Ri Daniel 9 - Quiché Bible

Ri Daniel cuban ch'awem ruc' Dios puwi' ri u tinimit

¹ “Ri Dariy, u c'ojol ri Asuer, quija'lil ri aj medib, are' cätakan puwi' ri cajawibal ri aj caldeyib.

² Pa ri nabe junab re ri rajawinic, in, Daniel, cätajin quinsiq'uij ri u wuj ri Jeremiy k'axal tzij ri cutzijoj wi ri oxc'al lajuj junab ri coc'ow na rech cäpe ri u yojyobixic ri Jerusalen, jas ri xubij ri Ajawaxel che ri k'axal u tzij.

³ Xebenban c'u tak ch'awem xukuje' tak tok'lenic che ri Dios ri Ajawaxel, xinya' nu tzij chi man quinwa' ta na, e nu cojom c'u wakwoj tak atz'iak, xint'uyi pa chaj.

⁴ Xinban ch'awem ruc' ri Ajawaxel ri nu Dios, xinban c'u we k'alajisanic ri' chuwäch: ‘Ajawaxel, nimalaj Dios ri xukuje' c'o u cuinem, ri amak'el quetz'akatisaj la ri cächi'j la cac'ut c'u la ri lok'ok'ebal c'u'x la chque ri quelok'ok'en che la ri xukuje' cäquitz'akatisaj qui banic ri e takomal la:

⁵ Uj macuninak xukuje' ka banom ri etzelal; ka banom ri lawaloyil; xak uj c'olinak chi jeri' man kayo'm ta c'olbal che la pa ri ka chomanic; e ka xutum ri takomal la xukuje' tak ri takanic la.

⁶ Man xkaya' ta ka xiquin chque tak ri e k'axal tzij la ri e pataninel tak ech la, ri xequich'abej ri kajawinelab pa ri bi' la, c'amal tak be, xukuje' ri e ka mam, xukuje' ronojel ri tinimit Israel.

⁷ Ri lal Ajawaxel, lal suc', are c'u ri uj ri uj aj judeyib elinak ka q'uixbal camic; ri e jekel pa Jerusalen xukuje' ri niq'uiaj aj israelib chic, ri e c'o nakaj xukuje' ri e c'o naj, ri e jekel pa tak ri ulew ri xeq'uiak wi la bic rumal rech chi man xeniman ta che la.

⁸ Ri uj, Ajawaxel, xukuje' tak ri e kajawinelab, ri e c'amal tak ka be xukuje' tak ri e ka mam cäkana' kib chi elinak ka q'uixbal rumal rech chi uj macuninak chwäch la.

⁹ Lal c'ut, cäban ech la ka Dios, pa k'ab la c'o wi ri elebal c'uxaj xukuje' ri sachoj macaj. Ri uj ka walijisam kib che c'ulelaxic la

¹⁰ man xkanimaj taj ri xbij la chke, Kajaw xukuje' ka Dios, mawi kanimam ri tijonic ri xya' la chke cumal tak ri k'axal tak tzij la ri e pataninel tak ech la.

¹¹ Ronojel Israel man xunimaj taj ri tijonic la, xuk'il c'u rib che qui nimaxic tak ri e takanic la; rumal ri' e kajinak pakawi' ri c'okobal xukuje' ri chi'nic ri kas cäban na ri e tz'ibatal chupam ri u pixab ri Moises, ri pataninel ech la rumal rech chi uj macuninak chwäch la.

¹² Lal, aretak xtak la ulok jun nimalaj u q'ueyowal pakawi', xtz'akatisaj la ri cojoj xib ri xban la chke uj xukuje' chque ri xetakan pakawi'; mawi jumul bantajinak ta cho ri uwächulew jun c'äjisabal wächaj ri cäjunamataj ta ruc' ri kajinak puwi' ri Jerusalen.

¹³ Ronojel we etzelal ri' petinak pakawi', jacha' ri tz'ibatal pa ri pixab ri xuya' ri Moises; are c'u ri uj man uj tzucuninak ta che la, Ajawaxel xukuje' ka Dios, mawi c'u ne e ka k'ilom kib che qui banic ri ketzelal, mawi ka takem u banic ri kastzij la.

¹⁴ Rumal ri', suc'umam la we c'axc'olil ri' takom c'u la ulok pakawi'; rumal rech chi ri lal, Ajawaxel xukuje' ka Dios, lal suc' pa ronojel ri cäban la; are c'u ri uj man xkaj taj xkatatabej ri xbij la chke.

¹⁵ Ajawaxel xukuje' ka Dios, lal xc'ut la ri nimalaj cuinem la aretak xesaj la ulok ri tinimit la pa Ejipt, yo'm c'u la u k'ij ri bi' la pa tak ri k'ij ri' c'ä camic; are c'u ri uj, uj macuninak ka banom ri lawaloyil.

