Ri Daniel 7 - Quiché Bible

Ri c'utwächinic que ri quiejeb awaj ri e xibibal

¹ Jun chak'ab, chupam ri nabe junab re ri rajawinic ri Belsasar pa Babilon, ri Daniel xuban jun ichic' xukuje' tak c'utwächinic. Aretak c'u xc'astajic, xebutz'ibaj ri jastak ri nimak qui banic ri xerichic'aj. Are c'u wa' ri xutz'ibaj:

² “In xinwil pa ri nu waram chi ri quiejeb quiakik' quejich'ich'ic xequich'ujirisaj c'ut ri e u ja'il ri plo.

³ Xak c'u c'ätetal xebel ulok quiejeb xibibalalaj tak awaj chupam ri plo, ri jalan tak qui banic.

⁴ Ri nabe je ta ne u banic jun coj, e c'o c'u u xic' re cot. Nu yo'm c'u nu wäch che u ca'yexic, xebok ri u xic', xtac'abax cho ri ulew xtac'abax paquiwi' ri quieb rakan, xtac'abaxic jacha' jun achi, xq'uextaj c'u ri u chomabal xux jacha' ri u chomabal jun winak.

⁵ Ri ucab je ta ne u banic jun os, c'o na ri u nimal ri juperaj chuwäch ri juperaj chic, e u cayem c'u oxib c'alc'a'x; xinta' c'ut cäbix che: ‘¡Jät, jatija' ronojel ri ti'j ri catcuin che u tijic!’

⁶ Ri urox cäjunamataj ruc' jun leopard, e c'o c'u quiejeb u xic' cho rachak xukuje' xinwilo chi e c'o quiejeb u jolom xjach c'u ri cuinem pa u k'ab.

⁷ Ri ucaj awaj ri xinwil pa ri e nu c'utwächinic sibalaj xibibal, cäxibinic, c'o c'u jun u chuk'ab ri man c'o ta c'o wi, e c'o jujun nimak tak u ware re räx ch'ich', ronojel cubik'o, ronojel cut'ubu, quebuxak'alej tak ri ch'akatak ri queto'tajic. Are jun xibibalalaj awaj wa' ri man cäjunamataj cuc' conojel ri e wilom pa ri nu waram, e c'o lajuj ruc'a' pa u jolom.

⁸ Aretak c'u cätajin quebenca'yej tak ri uc'a', xinwilo chi cätajin quel chi ulok jun alaj uc'a' chquixo'l, xebok c'u oxib ruc'a' rech cäya' can c'olbal che ri q'uisbal ri c'äte xel ulok, ri e c'o u bak'wäch jas ri e c'o che jun winak xukuje' jun u chi' ri cäch'aw ruc' banoj nimal.”

Ri e u k'atan tzij ri Dios

⁹ “Xintakej ca'yem, c'ä xecoj na jujun tak tem re ajawibal, xt'uyi' c'u jun Nim Winak. Ri ratz'iak sibalaj e sak jacha' ri sakalaj tew, ri u wi' jacha' ri ch'ajch'ojalaj rismal chij. Ri u tem re ajawibal xukuje' tak ri e u quetet e rak' k'ak',

¹⁰ jun nima' re k'ak' quel ulok, chuwäch ri are'. Mil chi mil quepatanij che, miyon chi miyon e tac'ätoj chuwäch. Ri k'atan tzij xchapletaj c'ut ri k'atan tzij, xejak c'u tak ri wuj.

¹¹ Ri in cätajin quinca'yic, benak wanima' che qui tatabexic ri tzij ri ruc' nimal cätajin cubij ri alaj uc'a'; aretak cätajin quinca'yic, xcämisax ri xibibalalaj awaj xban ch'akatak che, xq'uiakaxtax c'u pa ri k'ak' rech cäc'atic.

¹² Xukuje' ri niq'uiaj xibibalalaj tak awaj chic xebesax ri qui cuinem, xec'asbax canok c'ä xopan na ri qui jok'otaj.

¹³ Ri in nu takem quilic tak we c'utwächinic ri' pa ri chak'ab ri', xak c'u c'ätetal: Xinwilo chi petinak jun pa tak ri sutz' ri je ta ne cäpe jun rija'l winak, xbe c'ut jawije' c'o wi ri Nim Winak; xoquisax c'u chuwäch.

