuj (410) lak re sak puak ri man kas ta je'lic, xukuje' jun mil (1,000) jastak chic.

¹¹ Ri cajilabal ri jastak re k'an puak xukuje' re sak puak chi nimalaj conojel e job mil quiejeb sient (5,400). Ronojel wa' xuc'am bic ri Sesbasar xutzelej pa Jerusalen, aretak xuya' can ri Babilon xtzelej c'u bic e rachil ri ebesam ulok.