¹⁶ Ajawaxel keta'm chi quel c'u'x la. Bana' la tok'ob chtasa' la ri oyowal la xukuje' ri c'anal la che ri Jerusalen, are c'ut ri tinimit la, ri tastalic juyub la. Conojel ri winak ri e re ri nimak tak tinimit cäquitze'j u wäch ri Jerusalen xukuje' ri e winak la, qui mac quech ri ka mac, xukuje' ri quech ri ka mam.

¹⁷ Ka Dios chtatabej la ri u ch'awem xukuje' ri e u tok'lenic we pataninel ech la ri'; rumal ri bi' la, Ajawaxel, chila la ruc' lok'ok'ebal c'uxaj ri bisobal ri canajinak wi ri achoch la.

¹⁸ Choc la il, nu Dios, xukuje' chätataben la; utz u ca'yexic bana' la ri ketzeletajic xukuje' ri tinimit la ri cänatax wi ri bi' la. Man quekaban ta ri ka bochi'nic che la rumal rech chi ka jiquiban ka c'u'x chrij ri u suq'uilal ri ka c'aslemal, xane' chrij ri nimalaj elebal c'u'x la.

¹⁹ ¡Ajawaxel, Ajawaxel! ¡Chujtatabej la, chsacha' la ka mac! ¡Chtok'obisaj la ka wäch, Ajawaxel, peta la che ka to'ic! ¡Kas che la, nu Dios, che c'u ri tinimit la xukuje' chque ri winak la, ri cäquinataj ri bi' la, mabey ib la!’ ”

Cäya' apan u bixic ri oxc'al lajuj wukutak k'ij

²⁰ “Ri in xintakej qui k'alajisaxic ri nu mac xukuje' ri quech ri nu tinimit Israel, xebenjach c'ut ri nu bochi'nic chuwäch ri Ajawaxel ri nu Dios puwi' ri tastalic u juyub ri Dios.

²¹ Aretak cätajin quinban ch'awem ruc' Dios, ri Gabriel, ri xuc'ut rib chnuwäch nabe pa ri c'utwächinic, cärapapic xopan wuc' jawije' ri in c'o wi. Xa' col man pa ri jok'otaj ri cächi'x ri tabal tok'ob chuwäch ri Dios re ri benabal k'ij.

²² Xubij c'u chwe: ‘Daniel, in petinak rech quebenk'alajisaj we jastak ri' chawäch.

²³ Xuwi xachaplej u banic ch'awem ruc' Dios, ri Dios xutzelej u wäch ri a tz'onon. Ri in in petinak chubixic chawe ri xubij, rumal c'u rech chi sibalaj at lok' chuwäch ri Dios. Are c'u ri camic kas chatatabej ri quinbij chawe, rech cach'ob ri c'utwächinic:

²⁴ Oxc'al lajuj (70) wukutak k'ij queboc'ow na paquiwi' ri a winak xukuje' puwi' ri tastalicalaj a tinimit rech cäq'uis u tza'm ri c'ulelanic xukuje' ri macunic, rech cäriktaj ri sachbal mac che ri etzelal cäjekebax c'u ri suq'uilal chbe k'ij sak, rech cätz'akat ri cubij ri c'utwächinic xukuje' ri yo'm u bixic cutas c'u rib ri sibalaj aj Tastalic.

²⁵ Rajawaxic cawetamaj xukuje' cach'ob wa': Kas pa ri jok'otaj ri cäya' takanic che u banic xukuje' ri u yaquic chi jumul ri Jerusalen, c'ä pa ri ropanic ri Ajawinel ri u cha'om queboc'ow na wukub (7) wukutak k'ij e are c'u ri be xo'l tak ri ja pa ri tinimit xukuje' tak ri e u tapia ri e c'o chquij ri e yacom chi jumul pa Jerusalen quebeytaj na oxc'al quieb (62) wukutak k'ij, sibalaj c'u e re rikoj tak c'ax we k'ijol ri'.

²⁶ Aretak oc'owinak chi oxc'al quieb (62) wukutak k'ij quesax na ri u c'aslemal ri ajawinel ri cha'om. Ri Jerusalen xukuje' ri rachoch Dios cäsachisax na qui wäch cumal ri u winak jun ajawinel ri cäpe na. Ri q'uisbalil cäpe na jacha' jun bik'tajic, c'ä chuq'uisbalil c'ut cätaken na ri ch'o'j xukuje' ri sachoj tak wächaj ri e yo'm qui bixic chi quebanic.

²⁷ Pa jun chi c'u wukub (7) k'ij, ri are' cuban na jun c'ulwächinic cuc' e q'uia winak, pa u niq'uiajil c'ut ri wukub k'ij cätanabax na qui ya'ic ri tabal tok'ob xukuje' tak ri sipanic. Jun c'u xibibalalaj awasinic cäbantaj na chuwäch ri porobal ri queya' wi ri tabal tak tok'ob c'ä cakaj na ri sachbal wäch ri yo'm u bixic puwi' ri banal tak rech we xibibal ri'.’ ”