¹⁴ Xeya' c'u ri cuinem che, ri juluwem xukuje' ri ajawibal, xukuje' winak que conojel ri nimak tak tinimit xukuje' tak ch'abal quepatanin c'u che. Ri u cuinem man c'o ta u q'uextajic, ri rajawinic mawi jubik' cäsachisax ta u wäch.

¹⁵ Ri in Daniel, xinna' chi xoc ri xe'n ib chwe; sibalaj xinoc il che ronojel ri xinwilo,

¹⁶ xinkeb ruc' jun chque ri quepatanij che, xintz'onoj c'u che chi chuk'alajisaj ronojel wa' chnuwäch. Ri are' xuc'am u k'abal u k'alajisaxic chnuwäch, xubij c'u chwe:

¹⁷ ‘Ri quiejeb xibibalalaj tak awaj e quiejeb wa' ri quetakan na puwi' ri uwächulew.

¹⁸ Chwi chi c'u wa' ri ajawibal pa u k'ab ri u tinimit ri Dios ri sibalaj aj chicaj, cux c'u na rech ronojel ri chbe k'ij sak.’

¹⁹ In xinwaj xinwetamaj chi na ri quel cubij ri ucaj ri xibibalalaj awaj, ri sibalaj nim u jalbem rib chquiwäch ri jule' chic, sibalaj c'u xibibal ri u wächbal: e c'o u ware re räx ch'ich' xukuje' rixq'uiak re k'an ch'ich'; ronojel cubik'o, ronojel cut'ubu, quebuxak'alej c'u ri ch'akatak ri queto'tajic.

²⁰ Xukuje' xinwaj xinwetamaj chi jubik' ri quel cubij ri lajuj ruc'a', xukuje' ri quel cubij ri alaj uc'a' ri e c'o u bak'wäch xukuje' jun u chi' ri cäch'aw ruc' sibalaj nimal, je ta ne ri tza are' ta ri sibalaj nim na chquiwäch ri niq'uiaj uc'a' chic, e tzakinak c'u oxib uc'a' che u ya'ic c'olbal che.

²¹ Xinwil c'ut chi we uc'a' ri' xutij u chuk'ab ruc' ri u tinimit ri Dios, cuch'äc c'ut,

²² c'ä xopan na ri Nim Winak xuban c'u suq'uil che ri u tinimit ri Dios ri sibalaj aj chicaj, tz'akatinak c'u ri k'ijol, rech ri u tinimit ri Dios cärechbej ri ajawibal.

²³ Xubij c'ut: ‘Ri ucaj awaj ri xibibal are jun ucaj ajawinic ri cäc'oji' na cho ri uwächulew, ri man cäjunamataj ta cuc' ri niq'uiaj chic. Cubik' na ronojel ri uwächulew, cuxak'alej na xukuje' cut'ub na.

²⁴ Ri lajuj uc'a' e lajuj ajawinelab ri quebajawin na pa we ajawibal ri'. Chiquiwi' chi c'u wa' jun cäpaki' chi na ri man cäjunamataj ta cuc' ri nabe, quebukasaj c'u na oxib chque we ajawinelab ri'.

²⁵ Cuyok' c'u na ri Dios aj chicaj, cutakej c'u na u sachic u wäch ri u tinimit; cucoj na u chuk'ab che u q'uexic ri u pixab ri Dios xukuje' tak ri nimak'ij, are c'u ri u tinimit ri Dios cäcanaj na chuxe' ri u cuinem cäbeytaj c'u na oxib junab ruc' wakib ic'.

²⁶ Cät'uyi c'u na ri k'atal tzij cuk'at c'u na tzij, quebesax c'u na ri takanic ri e c'o pa u k'ab, kas c'u cäyojyobisax na canok.

²⁷ Ri ajawinic, ri cuinem xukuje' ri juluwem que conojel ri ajawibal ri e c'o cho ri uwächulew, queya' na che ri u tinimit ri Dios aj chicaj. Ri rajawinic cäjeki' na chbe k'ij sak, conojel c'u ri tinimit re ri uwächulew quepatanin na che xukuje' queniman na che.’

²⁸ Are wa' ri u q'uisbalil ri tzijobelil. Are c'u ri in Daniel, sibalaj xinoc can il xukuje' xinsakmaquic; man c'o ta c'u jun jasach re ri c'utwächinic xinbij ta che jachin jun.”